അതിവേഗ ഇ-വീസ സംവിധാനവുമായി ശ്രീലങ്ക; അപേക്ഷിക്കേണ്ടത് ഇങ്ങനെ

വിനോദസഞ്ചാരികള്‍ക്ക് കൂടുതല്‍ എളുപ്പത്തിലും വേഗത്തിലും എത്താന്‍ നടപടികള്‍ ലഘൂകരിച്ച് ശ്രീലങ്ക. ഇതിനായി പുതിയ ഇ-വീസ ഓണ്‍ലൈന്‍ പോര്‍ട്ടലും ലങ്ക തുറന്നു. ഇതുവഴി വളരെ വേഗത്തില്‍ വീസ അപേക്ഷ ഉള്‍പ്പെടെയുള്ള കാര്യങ്ങള്‍ നടത്താന്‍ സാധിക്കും. ടൂറിസം രംഗത്ത് കൂടുതല്‍ വളര്‍ച്ച ലക്ഷ്യമിട്ടാണ് ദ്വീപ് രാഷ്ട്രത്തിന്റെ പുതിയ നീക്കം.

നിലവിലുള്ള ഇലക്ട്രോണിക് ട്രാവല്‍ പ്രവേശാനുമതി (ഇ.ടി.എ) രീതിക്ക് പകരമാണ് ഇ-വീസ സംവിധാനം നിലവില്‍ വന്നത്. ശ്രീലങ്കയിലേക്ക് പോകാനാഗ്രഹിക്കുന്നവര്‍ക്ക് അനുഗ്രഹമാണ് പുതിയ രീതി. വീസ പ്രക്രിയയ്ക്കായി പുതിയ വെബ്‌സൈറ്റും സര്‍ക്കാര്‍ തുറന്നിട്ടുണ്ട്.

www.srilankaevisa.lk എന്ന സൈറ്റിലൂടെ വിസ ആപ്ലിക്കേഷന്‍ പൂര്‍ത്തിയാക്കാം.

വിനോദസഞ്ചാരം, ബിസിനസ് എന്നീ കാര്യങ്ങള്‍ക്കായി വിമാനം, കപ്പല്‍ മാര്‍ഗം എത്താന്‍ ആഗ്രഹിക്കുന്ന ആര്‍ക്കും ഇ-വീസയ്ക്കായി അപേക്ഷിക്കാം. നൈജീരിയ, കാമറൂണ്‍, ഘാന, ഐവറികോസ്റ്റ്, സിറിയ, തെക്കന്‍ കൊറിയ എന്നീ രാജ്യങ്ങളില്‍ നിന്നുള്ളവര്‍ക്ക് പക്ഷേ ഇ-വീസ അനുവദിക്കില്ല. ഈ രാജ്യങ്ങളില്‍ നിന്നുള്ളവര്‍ ശ്രീലങ്കന്‍ എംബസി വഴി വേണം വീസയ്ക്കായി അപേക്ഷിക്കാന്‍.

1. ശ്രീലങ്ക ഇ-വീസയുടെ ഒഫീഷ്യല്‍ വെബ്‌സൈറ്റ് സന്ദര്‍ശിക്കുക

2. അക്കൗണ്ട് ക്രിയേറ്റ് ചെയ്യുക. മുമ്പ് ഉണ്ടെങ്കില്‍ അതില്‍ ലോഗിന്‍ ചെയ്യുക

3. ഓണ്‍ലൈന്‍ ആപ്ലിക്കേഷന്‍ ഫോം പൂരിപ്പിക്കുക

4. പാസ്‌പോര്‍ട്ട്, പുതുതായി എടുത്ത ഫോട്ടോ തുടങ്ങിയ അപ്‌ലോഡ് ചെയ്യുക.

5. ഇ-വീസ ഫീസ് ഓണ്‍ലൈന്‍ വഴി അടയ്ക്കുക.

6. അപേക്ഷ സമര്‍പ്പിച്ച് ഫീസും അടച്ചു കഴിഞ്ഞാല്‍ നിങ്ങള്‍ക്ക് രസീതും അപ്ലിക്കേഷന്‍ റഫറന്‍സ് നമ്പറും ലഭിക്കും.

7. അപ്ലിക്കേഷന്‍ റഫറന്‍സ് നമ്പര്‍ വഴി നിങ്ങളുടെ ഇ-വീസ സ്റ്റാറ്റസ് പരിശോധിക്കാം.

8. അപേക്ഷ സ്വീകരിച്ചാല്‍, ഇ-വീസയുടെ പ്രിന്റ് എടുത്ത് ശ്രീലങ്കയിലെത്തുമ്പോള്‍ ഇമിഗ്രേഷന്‍ ഓഫീസര്‍ക്ക് സമര്‍പ്പിച്ചാല്‍ മതി.

ശ്രീലങ്കയിലെത്തുമ്പോള്‍ ഇമിഗ്രേഷന്‍ ഡിപ്പാര്‍ട്ട്‌മെന്റ് അനുമതി നല്‍കിയ ഇ-വീസയുടെ കോപ്പി കൈയില്‍ കരുതുക. ലങ്കയില്‍ നിന്ന് തിരിച്ചുള്ള ടിക്കറ്റിന്റെ രേഖകള്‍ ഉണ്ടായിരിക്കണം. ഇന്ത്യയുള്‍പ്പടെയുള്ള രാജ്യത്തെ പൗരന്മാര്‍ക്ക് വീസരഹിത പ്രവേശനം കഴിഞ്ഞ വര്‍ഷം ശ്രീലങ്ക പ്രഖ്യാപിച്ചിരുന്നു. 2024 മാര്‍ച്ച് 31 വരെയാണ് ഈ സ്‌കീമിന്റെ കാലാവധി ഉണ്ടായിരുന്നത്. നിരവധി ഇന്ത്യക്കാര്‍ ഈ ആനുകൂല്യം പ്രയോജനപ്പെടുത്തിയിരുന്നത്.