fbpx
Home Entrepreneurship Cool Startups 2019

Cool Startups 2019

നൂതന ആശയങ്ങള്‍, ആവേശകരമായ കണ്ടെത്തലുകള്‍, പുതിയ സാങ്കേതികവിദ്യകളുടെ പിന്‍ബലം, വിവിധ സോഴ്‌സുകളില്‍ നിന്നുള്ള ഫണ്ടിംഗ്, കഠിനമായ പരീക്ഷണ നിരീക്ഷണങ്ങള്‍ എന്നിവയിലൂടെ അതിശക്തമായൊരു കുതിപ്പിലേക്ക് നീങ്ങുകയാണ് നമ്മുടെ സ്റ്റാര്‍ട്ടപ്പുകള്‍. വ്യവസായ വാണിജ്യ മേഖലകളെ മാത്രമല്ല മനുഷ്യജീവിതവുമായി ബന്ധപ്പെട്ട സമസ്ത മേഖലകളെയും മാറ്റിമറിക്കാന്‍ കെല്‍പുള്ള അതിനൂതനമായ ഇന്നവേഷനാണ് സംസ്ഥാനത്തെ സ്റ്റാര്‍ട്ടപ് മേഖലയില്‍ ഇപ്പോള്‍ നടക്കുന്നത്.

ഡോ. സജി ഗോപിനാഥ്

വ്യത്യസ്ത തരം റോബട്ടുകളുടെ നിര്‍മാണം മുതല്‍ കാന്‍സറിനുള്ള ഔഷധം വരെ വികസിപ്പിക്കുന്ന സംരംഭങ്ങള്‍ കേരളത്തില്‍ സജീവമാണ്. ബിസിനസ് സൊലൂഷനുകള്‍ക്കൊപ്പം തന്നെ സമൂഹത്തിലെ കാതലായ പ്രശ്‌നങ്ങള്‍ക്ക് നൂതന സാങ്കേതികവിദ്യകളിലൂടെ എങ്ങനെ പരിഹാരം കണ്ടെത്താമെന്നതും ഇപ്പോള്‍ സ്റ്റാര്‍ട്ടപ്പുകള്‍ പരിശോധിക്കുന്നു. ”നമ്മുടെ സ്റ്റാര്‍ട്ടപ്പ് ഇക്കോസിസ്റ്റം കുറെക്കൂടി പക്വമായിരിക്കുകയാണ്. മുന്‍പ് വിദ്യാര്‍ത്ഥി സംരംഭകരാണ് ഈ രംഗത്തേക്ക് വന്നിരുന്നതെങ്കില്‍ ഇപ്പോള്‍ വര്‍ഷങ്ങളുടെ പരിചയസമ്പത്തുള്ള അനേകം പ്രൊഫഷണലുകള്‍ കേരളത്തില്‍ സ്റ്റാര്‍ട്ടപ്പുകള്‍ തുടങ്ങുന്നുണ്ട്” കേരളത്തില്‍ മികച്ചൊരു സ്റ്റാര്‍ട്ടപ്പ് ഇക്കോസിസ്റ്റം സൃഷ്ടിക്കാന്‍ വിപ്ലവകരമായ ആശയങ്ങള്‍ ആവിഷ്‌കരിക്കാനും നടപ്പാക്കാനും അശ്രാന്തം പരിശ്രമിക്കുന്ന കേരള സ്റ്റാര്‍ട്ടപ്പ് മിഷന്റെ സി.ഇ.ഒ ഡോ.സജി ഗോപിനാഥ് അഭിപ്രായപ്പെട്ടു. മുന്‍പ് ബാംഗ്ലൂരിലാണ് ഇവര്‍ സ്റ്റാര്‍ട്ടപ്പുകള്‍ തുടങ്ങിയിരുന്നതെങ്കില്‍ ഇപ്പോള്‍ കേരളത്തിലേക്ക് വരുന്നുവെന്ന് മാത്രമല്ല ബാംഗ്ലൂരില്‍ സംരംഭം തുടങ്ങി വിജയിച്ചവര്‍ രണ്ടാമതൊരെണ്ണം തുടങ്ങാന്‍ കേരളം തെരെഞ്ഞെടുക്കുകയും ചെയ്യുന്നു.

ആഴമേറിയ സാങ്കേതിക വിദ്യകള്‍ കേന്ദ്രീകരിച്ച് പ്രവര്‍ത്തിക്കുന്ന സ്റ്റാര്‍ട്ടപ്പുകളുടെ എണ്ണം ഭീമമായ തോതില്‍ വര്‍ധിക്കുന്നുവെന്നതാണ് പുതിയൊരു പ്രവണത. പേറ്റന്റ് രജിസ്റ്റര്‍ ചെയ്ത് തുടങ്ങുന്ന സ്റ്റാര്‍ട്ടപ്പുകളും പേറ്റന്റ് നേടാന്‍ കഴിയുന്ന മികവുറ്റ ആശയങ്ങളുള്ള സ്റ്റാര്‍ട്ടപ്പുകളുമാണ് ഇപ്പോള്‍ കൂടുതലായി രൂപപ്പെടുന്നതെന്നും ഡോ.സജി ഗോപിനാഥ് ചൂണ്ടിക്കാട്ടി. അതിനാല്‍ കേരളത്തിലെ സ്റ്റാര്‍ട്ടപ്പ് മേഖല വലിയൊരു പരിവര്‍ത്തനത്തിന്റെ പാതയിലാണെന്നത് നിസംശയം പറയാം. കഴിഞ്ഞ വര്‍ഷം 28ഓളം പേറ്റന്റുകളാണ് കേരളത്തിലെ സ്റ്റാര്‍ട്ടപ്പ് മേഖലയില്‍ നിന്നും രജിസ്റ്റര്‍ ചെയ്യപ്പെട്ടത്!

സ്റ്റാര്‍ട്ടപ്പ് രംഗത്തുള്ള ഫണ്ടിന്റെ ലഭ്യത വളരെയേറെ വര്‍ധിപ്പിച്ചിട്ടുണ്ടെങ്കിലും അതിന്റെ വിശദാംശങ്ങള്‍ കൃത്യമായി റിപ്പോര്‍ട്ട് ചെയ്യപ്പെടുന്നില്ല. അതിനാല്‍ 2018ല്‍ ഏകദേശം 300 കോടി രൂപയാണെന്ന് ഫണ്ടിംഗ് ഇനത്തില്‍ സംസ്ഥാനത്തെ സ്റ്റാര്‍ട്ടപ്പുകള്‍ക്ക് ലഭിച്ചതെന്ന് കണക്കാക്കപ്പെടുന്നു. വളരെ ഫോക്കസ്ഡായിട്ടുള്ള മേഖലകളിലേക്ക് സംസ്ഥാനത്തെ സ്റ്റാര്‍ട്ടപ്പ് മേഖല ചുവടുറപ്പിക്കാനൊരുങ്ങുകയാണ്. അതിന്റെ ഭാഗമായി തലസ്ഥാനത്തെ സ്‌പെയ്‌സ് പാര്‍ക്കില്‍ മാത്രമല്ല ആയുര്‍വേദ രംഗത്തും പുതിയ ഇന്‍കുബേറ്ററുകള്‍ രൂപീകരിക്കപ്പെടും. മറ്റ് സംസ്ഥാനങ്ങളിലേത് പോലെ കേരളത്തിലും സ്വകാര്യ ഇന്‍കുബേറ്ററുകള്‍ വരുന്നുവെന്നതാണ് മറ്റൊരു തരംഗം. സംസ്ഥാനത്തെ സ്റ്റാര്‍ട്ടപ്പ് മേഖലയില്‍ ഇന്നവേഷന്‍, ഫണ്ടിംഗ് തുടങ്ങിയവയിലൊക്കെ ശ്രദ്ധേയമായിട്ടുള്ള ഏതാനും സ്റ്റാര്‍ട്ടപ്പുകളെ പരിചയപ്പെടാം.