ടൈകോണ്‍ കേരള 2019 ന് സമാപനമായി
ദക്ഷിണേന്ത്യയിലെ ഏറ്റവും വലിയ സംരംഭക സമ്മേളനമായ 'ടൈകോണ്‍കേരള2019' ന് സമാപനമായി. സമ്മേളനത്തിലെ പ്രഭാഷണങ്ങളും മെന്‍ററിംഗ് സെഷനുകളും ചര്‍ച്ചകളും മുഖ്യ ആകര്‍ഷണമായി. വിവിധ മേഖലകളിലുള്ള വിശിഷ്ട വ്യക്തികളുടെ സാന്നിധ്യവും സമ്മേളനത്തിന് തിളക്കം കൂട്ടി. രണ്ടാം ദിവസമായ ശനിയാഴ്ച നടന്ന സെഷനുകള്‍ സംരംഭകര്‍ക്ക് ഉള്‍ക്കാഴ്ച നല്‍കുന്നതായിരുന്നു.
സമാപന ദിവസത്തെ സെഷനുകളില്‍ നിന്ന് :
സുസ്ഥിരമായ സംരംഭകത്വവും വികസന കാഴ്ച്ചപ്പാടും ആസൂത്രണം ചെയ്ത് നടപ്പിൽ വരുത്തുന്ന ലോകമാണ് വരും തലമുറയ്ക്ക് പൈതൃകമായി ലഭിക്കുന്നതെന്ന് അഗ്രിബിസിനസ് ഭീമനായ ഓലം ഇന്റർനാഷണലിന്റെ ചീഫ് എക്സിക്യൂട്ടീവ് ഓഫീസർ സണ്ണി വർഗ്ഗീസ് പറഞ്ഞു.
കാലാവസ്ഥാ വ്യതിയാനം, ജൈവവൈവിധ്യത്തിന്റെ തകർച്ച, സാമൂഹിക അസമത്വം എന്നിവയാണ് ഇന്ന് നാം നേരിടുന്ന പ്രധാന വെല്ലുവിളികൾ. എല്ലാ പ്രകൃതിവിഭവങ്ങളിലും സമ്മർദ്ദം വർദ്ധിച്ചുകൊണ്ടിരിക്കുന്നു. കാലാവസ്ഥാ വ്യതിയാനം കാരണം കൃഷി ചെയ്യാവുന്ന ഭൂമിയുടെ 40 ശതമാനത്തിലധികം ഇതിനകം ദുർബലമാവുകയും ചെയ്തു. മുന്നോട്ടുള്ള ജീവിതത്തിന്, ഈ അടിയന്തിരാവസ്ഥയെ ഒരു വസ്തുതയായി അംഗീകരിച്ച് പോംവഴികൾ തേടണം. കാർബൺ മലിനീകരണ വിമുക്തമായ ലോകം സൃഷ്ടിക്കാൻ സാങ്കേതികവിദ്യക്ക് ഇന്ന് സാധിക്കും, അദ്ദേഹം പറഞ്ഞു.
"ചാക്രികമായ സുസ്ഥിര സമ്പദ്‌വ്യവസ്ഥ വികസിപ്പിക്കുന്നതിന് ആദ്യപടിയാണ് പാഴാക്കൽ തടയുന്നത്. പാഴാക്കുന്നതാണ് ആദ്യത്തെ മാലിന്യം. പുനരുപയോഗം, , വീണ്ടെടുക്കൽ, നീക്കംചെയ്യൽ എന്നിവ പിന്നീട് ശ്രദ്ധ ചെലുത്തേണ്ടതാണ്. . ജീവിതത്തിന്റെ അടിസ്ഥാന ഭക്ഷണം പാഴാക്കുന്നത് തടയുന്നതിൽ പോലും നമ്മൾ പരാജയപ്പെടുന്നു. 870 ദശലക്ഷം ആളുകൾ ദിവസവും പട്ടിണി കിടക്കുമ്പോഴാണ് ഇത് സംഭവിക്കുന്നത്. കൂടാതെ ഭാവിയിൽ രാജ്യങ്ങൾക്ക് അവരുടെ ജനസംഖ്യയെ പോറ്റാൻ കഴിയാത്ത സ്ഥിതിയിലേക്ക് ഭക്ഷണരീതിയിലെ മാറ്റങ്ങൾ നമ്മെ കൊണ്ടുപോകുന്നു", സണ്ണി വർഗ്ഗീസ് പറഞ്ഞു. വേൾഡ് ബിസിനസ് കൗൺസിൽ ഫോർ സസ്റ്റെയിനബിൾ ഡവലപ്മെന്റിന്റെ (ഡബ്ല്യു.ബി.സി.എസ്. ഡി) ചെയർമാൻ എന്ന നിലയിൽ, യുഎന്നിന്റെ സുസ്ഥിര വികസന ലക്ഷ്യങ്ങൾ അനുസരിച്ച് ബിസിനസ്സിനെ എങ്ങനെ കാര്യക്ഷമമാക്കാനും കഴിയും എന്നതിനെക്കുറിച്ചും അദ്ദേഹം വിശദീകരിച്ചു.
വിദ്യാഭ്യാസ മേഖലയിലെ ഭാവി അവസരങ്ങളെയും വെല്ലുവിളികളെയും കുറിച്ചുള്ള പാനൽ ചർച്ചകൾക്ക് എമർജിംഗ് മാർക്കറ്റ്സ് ഡയറക്ടർ ആനന്ദ് എം ചാൾസ് , രവീന്ദ്രനാഥ് കമ്മത്ത് എന്നിവർ നേതൃത്വം നൽകി. അദ്ധ്യാപനത്തിലേക്ക് മികച്ച പ്രതിഭകളെ ആകർഷിക്കുക, വ്യക്തിഗത ശ്രദ്ധ നൽകുന്നതിലെ അപര്യാപ്തതകൾ പരിഹരിക്കാൻ കഴിയുന്ന സാങ്കേതികവിദ്യകൾ, റിക്രൂട്ട്‌മെന്റിന്റെ മാനദണ്ഡങ്ങളിലും രീതികളിലും വരുത്തേണ്ട മാറ്റങ്ങൾ എന്നിവ സെഷൻ ചർച്ച ചെയ്തു.