വാഴക്കൃഷിയും നിക്ഷേപവും പിന്നെ റിസ്‌കും...

ശ്രീകാന്ത് വാഴയില്‍

കൃഷി ഞാന്‍ ചെയ്യുന്നില്ലെങ്കിലും എന്തോ കൃഷിക്കാരോട് പണ്ടേ ഭയങ്കര ബഹുമാനമാണ്. അതുകൊണ്ടു തന്നെയാണ് ഒരിക്കല്‍ എന്റെ ഓഫീസില്‍ ഒരു വാഴക്കൃഷിക്കാരന്‍ വന്നപ്പോള്‍ അദ്ദേഹത്തോട് ഇരിക്കാന്‍ പറഞ്ഞതും കാര്യങ്ങള്‍ ചോദിച്ചറിഞ്ഞതും. എന്തുകൊണ്ടാണെന്നല്ലേ?, ഈ ലോക ത്തില്‍ ഉപജീവനത്തിന് മറ്റെന്തെല്ലാം ജോലിയുണ്ടായിട്ടും അതെല്ലാം വിട്ടു വാര്‍ധക്യത്തില്‍ പോലും ഇത്രയധികം റിസ്‌കിയായ, ഇറക്കിയ പണം തിരിച്ചുകിട്ടുമെന്നു ഒരുറപ്പുമില്ലാത്ത കൃഷി തെരഞ്ഞെടുത്തു ചെയ്യുന്നതുകൊണ്ട്.

ഒരിക്കലെങ്കിലും ചിന്തിച്ചു നോക്കിയിട്ടുണ്ടോ, ഒരു ശരാശരി കര്‍ഷകന്‍ കൃഷിയിലെ വിവിധ ഘട്ടങ്ങളിലെടുക്കുന്ന റിസ്‌കിനെക്കുറിച്ച്? ഉദാഹരണത്തിന് വാഴക്കൃഷി തന്നെയെടുക്കാം. ഒരു വാഴത്തൈ നട്ട് അത് കുലച്ചു വാഴക്കുല വെട്ടിയെടുത്തു കടയില്‍ കൊടുത്തു പണം സ്വന്തം കീശയിലാകുന്നത് വരെയുള്ള വിവിധ ഘട്ടങ്ങളില്‍ ആ കര്‍ഷകനു നേരിടേണ്ടി വരുന്ന നഷ്ടസാധ്യതകള്‍ (RISK) കുറച്ചൊന്നുമല്ല.

തൈയുടെ ചുവട്ടില്‍ ഒഴിക്കുന്ന വെള്ളം കൂടിയാലും കുറഞ്ഞാലും തൈ കേടായിപ്പോവും. ഇനി മുളച്ചു വന്നശേഷം അത് പശുവോ, ആടോ, കോഴിയോ തിന്നാതെ നോക്കണം. കുറച്ചങ്ങു വളര്‍ന്ന ശേഷം തണ്ടു തുരപ്പന്‍ പുഴു കുത്താതെ നോക്കണം, പോട്ടെ വാഴ കുലച്ചു വരുന്നതിനു മുന്‍പായി തന്നെ മഹാളി രോഗം പോലുള്ളവ പിടിക്കാതെ നോക്കണം. കുലച്ചതിന് ശേഷം അത് വെട്ടുന്നതുവരെ വാഴ വീഴാതെ നോക്കണം.

ഓരോ കൃഷിയിലും വളര്‍ച്ചയുടെ വിവിധഘട്ടങ്ങളില്‍ ഇത്രയധികം റിസ്‌ക് ഉണ്ടെന്നറിഞ്ഞിട്ടും ഇവരെല്ലാം വാഴക്കൃഷി വളരെ ആനന്ദത്തോടെ ചെയ്യുന്നു. ആരും കൃഷിയിലെ റിസ്‌ക് കണ്ടിട്ട് ഇനി മുതല്‍ കൃഷി വേണ്ട എന്ന് തീരുമാനിച്ചിട്ടില്ല. എന്തായിരിക്കും ഇതിന്റെ ഗുട്ടന്‍സ്?

ജീവിതത്തില്‍ നമ്മള്‍ കഷ്ടപ്പെട്ട് അധ്വാനിച്ചുണ്ടാക്കിയ പണം നിക്ഷേപി
ക്കാനൊരുങ്ങുമ്പോള്‍ റിസ്‌ക് എന്ന് കേട്ട് പേടിക്കാറില്ലേ?, നിങ്ങള്‍ക്കറിയാമോ മ്യൂച്ചല്‍ഫണ്ടിലോ ഓഹരിയിലോ നിക്ഷേപിക്കുന്നതിനേക്കാള്‍ പതിന്മടങ്ങു റിസ്‌കാണ് കൃഷിയില്‍ ഒരു ശരാശരി കര്‍ഷകന്‍ നേരിടുന്നത്. എന്നിട്ടെന്തേ ആരും ഭയക്കാത്തത്?, എന്തേ കൃഷി ഉപേക്ഷിക്കാത്തത്? എങ്ങനെയാണ് ഇവര്‍ റിസ്‌ക് സമര്‍ഥമായി തരണം ചെയ്യുന്നത്?

റിസ്‌ക് നേരിടാനുള്ള വഴി അതിന്റെ രഹസ്യമറിയേണ്ടേ?, രഹസ്യമിതാണ്. വാഴകൃഷിയില്‍ വരാന്‍ പോകുന്ന എല്ലാ ഭാവി പ്രശ്‌നങ്ങളും (Future outcomes) കൃഷിക്കാരന്‍ മുന്‍കൂട്ടി അറിഞ്ഞു വച്ചിട്ടുണ്ട്. ഉദാ: യഥാസമയത്തുള്ള ജലസേചനം, തണ്ടുതുരപ്പന്‍ പുഴു ആക്രമണം, മഹാളി രോഗം, വാഴ മറിഞ്ഞു വീഴല്‍ ലരേ. ഇനി ഇവയോരോന്നിനുമുള്ള പ്രതിവിധികള്‍ യഥാസമയത്തു തന്നെ ചെയ്യാന്‍ മാത്രം കൃഷിക്കാരന്‍ ശ്രദ്ധിച്ചാല്‍ മതി.

ഇനി നിങ്ങളുടെ നിക്ഷേപത്തിലേക്കു വരാം, നിക്ഷേപിക്കുന്നത് ഏതു അസറ്റ് ക്ലാസ്സിലുമായിക്കൊള്ളട്ടെ (ഉദാ: മ്യൂച്വല്‍ ഫണ്ട്, ഗോള്‍ഡ്, റിയല്‍ എസ്റ്റേറ്റ്, ഫിക്‌സഡ് ഡെപ്പോസിറ്റ്) ഓരോ അസറ്റ് ക്ലാസ്സിനും അതിന്റേതായ റിസ്‌ക് ഉണ്ട്. ഓരോന്നിലും നിക്ഷേപിച്ചാല്‍ വന്നേക്കാവുന്ന ഭാവി സാധ്യതകള്‍ മുന്‍കൂട്ടി അറിഞ്ഞിരിക്കുക എന്നുള്ളതാണ് പ്രധാനം. അതുകൊണ്ടു തന്നെയാണ് വാറന്‍ ബഫറ്റ് ഒരിക്കല്‍ പറഞ്ഞത് 'Risk comes from not knowing what you're doing'.
എന്നാല്‍ ഭൂരിഭാഗം വരുന്ന നിക്ഷേപകരും നിക്ഷേപത്തിന് മുന്‍പ് റിസ്‌കിനെക്കുറിച്ചു ബോധവാന്മാരല്ല. ഇനി മറ്റു ചിലരാകട്ടെ റിസ്‌കിനെ (ഞകടഗ) അനിശ്ചിതാവസ്ഥയായി തെറ്റിദ്ധരിക്കുന്നു (uncertainty). റിസ്‌ക് ഒരിക്കലും അനിശ്ചിതാവസ്ഥയല്ല എന്നോര്‍ക്കുക. റിസ്‌കിനെ നിങ്ങള്‍ക്കു നിയന്ത്രിക്കാനും അളക്കാനും കഴിയും. പക്ഷെ അനിശ്ചിതാവസ്ഥയെ ഒരിക്കലും സാധിക്കില്ല.

മ്യൂച്വല്‍ ഫണ്ട് അല്ലെങ്കില്‍ ഓഹരി നിക്ഷേപം എന്ന് കേള്‍ക്കുമ്പോഴേ
ഏതൊരു സാധാരണക്കാരന്റെയും മനസില്‍ ആദ്യം ഓടിയെത്തുന്നത് 'മ്യൂച്വല്‍ ഫണ്ട് നിക്ഷേപം ഓഹരിവിപണിയിലെ ലാഭ നഷ്ടങ്ങള്‍ക്കു വിധേയമാണ്' എന്ന വാചകമായിരിക്കും. ഇവിടെ ഈ റിസ്‌കിനെ ഭയന്നാണ് ഭൂരിഭാഗം ആളുകളും മ്യൂച്വല്‍ ഫണ്ട് നിക്ഷേപത്തില്‍ നിന്നും പിന്തിരിഞ്ഞുനില്‍ക്കുന്നത്. മറ്റേതൊരു നിക്ഷേപത്തേക്കാളും മികച്ച നേട്ടം കാലാകാലങ്ങളായി മ്യൂച്വല്‍ ഫണ്ടുകള്‍ നല്‍കിയിട്ടുണ്ടെന്ന കാര്യത്തില്‍ ആര്‍ക്കും തര്‍ക്കമില്ലാതിരുന്നിട്ടുകൂടി ഓരോ നിക്ഷേപകനും ഭയക്കുന്ന മ്യൂച്വല്‍ ഫണ്ടിലെ പ്രധാന റിസ്‌ക് ആണ് മാര്‍ക്കറ്റ് റിസ്‌ക് (Market Risk). നമ്മുടെ കര്‍ഷകന്‍ കൃഷിയിലെ റിസ്‌ക് മറികടന്നപോലെ ഇവിടെ നമ്മള്‍ ഇതിനെ ഏതു മരുന്നുകൊണ്ട് നേരിടും?

ഏതൊരു നിക്ഷേപത്തെയും പൊതുവായി വിലയിരുത്തുന്നത് അതിലെ
റിസ്‌ക്, റിവാര്‍ഡിനനുസരിച്ചാണ്. നിക്ഷേപത്തില്‍ എത്രത്തോളം റിസ്‌ക് കൂടുന്നുവോ അത്രത്തോളം തന്നെ ഉയര്‍ന്ന നേട്ടം നല്‍കാന്‍ പ്രസ്തുത നിക്ഷേപത്തിന് പ്രാപ്തിയുണ്ടായിരിക്കും. എന്നാല്‍ നിക്ഷേപകനെ സംബന്ധിച്ചിടത്തോളം ഈ റിസ്‌ക് മാനേജ് ചെയ്യുക എന്നത് പ്രധാന വെല്ലുവിളി തന്നെയാണ്.

മ്യൂച്വല്‍ ഫണ്ട് നിക്ഷേപത്തിലെ ചില തന്ത്രങ്ങള്‍

ഏതൊരു നിക്ഷേപകനും ആയാസരഹിതമായി മ്യൂച്വല്‍ ഫണ്ട് നിക്ഷേപത്തിലെ റിസ്‌ക് കൈകാര്യം ചെയ്യാന്‍ സഹായിക്കുന്ന ചില തന്ത്രങ്ങള്‍ ഇതാ

1. അസറ്റ് അലോക്കേഷന്‍ ( Asset Allocation )

ഒരു നിര്‍ദിഷ്ട സാമ്പത്തിക ലക്ഷ്യം നേടുന്നതിനു വേണ്ടി നിങ്ങളുടെ നിക്ഷേപ പോര്‍ട്ട്‌ഫോളിയോയെ നിങ്ങളുടെ സാമ്പത്തിക സ്ഥിതി, വരുമാനം, വയസ്, റിസ്‌ക് എടുക്കാനുള്ള ശേഷി എന്നിവയെ അടിസ്ഥാനമാക്കി ഇക്വിറ്റി, ബോണ്ട്, കാഷ്, ഗോള്‍ഡ് എന്നീ വിവിധ തരം ആസ്തി ക്ലാസ്സുകളായി വിഭജിച്ചു വിന്യസിക്കുന്ന പ്രക്രിയ ആണ് അസറ്റ് അലോക്കേഷന്‍. നിങ്ങളുടെ പോര്‍ട്ട്‌ഫോളിയോയുടെ വിജയത്തിലെ സുപ്രധാന ഘടകമാണിത്.

എങ്ങനെയായിരിക്കും ഒരു കൃഷിക്കാരന്‍ താന്‍ ഏതു വിളയാണ് കൃഷി ചെയ്യാന്‍ പോകുന്നതെന്ന തീരുമാനമെടുക്കുന്നത്? കൃഷിക്ക് മുന്‍പുതന്നെ വിളവ് ലഭിക്കാനുള്ള കാലദൈര്‍ഘ്യത്തിന്റെയും, മൂല്യത്തിന്റെയും അടിസ്ഥാനത്തിലല്ലേ വിത്ത് തെരഞ്ഞെടുക്കുന്നത്?. ചീരകൃഷിയില്‍ വിളവ് ഒരു മാസംകൊണ്ട് കിട്ടുമെങ്കില്‍, വാഴക്കൃഷിയില്‍ വിളവിനു ഒരു വര്‍ഷമെടുക്കും. എന്നാല്‍ നടുന്നത് തെങ്ങാണെങ്കില്‍ വിളവ് ലഭിക്കാന്‍ ചുരുങ്ങിയത് 10 വര്‍ഷമെടുക്കും. എന്നാല്‍ നാളികേര കൃഷിയില്‍ മറ്റു കൃഷിയില്‍ നിന്ന് വിഭിന്നമായി പിന്നീടങ്ങോട്ട് പരിപാലനമൊന്നുമില്ലാതെതന്നെ ദീര്‍ഘകാലത്തേയ്ക്കു വിളവ് ലഭിച്ചുകൊണ്ടിരിക്കും. ഇതുപോലെ തന്നെയാണ് അസറ്റ് അലോക്കേഷനും ചെയ്യേണ്ടത്. ഡെറ്റ് / ബോണ്ട് ഫണ്ടുകളേക്കാള്‍ ഉയര്‍ന്ന നേട്ടം ഇക്വിറ്റി ഫണ്ടുകളില്‍ ലഭിക്കുമെന്ന് കരുതി നിങ്ങളുടെ നിക്ഷേപം മുഴുവനായി അതില്‍ നിക്ഷേപിക്കരുത്. നിങ്ങളുടെ സാമ്പത്തിക ലക്ഷ്യത്തിലേക്കുള്ള സമയദൈര്‍ഘ്യം, സാമ്പത്തിക സ്ഥിതി, വരുമാനം, വയസ് എന്നിവയ്ക്കനുസൃതമായി വേണം ഇക്വിറ്റി, ബോണ്ട്, കാഷ്, ഗോള്‍ഡ് എന്നീ അസറ്റ് ക്ലാസ്സിലേക്കുള്ള വിന്വയം.

2. പോര്‍ട്ട്‌ഫോളിയോ വൈവിധ്യവല്‍ക്കരണം (Portfolio Diversification )-

ഒരേ അസറ്റ് ക്ലാസ്സില്‍ തന്നെയുള്ള നിക്ഷേപത്തില്‍ പൂര്‍ണമായി നിക്ഷേപിക്കാതെ വിവിധതരം സെക്ടറുകളിലായോ, കമ്പനികളിലായോ നിക്ഷേപങ്ങള്‍ തെരഞ്ഞെടുക്കുന്ന പ്രക്രിയയാണ് പോര്‍ട്ട്‌ഫോളിയോ വൈവിധ്യവല്‍ക്കരണം. മാര്‍ക്കറ്റ് വ്യതിയാനങ്ങളുടെ ആഘാതം കുറയ്ക്കുന്നതില്‍ വൈവിധ്യവല്‍ക്കരണം വളരെയധികം സഹായിക്കുന്നു. കണ്ടിട്ടില്ലേ കൃഷിക്കാരന്‍ ഒരു വിളയെ മാത്രം ആശ്രയിക്കാതെ അതിനൊപ്പം ഇടവിളയും ദീര്‍ഘകാല വിളയും ഉള്‍പ്പെടുത്തി കൃഷി ചെയ്യുന്നത്? അതിലൂടെ യഥാര്‍ത്ഥ വിളയുടെ നഷ്ടസാധ്യതയാണ് കുറയ്ക്കുന്നത്.

നിങ്ങള്‍ ഒരു കമ്പനിയുടെ ഓഹരിയില്‍ മാത്രം നിക്ഷേപിക്കുകയാണെങ്കില്‍, റിസ്‌ക് വളരെ കൂടുതലും നിക്ഷേപത്തിന്റെ വളര്‍ച്ച പ്രസ്തുത കമ്പനിയുടെ പ്രകടനത്തെ മാത്രം ആശ്രയിച്ചുമായിരിക്കും. ഇത് നമ്മുടെ നിക്ഷേപ മൂല്യത്തില്‍ വ്യാപകമായി ചാഞ്ചാട്ടമുണ്ടാക്കും. പകരം, നിങ്ങള്‍ 10 വിവിധ വ്യവസായ മേഖലകളിലെ 20 കമ്പനികളില്‍ ഓഹരികള്‍ വാങ്ങുകയാണെങ്കില്‍, നിങ്ങള്‍ ഗണ്യമായ നഷ്ടത്തിനുള്ള സാധ്യത കുറയ്ക്കുകയാണ്. എന്തെന്നാല്‍ ഇത് മോശം പ്രകടനക്കാരനെ ഓഫ്‌സെറ്റ് ചെയ്യാന്‍ സഹായിക്കും. ഇക്വിറ്റി മ്യൂച്വല്‍ ഫണ്ടുകളില്‍ വിവിധ വ്യവസായ മേഖലകളിലായുള്ള ഓഹരികളിലുള്ള നിക്ഷേപം വഴി വൈവിധ്യവല്‍ക്കരണം സാധ്യമാവുന്നു.

3. SIP ഉപയോഗിക്കൂ, മാര്‍ക്കറ്റ് വ്യതിയാനങ്ങളെ ചങ്ങാതിയാക്കി മാറ്റൂ

വിപണിയിലെ എല്ലാ അസ്ഥിരമായ അവസരങ്ങളെയും നേട്ടമാക്കി മാറ്റുവാന്‍ SIP (Systematic Investment Plan) വഴിയുള്ള നിക്ഷേപത്തിന് സാധിക്കും. കൃത്യമായ തുക കൃത്യമായ ഇടവേളകളില്‍ മാര്‍ക്കറ്റ് ലെവല്‍ പരിഗണിക്കാതെ തെരഞ്ഞെടുത്ത സ്‌കീമുകളില്‍ നിക്ഷേപിക്കുന്നത് വഴി റുപ്പീ കോസ്റ്റ് ആവറേജിംഗ് സാധ്യമാകുന്നു. ഓരോ വിപണി വ്യതിയാനത്തിലും നിക്ഷേപകന് കൂടുതല്‍ യൂണിറ്റ്‌സ് ലഭിക്കുന്നത് വഴി റുപ്പീ കോസ്റ്റ് ആവറേജിംഗ് സാധ്യമാകുന്നു, അതുവഴി നിങ്ങളുടെ നിക്ഷേപത്തിന്റെ വ്യതിയാനങ്ങളെ കുറയ്ക്കാനും അതിനെ നേട്ടമാക്കാനും SIP കള്‍ സഹായിക്കുന്നു.

മ്യൂച്വല്‍ ഫണ്ട് / ഓഹരിയില്‍ നിക്ഷേപവുമായി ബന്ധപ്പെട്ട് ഇനിയും ഒരുപാടു റിസ്‌കുകള്‍ ഉണ്ടെങ്കിലും (Liquidity Risk, Interest Rate Risk, Credit Risk, Concentration Risk) അവയ്ക്കെല്ലാം വ്യക്തമായ പ്രതിവിധികളുമുണ്ട്. അവയെല്ലാം വിദഗ്ധനായ ഒരു ഫിനാന്‍ഷ്യല്‍ അഡൈ്വസറുടെ സഹായത്തോടെ നമ്മള്‍ക്ക് നേരിടാവുന്നതേയുള്ളൂ. ഓര്‍ക്കുക റിസ്‌ക് എന്നത് ഒരിക്കലും അസ്ഥിരതയല്ല. നമ്മുടെ കൃഷിക്കാരന്‍ മ്യൂച്വല്‍ ഫണ്ടിനെക്കാളും എത്രയോ മടങ്ങു റിസ്‌ക് ഉള്ള കൃഷി അനായസേന നേരിട്ടിട്ടുണ്ടെങ്കില്‍ നമ്മളേവര്‍ക്കും സാധിക്കാവുന്നതേയുള്ളൂ.