കോവിഡ് ആശങ്ക വീണ്ടും; ഓഹരി ഫണ്ടുകൾക്കു വീണ്ടും പ്രിയം; ലാഭം ഇരട്ടിപ്പിക്കാൻ 12 കമ്പനികൾ; വാഹന വിപണിക്കു സ്പീഡ് കുറഞ്ഞു

കോവിഡ് രോഗികളുടെ എണ്ണത്തിൽ ഉണ്ടാകുന്ന ഞെട്ടിക്കുന്ന വർധനയിൽ വിപണികൾ ഞെട്ടുന്നില്ല. ഡസൻ കണക്കിനു പേർക്കു രോഗം പിടിച്ചിരുന്നപ്പോൾ സർവനാശകാരിയായ ലോക്ക് ഡൗൺപ്രഖ്യാപിച്ചവർ ലക്ഷങ്ങൾക്കു ദിവസേന രോഗം പിടിക്കുന്ന ഈയവസരത്തിൽ പറയുന്നു, ലോക്ക് ഡൗൺ വേണ്ട പരിശോധന മതി എന്ന്. മൊത്തം അടച്ചിടുന്നില്ല എന്നതു വിപണിക്കും ആശ്വാസകരമാണ്. എങ്കിലും സാമ്പത്തിക വളർച്ച തിരിച്ചു വരുന്നതിന് കോവിഡിൻ്റെ വർധിത വീര്യത്തോടെയുള്ള വ്യാപനം തടസമാകും എന്നു ദിവസേന വ്യക്തമായി വരികയാണ്. അത് വിപണിയിലും പ്രതിഫലിക്കും. വ്യാഴാഴ്ച രാവിലെ അവസാനിച്ച 24 മണിക്കൂറിൽ 1.27 ലക്ഷം പേർ രാജ്യത്തു കോവിഡ് ബാധിതരായി. ഇന്നും രോഗബാധ വർധിക്കുമെന്നാണു സൂചന. ഏറ്റവുമധികം പേർക്കു രോഗം പിടിക്കുന്ന രാജ്യമാണ് ഇന്ത്യ ഇപ്പോൾ.