മഹാ ചുഴലിക്കാറ്റിന്റെ നിഴല് കേരളത്തിലും
അറബിക്കടലില് മഹാ ചുഴലിക്കാറ്റ് രൂപപ്പെട്ടതായി കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ലക്ഷദ്വീപില് അതീവ ജാഗ്രത പ്രഖ്യാപിച്ചു. കേരളത്തിലും ജാഗ്രതാനിര്ദേശമുണ്ട്. ദുരന്തനിവാരണ അതോറിറ്റിയുടെ നിര്ദേശങ്ങള് പൊതുജനങ്ങള് കര്ശനമായി പാലിക്കണമെന്ന് മുഖ്യമന്ത്രി ആവശ്യപ്പെട്ടു.
അറബിക്കടലില് ലക്ഷദ്വീപ് മേഖലയില് രൂപം കൊണ്ട അതിതീവ്ര ന്യൂനമര്ദമാണ് ചുഴലിക്കാറ്റായി ശക്തിപ്രാപിച്ചിരിക്കുന്നത്. മണിക്കൂറില് 85 കിലോമീറ്റര് വരെ വേഗതയില് കാറ്റ് വീശുമെന്നാണ് മുന്നറിയിപ്പ്. ഉച്ചയോടെ ചുഴലിക്കാറ്റ് അതിതീവ്ര ചുഴലിക്കാറ്റാകും.
കേരളം മഹാ ചുഴലിക്കാറ്റിന്റെ സഞ്ചാരപഥത്തിലില്ലെങ്കിലും കേരള തീരത്തോട് ചേര്ന്ന കടല് പ്രദേശത്ത് രൂപം കൊണ്ടിരിക്കുന്ന ചുഴലിക്കാറ്റിന്റെ പ്രഭാവം കേരളത്തിലും ഉണ്ടാകാനിടയുള്ളതിനാലാണ് സംസ്ഥാനത്തും ജാഗ്രതാ നിര്ദേശമുള്ളത്. കടല് പ്രക്ഷുബ്ധമായതിനാല് മത്സ്യബന്ധനത്തിന് പോകുന്നത് വിലക്കി. കടല് തീരത്ത് പോകുന്നതും ഒഴിവാക്കേണ്ടതാണ്.