സാമൂഹ്യ സംരംഭകരെ കണ്ടെത്തുന്നതിനുള്ള ദിശ പ്രോഗ്രാമിന് അപേക്ഷ ക്ഷണിച്ചു

ഐഐടി പാലക്കാടും ബ്യൂമര്‍ക്ക് ഇന്ത്യ ഫൗണ്ടേഷനും സഹകരിച്ചുള്ള പദ്ധതി
startup india
startupscanva
Published on: 

സാമൂഹിക പ്രശ്‌നങ്ങള്‍ക്ക് സാങ്കേതിക വിദ്യാധിഷ്ഠിതമായ പരിഹാരങ്ങള്‍ ഒരുക്കുന്ന സംരംഭകരെ പ്രോത്സാഹിപ്പിക്കുന്നതിനായി ഐഐടി പാലക്കാട് ടെക്‌നോളജി ഐഹബ് ഫൗണ്ടേഷന്‍ അപേക്ഷ ക്ഷണിച്ചു. കേന്ദ്ര ശാസ്ത്ര-സാങ്കേതിക വകുപ്പിന്റെ പിന്തുണയോടെ പ്രവര്‍ത്തിക്കുന്ന IPTIF, ബ്യൂമര്‍ക്ക് ഇന്ത്യ ഫൗണ്ടേഷനുമായി സഹകരിച്ചാണ് ദിശ (DISHA - Driving Innovative Solutions for Humanitarian Advancement) എന്ന പേരില്‍ ഈ പദ്ധതി നടപ്പാക്കുന്നത്.

ആരോഗ്യം, ഗ്രാമവികസനം, സുസ്ഥിരത, വിദ്യാഭ്യാസ സമത്വം, ഡിജിറ്റല്‍ സാക്ഷരത തുടങ്ങിയ മേഖലകളിലെ വെല്ലുവിളികള്‍ക്ക് പരിഹാരം കാണുന്ന നൂതന ആശയങ്ങള്‍ക്കാണ് ഈ പ്രോഗ്രാം ഊന്നല്‍ നല്‍കുന്നത്. സാങ്കേതിക ഉപദേശം, ബിസിനസ് മാര്‍ഗനിര്‍ദ്ദേശം, സാമ്പത്തിക സഹായം എന്നിവയിലൂടെ സാമൂഹ്യ സംരംഭങ്ങളെ വളര്‍ത്തിയെടുക്കുകയാണ് ഈ പദ്ധതിയുടെ ലക്ഷ്യം.

രണ്ട് വിഭാഗങ്ങളിലേക്ക്

ബ്യൂമര്‍ക്ക് നവ ദിശ പുരസ്‌കാരം (Buimerc Nava DISHA Puraskaram): സമൂഹത്തില്‍ വലിയ സ്വാധീനം ചെലുത്തിയ മൂന്ന് സാമൂഹ്യ സംരംഭകരെ ഈ പുരസ്‌കാരത്തിനായി തിരഞ്ഞെടുക്കും. ഇവര്‍ക്ക് സാമ്പത്തിക സഹായവും തങ്ങളുടെ സംരംഭം കൂടുതല്‍ വികസിപ്പിക്കുന്നതിനുള്ള പിന്തുണയും ലഭിക്കും.

ദിശ എന്‍ട്രപ്രണര്‍-ഇന്‍-റെസിഡന്‍സ് ഫെലോഷിപ്പ്: സാമൂഹിക പ്രാധാന്യമുള്ള സാങ്കേതികവിദ്യകള്‍ വികസിപ്പിക്കുന്ന പത്ത് പുതിയ സംരംഭകരെയാണ് ഈ ഫെലോഷിപ്പിനായി തിരഞ്ഞെടുക്കുന്നത്. ഫെലോഷിപ്പ് ലഭിക്കുന്നവര്‍ക്ക് പ്രത്യേക പരിശീലനം, പ്രോട്ടോടൈപ്പ് നിര്‍മാണത്തിനുള്ള സാമ്പത്തിക സഹായം, ഐഐടി പാലക്കാടിന്റെ അത്യാധുനിക ലാബുകളും സൗകര്യങ്ങളും ഉപയോഗിക്കാനുള്ള അവസരം എന്നിവ ലഭിക്കും. കേരളത്തിലെ സാമൂഹ്യ മാറ്റത്തിന് സംഭാവന നല്‍കാന്‍ ആഗ്രഹിക്കുന്ന യുവ സംരംഭകര്‍ക്ക് ഈ പദ്ധതി വലിയൊരു അവസരമാണ്.

അപേക്ഷകള്‍ സമര്‍പ്പിക്കാനുള്ള അവസാന തീയതി 2025 ഒക്ടോബര്‍ 20 ആണ്. കൂടുതല്‍ വിവരങ്ങള്‍ക്കും അപേക്ഷ സമര്‍പ്പിക്കാനും സന്ദര്‍ശിക്കുക. https://iptif.tech/entrepreneurship-development

Read DhanamOnline in English

Subscribe to Dhanam Magazine

```html ```