കാര്‍ വാങ്ങാം, ഈ ബാങ്കുകള്‍ നല്‍കും കുറഞ്ഞ നിരക്കില്‍ വായ്പ
വിവിധ ബാങ്കുകളുടെ നിരക്കുകള്‍ നോക്കാം
Image by Canva
പുതുവര്‍ഷത്തിലേക്ക് ഇനി ദിവസങ്ങള്‍ ശേഷിക്കെ കാര്‍ വാങ്ങാന്‍ ആഗ്രഹിക്കുന്നവരെ ലക്ഷ്യമിട്ട് ഓഫറുകളുമായി എത്തിയിരിക്കുകയാണ് ബാങ്കുകള്‍. ഉത്സവകാല ഓഫറുകളായി അവതരിപ്പിച്ച ഈ ഓഫറുകള്‍ പലതും ഡിസംബര്‍ വരെയാണ് ലഭിക്കുക. 8.65 ശതമാനം മുതല്‍ പലിശ നിരക്കില്‍ ബാങ്കുകള്‍ വായ്പകള്‍ നല്‍കുന്നുണ്ട്. വിവിധ പൊതുമേഖലാ ബാങ്കുകളുടേയും സ്വകാര്യ ബാങ്കുകളുടേയും കാര്‍ വായ്പ നിരക്കുകള്‍ നോക്കാം.
കുറവ് പലിശ
ഫ്‌ളെക്‌സിയായ ഇ.എം.ഐ ഓപ്ഷനും എസ്.ബി.ഐ നല്‍കുന്നു. രണ്ട് ഓപ്ഷനുകളാണ് ഉള്ളത്. 36 മാസ കാലാവധിയുള്ള വായ്പകള്‍ക്ക് ആദ്യ ആറ് മാസം റഗുലര്‍ ഇ.എം.ഐയുടെ പകുതി നല്‍കുന്നതാണ് ഒരു ഓപ്ഷന്‍. രണ്ടാമത്തേതില്‍ 60 മാസ കാലാവധിയുള്ള വായ്പകള്‍ക്ക് ആദ്യ ആറ് മാസം റഗുലര്‍ ഇ.എം.ഐയുടെ 50 ശതമാനവും പിന്നീടുള്ള ആറ് മാസം റഗുലര്‍ ഇ.എം.ഐയുടെ 75 ശതമാനവും അടച്ചാല്‍ മതി. ഇലക്ട്രിക് കാറുകള്‍ക്ക് 8.65 ശതമാനം മുതല്‍ 9.35 ശതമാനം വരെയാണ് പലിശ നിരക്ക്.
8.70 മുതല്‍ 11.95 ശതമാനം വരെയാണ് കനറ ബാങ്ക് വാഹന വായ്പകളുടെ പലിശ. ഡിസംബര്‍ 31 വരെ വായ്പകളുടെ പ്രോസസിംഗ് ചാര്‍ജ് കനറ ബാങ്ക് ഒഴിവാക്കിയിട്ടുണ്ട്. ഇലക്ട്രിക് വാഹനങ്ങള്‍ക്ക് 9.05 ശതമാനം മുതല്‍ 11.95 ശതമാനം വരെയാണ് പലിശ.
ബാങ്ക് ഓഫ് ഇന്ത്യയില്‍ 8.75 ശതമാനം മുതല്‍ 10.75 ശതമാനം വരെയാണ് വാഹന വായ്പകള്‍ക്ക് പലിശ. നിലവിൽ പ്രോസസിംഗ് ചാര്‍ജ് പൂര്‍ണമായും ഒഴിവാക്കിയിട്ടുണ്ട്.പുതിയ വാഹനങ്ങള്‍ക്ക് വാഹന വിലയുടെ 90 ശതമാനം വരെ വായ്പ ലഭിക്കും. 84 മാസം വരെയാണ് വായ്പാ കാലാവധി
ഐ.ഡി.ബി.ഐ ബാങ്ക് 8.75 ശതമാനം മുതല്‍ 9.55 വരെ പലിശയാണ് വാഹന വായ്പകള്‍ക്ക് ഈടാക്കുന്നത്. 2,500 രൂപയാണ് ബാങ്ക് പ്രോസസിംഗ് ഫീസ് ഈടാക്കുന്നത്.
പഞ്ചാബ് ആന്‍ഡ് സിന്ധ് ബാങ്കിന് 8.85 ശതമാനം മുതല്‍ 10.25 ശതമാനം വരെയാണ് പലിശ. പി.എസ്.ബി അപ്‌ന വാഹന്‍ സുഗം പദ്ധതി വഴി വായ്പയെടുക്കുന്നവര്‍ക്ക് പ്രോസസിംഗ് ഫീസില്‍ 50 ശതമാനം കിഴിവും ലഭിക്കും.