ഇന്ത്യയുടെ വാഹന മേഖലയില് പുതിയൊരു അധ്യായത്തിന് തുടക്കമിട്ട് ഫ്ളക്സ് ഫ്യുവല് വാഹനങ്ങള് വിപണിയിലേക്ക്. പെട്രോളിനൊപ്പം ഉയര്ന്ന അളവില് എഥനോള് കലര്ന്ന ഇന്ധനവും ഉപയോഗിക്കാന് കഴിയുന്ന വാഹനങ്ങളാണ് ഫ്ളക്സ് ഫ്യുവല് വാഹനങ്ങള്. രാജ്യത്ത് ആദ്യമായി ഫ്ളക്സ് ഫ്യുവല് മോട്ടോര്സൈക്കിള് അവതരിപ്പിച്ച് ഹീറോ മോട്ടോകോര്പും, ആദ്യ ഫ്ളക്സ് ഫ്യുവല് പാസഞ്ചര് കാര് പുറത്തിറക്കി മാരുതി സുസൂക്കിയും ഈ മാറ്റത്തിന് നേതൃത്വം നല്കിയിരിക്കുകയാണ്.
എണ്ണ ഇറക്കുമതിയെ ആശ്രയിക്കുന്നത് കുറക്കുക, കാര്ഷികോത്പന്നങ്ങളില്നിന്ന് ഉല്പ്പാദിപ്പിക്കുന്ന എഥനോളിന്റെ ഉപയോഗം വര്ധിപ്പിക്കുക, കാര്ബണ് പുറന്തള്ളല് കുറയ്ക്കുക തുടങ്ങിയ ലക്ഷ്യങ്ങളോടെയാണ് കേന്ദ്ര സര്ക്കാര് ഫ്ളക്സ് ഫ്യുവല് സാങ്കേതികവിദ്യ പ്രോത്സാഹിപ്പിക്കുന്നത്.
പെട്രോള്, എഥനോള് അല്ലെങ്കില് ഇവയുടെ വിവിധ അനുപാതങ്ങളിലുള്ള മിശ്രിതങ്ങള് ഉപയോഗിച്ച് പ്രവര്ത്തിക്കാന് കഴിയുന്ന വാഹനങ്ങളെയാണ് ഫ്ളക്സ് ഫ്യുവല് വാഹനങ്ങള് എന്ന് വിളിക്കുന്നത്. സാധാരണ പെട്രോള് എന്ജിനുകളേക്കാള് വ്യത്യസ്തമായ ഇന്ധന മാനേജ്മെന്റ് സംവിധാനവും എഞ്ചിന് ട്യൂണിംഗും ഇത്തരം വാഹനങ്ങളിലുണ്ടാകും.
ഇന്ത്യയില് നിലവില് E20 (20 ശതമാനം എഥനോള് കലര്ന്ന പെട്രോള്) വ്യാപകമായി പ്രചരിപ്പിക്കപ്പെടുന്നുണ്ടെങ്കിലും പുതിയ ഫ്ളക്സ് ഫ്യുവല് വാഹനങ്ങള്ക്ക് E85 വരെ, അതായത് 85 ശതമാനം എഥനോള് വരെ അടങ്ങിയ ഇന്ധനം ഉപയോഗിക്കാനാകും.
രാജ്യത്തെ ഏറ്റവും വലിയ ഇരുചക്ര വാഹന നിര്മാതാക്കളിലൊന്നായ ഹീറോ മോട്ടോകോര്പ്, ജനപ്രിയ മോഡലുകളായ സ്പ്ലെന്ഡര് പ്ലസ്, എച്ച്.എഫ് ഡീലക്സ് എന്നിവയുടെ 100 സിസി പ്ലാറ്റ്ഫോമിനെ അടിസ്ഥാനമാക്കിയുള്ള ഫ്ളക്സ് ഫ്യുവല് പതിപ്പുകളാണ് അവതരിപ്പിച്ചിരിക്കുന്നത്.
E85 വരെ ഇന്ധനം ഉപയോഗിക്കാന് കഴിയുന്ന ഈ ബൈക്കുകള് ഗ്രാമീണ മേഖലയിലെയും സാധാരണ ഉപയോക്താക്കളിലെയും എഥനോള് ഉപയോഗം വര്ധിപ്പിക്കുമെന്നാണ് വിലയിരുത്തല്. ഇന്ത്യയില് ഏറ്റവും കൂടുതല് വിറ്റഴിക്കപ്പെടുന്ന ബൈക്ക് ശ്രേണികളിലൊന്നായ സ്പ്ലെന്ഡറിന്റെ ഫ്ളക്സ് ഫ്യുവല് പതിപ്പ് അവതരിപ്പിച്ചതിലൂടെ സാങ്കേതികവിദ്യയെ ജനകീയമാക്കാനാണ് കമ്പനിയുടെ ശ്രമം.
ഇന്ത്യയിലെ ആദ്യ ഫ്ളക്സ് ഫ്യുവല് പാസഞ്ചര് കാര് അവതരിപ്പിച്ചിരിക്കുകയാണ് മാരുതി സുസൂക്കി. ജനപ്രിയ ഹാച്ച്ബാക്കായ വാഗണ്-ആറിന്റെ പ്രത്യേക പതിപ്പാണ് കമ്പനി വികസിപ്പിച്ചിരിക്കുന്നത്.
E85 ഇന്ധനം ഉപയോഗിക്കാന് അനുയോജ്യമായ രീതിയിലാണ് വാഹനത്തിന്റെ എന്ജിനും ഇന്ധന വിതരണ സംവിധാനവും ക്രമീകരിച്ചിരിക്കുന്നത്. രാജ്യത്തെ ഏറ്റവും വലിയ കാര് നിര്മാതാവായ മാരുതിയുടെ ഈ നീക്കം ഫ്ളക്സ് ഫ്യുവല് സാങ്കേതികവിദ്യയുടെ വാണിജ്യ സാധ്യതകള് വര്ധിപ്പിക്കുമെന്നാണ് വിലയിരുത്തപ്പെടുന്നത്.
കരിമ്പ്, ധാന്യങ്ങള്, ചോളം, അരി തുടങ്ങിയ കാര്ഷികോത്പന്നങ്ങളില്നിന്നാണ് എഥനോള് പ്രധാനമായും ഉല്പ്പാദിപ്പിക്കുന്നത്. ഇന്ത്യയില് കരിമ്പ് അടിസ്ഥാനമാക്കിയുള്ള എഥനോള് ഉല്പാദനമാണ് കൂടുതലുള്ളത്.
എഥനോള് ഉപയോഗം വര്ധിക്കുന്നതോടെ കര്ഷകര്ക്ക് അധിക വിപണി ലഭിക്കുകയും കാര്ഷിക മേഖലയിലേക്ക് കൂടുതല് നിക്ഷേപം എത്തുകയും ചെയ്യുമെന്നാണ് കേന്ദ്ര സര്ക്കാര് പ്രതീക്ഷിക്കുന്നത്.
ഇന്ത്യ പ്രതിവര്ഷം വന്തോതില് അസംസ്കൃത എണ്ണ ഇറക്കുമതി ചെയ്യുന്ന രാജ്യമാണ്. രാജ്യത്തിന്റെ ഇറക്കുമതി ബില്ലില് വലിയ പങ്കും എണ്ണയ്ക്കാണ്. എഥനോളിന്റെ ഉപയോഗം വ്യാപകമാകുന്നതോടെ വിദേശനാണ്യ ചെലവ് കുറയ്ക്കാന് സാധിക്കും.
അതോടൊപ്പം കാര്ബണ് ഡയോക്സൈഡ് ഉള്പ്പെടെയുള്ള ഹരിതഗൃഹ വാതകങ്ങളുടെ പുറന്തള്ളലും കുറയ്ക്കാന് സഹായിക്കുമെന്നാണ് പഠനങ്ങള് സൂചിപ്പിക്കുന്നത്. ഊര്ജസുരക്ഷ ശക്തിപ്പെടുത്തുക, ഗ്രാമീണ സമ്പദ്വ്യവസ്ഥയെ പിന്തുണയ്ക്കുക, ശുദ്ധ ഇന്ധനങ്ങളുടെ ഉപയോഗം പ്രോത്സാഹിപ്പിക്കുക തുടങ്ങിയ ലക്ഷ്യങ്ങളും ഇതിന് പിന്നിലുണ്ട്.
ഫ്ളക്സ് ഫ്യുവല് വാഹനങ്ങള് വിപണിയിലെത്തിയെങ്കിലും E85 ഇന്ധനം രാജ്യവ്യാപകമായി ലഭ്യമാക്കുക എന്നത് വലിയ വെല്ലുവിളിയാണ്. നിലവില് മിക്ക പമ്പുകളിലും E20 ലഭ്യമാണെങ്കിലും ഉയര്ന്ന എഥനോള് മിശ്രിതമുള്ള ഇന്ധനത്തിന്റെ വിതരണ ശൃംഖല ഇപ്പോഴും വികസന ഘട്ടത്തിലാണ്.
ഇന്ധന ലഭ്യത, വാഹന വില, ഉപഭോക്തൃ അവബോധം എന്നിവയാണ് ഫ്ളക്സ് ഫ്യുവല് വാഹനങ്ങളുടെ വ്യാപനം നിര്ണയിക്കുന്ന പ്രധാന ഘടകങ്ങള്. എങ്കിലും കേന്ദ്ര സര്ക്കാര് ശക്തമായി പിന്തുണയ്ക്കുന്ന എഥനോള് നയത്തിന്റെ പശ്ചാത്തലത്തില് വരും വര്ഷങ്ങളില് കൂടുതല് ഫ്ളക്സ് ഫ്യുവല് മോഡലുകള് ഇന്ത്യന് വിപണിയിലെത്തുമെന്നാണ് പ്രതീക്ഷ.
Read DhanamOnline in English
Subscribe to Dhanam Magazine
