ലംബോർഗിനി പുതിയ ഹൈബ്രിഡ് എസ്.യു.വി പുറത്തിറക്കി; 45 ലക്ഷം രൂപ ലാഭിക്കാം ഈ സംസ്ഥാനത്ത് രജിസ്റ്റർ ചെയ്താൽ
എക്സ്-ഷോറൂം വില 4.57 കോടി രൂപയാണ്; ഹൈബ്രിഡ് വാഹനങ്ങൾക്ക് യു.പിയിൽ രജിസ്ട്രേഷൻ ഫീസ് ഒഴിവാക്കി
Image courtesy: lamborghini.com
25.9 kWh ലിഥിയം-അയൺ ബാറ്ററിയാണ് കാറിൽ സജ്ജീകരിച്ചിരിക്കുന്നത്. ഇതുമൂലം 60 കിലോമീറ്റർ ഇലക്ട്രിക് മോഡിൽ പ്രവർത്തിക്കാൻ വാഹനത്തിന് സാധിക്കും. വെറും 3.4 സെക്കൻഡ് മാത്രമാണ് പൂജ്യത്തില്‍ നിന്ന് 100 കി.മീ/മണിക്കൂർ വേഗത കൈവരിക്കാൻ വാഹനത്തിന് ആവശ്യമുളളത്. മികച്ച എയറോഡൈനാമിക്‌സിനായി പുതിയ രൂപകല്‍പ്പനയില്‍ മെനഞ്ഞെടുത്ത മുന്‍ഭാഗം, നവീകരിച്ച ഹെഡ്‌ലൈറ്റുകൾ, പുതുക്കിയ ബമ്പറും ഗ്രില്ലും തുടങ്ങിയവ പ്രമുഖ ഇറ്റാലിയന്‍ ബ്രാന്‍ഡായ ലംബോര്‍ഗിനി ഉറുസ് എസ്.ഇ.യുടെ പ്രത്യേകതകളാണ്.
രജിസ്ട്രേഷന്‍ നികുതിയില്‍ ഇളവുമായി യു.പി
വാഹനത്തിന്റെ വില (എക്സ്-ഷോറൂം) 4.57 കോടി രൂപയാണ്. ഉത്തര്‍പ്രദേശില്‍ നിന്ന് കാര്‍ വാങ്ങുന്നവര്‍ക്ക് രജിസ്ട്രേഷൻ ചെലവിൽ ഏകദേശം 45 ലക്ഷം രൂപയുടെ ഇളവ് ലഭിക്കും.
10 ലക്ഷത്തിൽ താഴെ വിലയുള്ള ഹൈബ്രിഡ് വാഹനങ്ങൾക്ക് രജിസ്ട്രേഷന്‍ നികുതിയുടെ എട്ട് ശതമാനവും എക്സ്-ഷോറൂം വില 10 ലക്ഷം രൂപയിൽ കൂടുതലുളള ഹൈബ്രിഡ് വാഹനങ്ങൾക്ക് നികുതിയുടെ 10 ശതമാനവും ഒഴിവാക്കുമെന്ന് യു.പി സർക്കാർ കഴിഞ്ഞ മാസമാണ് പ്രഖ്യാപിച്ചത്. യു.പി സര്‍ക്കാര്‍ പുതിയ നയത്തോടെ ഹൈബ്രിഡ്, പ്ലഗ്-ഇൻ ഹൈബ്രിഡ് വാഹനങ്ങൾ വാങ്ങുന്നവർക്ക് റോഡ് നികുതി ഒഴിവാക്കി സാധാരണ രജിസ്ട്രേഷൻ പ്രോസസ്സിംഗ് ഫീസ് മാത്രമാണ് ഈടാക്കുന്നത്.
620 bhp പവറും 800 Nm ടോര്‍ക്കും ഉത്പാദിപ്പിക്കുന്ന 4.0-ലിറ്റര്‍, ട്വിന്‍-ടര്‍ബോചാര്‍ജ്ഡ് V8 എഞ്ചിനാണ് ഉറുസ് SE-ക്ക് നല്‍കിയിട്ടുളളത്. ഇലക്ട്രിക്ക് മോട്ടോറുമായി സംയോജിപ്പിച്ച് 800hp പവറും 950Nm ടോര്‍ക്കും പവര്‍ ഔട്ട്പുട്ടാണ് ഇത് ഉല്‍പ്പാദിപ്പിക്കുന്നത്.
25.9kWh ലിഥിയം-അയണ്‍ ബാറ്ററി പായ്ക്ക് ഉപയോഗിക്കുന്ന പ്ലഗ്-ഇന്‍ ഹൈബ്രിഡ് സിസ്റ്റത്തിനൊപ്പം ഘടിപ്പിക്കുന്നതിനും സാധിക്കുന്നതാണ്. 8 സ്പീഡ് ടോര്‍ക്ക് കണ്‍വെര്‍ട്ടര്‍ ഓട്ടോമാറ്റിക് ഗിയര്‍ബോക്സാണ് വാഹനത്തിന് നല്‍കിയിട്ടുളളത്.