പ്രമുഖ ആഡംബര വാഹന നിർമ്മാതാക്കളായ ലെക്സസ് തങ്ങളുടെ പുതിയ ഹൈബ്രിഡ് സെഡാൻ 'ഇഎസ് 350h' കേരള വിപണിയിൽ അവതരിപ്പിച്ചു. 66.10 ലക്ഷം രൂപ മുതലാണ് എക്സ്-ഷോറൂം വില.
കൊച്ചി ഗ്രാൻഡ് ഹയാത്ത് ഹോട്ടലിൽ നടന്ന പ്രൗഢഗംഭീരമായ ചടങ്ങിൽ ഒരേസമയം 20 ഉപഭോക്താക്കൾക്ക് വാഹനങ്ങൾ കൈമാറി ലെക്സസ് കൊച്ചി ചരിത്രം കുറിച്ചു. ലെക്സസ് ഇന്ത്യയുടെ ചരിത്രത്തിൽ തന്നെ ആദ്യമായാണ് ഇത്തരമൊരു മാസ് ഡെലിവറി സംഘടിപ്പിക്കുന്നത്.
എക്സ്ക്വിസിറ്റ് (Exquisite), ലക്ഷ്വറി (Luxury) എന്നീ രണ്ട് വേരിയന്റുകളിലാണ് വാഹനം എത്തുന്നത്. എക്സ്-ഷോറൂം വില യഥാക്രമം 66.10 ലക്ഷം രൂപയും 71.80 ലക്ഷം രൂപയുമാണ്.
ഒരു എക്സിക്യൂട്ടീവ് ആഡംബര സെഡാന് ലഭിക്കാവുന്ന ഏറ്റവും മികച്ച മൈലേജാണ് ഇഎസ് 350h-ന്റെ പ്രധാന ആകർഷണം. 2.5 ലിറ്റർ ഫോർ-സിലിണ്ടർ പെട്രോൾ എൻജിനും ലിഥിയം-അയോൺ ബാറ്ററിയുമുള്ള സെൽഫ്-ചാർജിംഗ് ഹൈബ്രിഡ് സാങ്കേതികവിദ്യയാണ് ഇതിലുള്ളത്. എ.ആർ.എ.ഐ (ARAI) കണക്കുകൾ പ്രകാരം ലിറ്ററിന് 25.22 കിലോമീറ്റർ മൈലേജ് വാഹനം നൽകുന്നു.
സെൽഫ്-ചാർജിംഗ് സംവിധാനമായതിനാൽ വാഹനം പുറത്തുനിന്ന് പ്ലഗ് ഇൻ ചെയ്ത് ചാർജ് ചെയ്യേണ്ടതില്ല. യാത്രക്കിടയിൽ തന്നെ റീജനറേറ്റീവ് എനർജി വഴി ബാറ്ററി ചാർജ് ആവുകയും പെട്രോൾ എൻജിന്റെ ഭാരം കുറച്ച് മികച്ച ഡ്രൈവിംഗ് സുഖവും ഇന്ധനലാഭവും നൽകുകയും ചെയ്യുന്നു.
രാജ്യത്തെ ലക്ഷ്വറി കാർ വിപണിയിൽ തന്നെ സമാനതകളില്ലാത്ത വാറന്റി പാക്കേജാണ് ലെക്സസ് വാഗ്ദാനം ചെയ്യുന്നത്. പുതിയ വാഹനത്തിന് 8 വർഷം അല്ലെങ്കിൽ 2,00,000 കിലോമീറ്റർ വാറന്റിയും, ഹൈബ്രിഡ് ബാറ്ററിക്ക് 8 വർഷത്തെ പ്രത്യേക വാറന്റിയും ലഭിക്കും.
സ്പെയർ പാർട്സുകളുടെ എളുപ്പത്തിലുള്ള ലഭ്യത, വീട്ടുപടിക്കൽ ലഭിക്കുന്ന ഡോർസ്റ്റെപ്പ് സർവീസ്, ഉറപ്പുള്ള ബൈ-ബാക്ക് ഓപ്ഷനുകൾ എന്നിവയ്ക്ക് പുറമെ കേരളത്തിലെ ഉപഭോക്താക്കൾക്കായി 20 പ്രൊഫഷണൽ 'ലെക്സസ് റിലേഷൻഷിപ്പ് മാനേജർമാരെയും' കമ്പനി നിയോഗിച്ചിട്ടുണ്ട്.
ലെക്സസിന്റെ അത്യാധുനിക 'തസൂന' (Tazuna) കോക്ക്പിറ്റ് കൺസെപ്റ്റിലാണ് കാറിന്റെ അകത്തളം രൂപകൽപ്പന ചെയ്തിരിക്കുന്നത്.
14-ഇഞ്ച് ഫുൾ എച്ച്.ഡി ഇൻഫോടെയ്ൻമെന്റ് ടച്ച്സ്ക്രീൻ
12.3-ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്റർ
പ്രീമിയം 17-സ്പീക്കർ മാർക്ക് ലെവിൻസൺ ഓഡിയോ സിസ്റ്റം
ക്യാബിനിലെ വായു ശുദ്ധീകരിക്കുന്ന നാനോ-എക്സ് (nanoe™ X) ക്ലൈമറ്റ് കൺട്രോൾ
മൊബൈൽ ആപ്പ് വഴി പ്രധാന ഫംഗ്ഷനുകൾ നിയന്ത്രിക്കാവുന്ന കണക്റ്റഡ് കാർ ഫീച്ചറുകൾ
ട്വിൻ എൽ-സിഗ്നേച്ചർ എൽ.ഇ.ഡി ഹെഡ്ലാമ്പുകൾ, 19-ഇഞ്ച് അലോയ് വീലുകൾ എന്നിവയാണ് പുറംകാഴ്ചയിലെ സവിശേഷതകൾ. യാത്രക്കാരുടെ സുരക്ഷയ്ക്കായി എട്ട് എയർബാഗുകൾ, പ്രീ-കൊളീഷൻ സിസ്റ്റം, ഡൈനാമിക് റഡാർ ക്രൂയിസ് കൺട്രോൾ, ലെയ്ൻ ട്രേസിംഗ് അസിസ്റ്റ്, 3D പനോരമിക് വ്യൂ മോണിറ്റർ എന്നിവയടങ്ങുന്ന 'ലെക്സസ് സേഫ്റ്റി സിസ്റ്റം+' നൽകിയിരിക്കുന്നു.
ഇതിനകം വിപണിയിലുള്ള പൂർണ്ണ ഇലക്ട്രിക് മോഡലായ ഇഎസ് 500e-യ്ക്കൊപ്പം (എക്സ്-ഷോറൂം വില ₹91.2 ലക്ഷം) ഹൈബ്രിഡ് സാന്നിധ്യമായി ഇഎസ് 350h നിലകൊള്ളും.
കേരള ലോഞ്ചിനോടനുബന്ധിച്ച് നടന്ന മെഗാ ഡെലിവറിയിൽ പുതിയ ഇഎസ് 350h, എൻ.എക്സ് 350h, ആർ.എക്സ് 350h, ആർ.എക്സ് 500h എന്നിവയ്ക്കൊപ്പം കമ്പനിയുടെ ഫ്ലാഗ്ഷിപ്പ് ലക്ഷ്വറി എം.പി.വിയായ എൽ.എം 350h-ഉം ഉപഭോക്താക്കൾക്ക് കൈമാറി. ഇന്ത്യൻ വിപണിയിൽ 66.10 ലക്ഷം മുതൽ 2.92 കോടി രൂപ വരെ വിലമതിക്കുന്ന വാഹനങ്ങളാണ് ലെക്സസിനുള്ളത്.
ചടങ്ങിൽ ലെക്സസ് ഇന്ത്യ എക്സിക്യൂട്ടീവ് വൈസ് പ്രസിഡന്റ് റിയോസുകെ തവാറ, ജനറൽ മാനേജർ ആശിഷ് ലോമേഷ്, നിപ്പോൺ മോട്ടോർ കോർപ്പറേഷൻ & ലെക്സസ് കൊച്ചി സി.എം.ഡി എം.എ.എം. ബാബു മൂപ്പൻ, എം.ഡി നയീം ഷാഹുൽ തുടങ്ങിയവർ പങ്കെടുത്തു.
Read DhanamOnline in English
Subscribe to Dhanam Magazine
