ഗുജറാത്തില്‍ ടാറ്റയുടെ ഇ.വി ബാറ്ററി പ്ലാന്റ് വരുന്നു, മുതല്‍മുടക്ക് 13,000 കോടി
വൈദ്യുത വാഹന ശൃംഖല ശക്തമാക്കാനുള്ള രാജ്യത്തിന്റെ ശ്രമങ്ങള്‍ക്ക് കരുത്താകും
ടാറ്റ ഗ്രൂപ്പ് ഗുജറാത്തിലെ സനന്ദില്‍ 13,000 കോടി രൂപ(1.6 ബില്യണ്‍ ഡോളര്‍)മുതല്‍ മുടക്കില്‍ വൈദ്യുത വാഹനങ്ങള്‍ക്കുള്ള ലിഥിയം ബാറ്ററി നിര്‍മാണ ഫാക്ടറി തുറക്കുന്നു. ടാറ്റ ഗ്രൂപ്പിന്റെ ഉപസ്ഥാപനമായ അഗ്രതാസ് എനര്‍ജി സ്റ്റോറേജ് സൊല്യൂഷന്‍സ് പ്രൈവറ്റ് ലിമിറ്റഡാണ് ഗുജറാത്ത് സര്‍ക്കാരുമായി ധാരണ പത്രം ഒപ്പുവച്ചത്. മൂന്നു വര്‍ഷത്തിനുള്ളില്‍ പ്ലാന്റ് പൂര്‍ത്തിയാക്കാനാണ് കമ്പനി ഉദ്ദേശിക്കുന്നത്. 20 ജിഗാവാട്ട് അവര്‍ ശേഷിയാണ് ആദ്യ ഘട്ടത്തില്‍ പ്ലാന്റിനുണ്ടാകുക. രണ്ടാം ഘട്ടത്തില്‍ ഇത് ഇരട്ടിയാക്കും.
രാജ്യത്തെ ഇ.വി വാഹന വിപണിയില്‍ ടാറ്റാമോട്ടോഴ്‌സാണ് മുന്നില്‍. എന്നാല്‍ മൊത്തം കാര്‍ വിപണിയുടെ ഒരു ശതമാനത്തില്‍ താഴെ മാത്രമാണ് വൈദ്യുത വാഹന വിപണി. 38 കോടി വാഹനങ്ങളാണ് കഴിഞ്ഞ വര്‍ഷം രാജ്യത്ത് മൊത്തം വിറ്റഴിച്ചത്.