ഇന്ത്യന് പ്രീമിയം ഇലക്ട്രിക് വാഹന (EV) വിപണിയില് പിടിമുറുക്കാന് പുതിയ വില യുദ്ധത്തിന് തുടക്കമിട്ട് ആഗോള ഇവി ഭീമന്മാരായ ടെസ്ല (Tesla). കമ്പനിയുടെ ഏറ്റവും ജനപ്രിയ മോഡലായ 'മോഡല് വൈ' (Model Y) യുടെ വിലയില് വലിയ കുറവ് വരുത്തിക്കൊണ്ടാണ് ജര്മ്മന് ലക്ഷ്വറി ബ്രാന്ഡുകളായ ബിഎംഡബ്ല്യു, മെഴ്സിഡസ് ബെന്സ് എന്നിവര്ക്ക് ഇലോണ് മസ്കിന്റെ കമ്പനി നേരിട്ട് വെല്ലുവിളി ഉയര്ത്തുന്നത്.
ഇറക്കുമതി ചെയ്യുന്ന വാഹനങ്ങള്ക്ക് (CBU) ഇന്ത്യയില് കനത്ത നികുതി നിലനില്ക്കുന്നുണ്ടെങ്കിലും, വിപണി പിടിക്കാന് വില പൂര്ണമായും പുനഃക്രമീകരിക്കാനാണ് ടെസ്ലയുടെ തീരുമാനം.
ഇന്ത്യന് വിപണിയില് കൂടുതല് ഉപഭോക്താക്കളെ ആകര്ഷിക്കുന്നതിനായി മോഡല് വൈ പോര്ട്ട്ഫോളിയോ ടെസ്ല പൂര്ണമായും പരിഷ്കരിച്ചു.
മുന്പുണ്ടായിരുന്ന മോഡല് വൈ ബേസ് വേരിയന്റിന് പകരം കൂടുതല് ഫീച്ചറുകളുള്ള 'Model Y Premium RWD' എന്ന പുതിയ പതിപ്പ് 50.89 ലക്ഷം രൂപ (ex-showroom) നിരക്കില് ടെസ്ല അവതരിപ്പിച്ചു. നേരത്തെ 59.89 ലക്ഷം രൂപയുണ്ടായിരുന്ന സ്ഥാനത്താണ് പുതിയ മാറ്റം. ഇതോടെ ടെസ്ല കാറുകളുടെ ഇന്ത്യയിലെ എന്ട്രി വിലയില് 9 ലക്ഷം രൂപയുടെ വന് കുറവാണ് വന്നിരിക്കുന്നത്. 67.89 ലക്ഷം രൂപയുടെ ലോങ് റേഞ്ച് വേരിയന്റ് കമ്പനി പൂര്ണമായും നിര്ത്തലാക്കി. ഇനി മുതല് ഇന്ത്യയില് രണ്ട് വേരിയന്റുകള് മാത്രമായിരിക്കും ലഭ്യമാകുക; പുതിയ പ്രീമിയം ആര്ഡബ്ല്യുഡിയും (5-സീറ്റര്), കഴിഞ്ഞ മാസം 61.99 ലക്ഷം രൂപയ്ക്ക് പുറത്തിറക്കിയ 6-സീറ്റര് മോഡല് വൈ എല് (Model Y L) പ്രീമിയവും. പുതിയ മോഡലിനായുള്ള ബുക്കിങ് ആരംഭിച്ചുകഴിഞ്ഞു, ജൂലൈ മുതല് ഡെലിവറി ലഭ്യമാകും.
ഷാങ്ഹായിലെ ഫാക്ടറിയില് നിര്മ്മിച്ച് ഇന്ത്യയിലേക്ക് ഇറക്കുമതി ചെയ്യുന്നതിനാല് ഈ വാഹനങ്ങള്ക്ക് 70% കസ്റ്റംസ് ഡ്യൂട്ടി ഈടാക്കുന്നുണ്ട്. എന്നിരുന്നാലും, പുതിയ വിലനിര്ണയം വഴി പ്രമുഖ ലക്ഷ്വറി മോഡലുകളായ ബിഎംഡബ്ല്യു iX1 LWB (വില 51.40 ലക്ഷം രൂപ മുതല്), മെഴ്സിഡസ് ബെന്സ് CLA BEV (വില 55 ലക്ഷം രൂപ മുതല്) എന്നിവയേക്കാള് കുറഞ്ഞ നിരക്കില് മോഡല് വൈ ലഭ്യമാക്കാന് ടെസ്ലയ്ക്ക് സാധിക്കും.
മിഡില് ഈസ്റ്റിലെ യുദ്ധസാഹചര്യങ്ങള് കാരണം ഇന്ധനവില വര്ധിക്കുന്ന സാഹചര്യത്തില്, പ്രീമിയം കാര് വാങ്ങാന് ആഗ്രഹിക്കുന്ന ഇന്ത്യന് ഉപഭോക്താക്കള് ഇവികളിലേക്ക് മാറാന് കൂടുതല് താല്പര്യം കാണിക്കുമെന്നാണ് ടെസ്ലയുടെ കണക്കുകൂട്ടല്. പുതിയ മോഡലിനായി 6 ലക്ഷം രൂപ ഡൗണ് പേയ്മെന്റില് 39,990 രൂപ മുതല് ആരംഭിക്കുന്ന ആകര്ഷകമായ ഇഎംഐ സ്കീമുകളും കമ്പനി പ്രഖ്യാപിച്ചിട്ടുണ്ട്.
2025 ജൂലൈയില് ഇന്ത്യയില് ആദ്യ ഷോറൂം തുറന്നതിനു ശേഷം ടെസ്ലയ്ക്ക് വിപണിയില് പ്രതീക്ഷിച്ച മുന്നേറ്റം ഉണ്ടാക്കാന് കഴിഞ്ഞിരുന്നില്ല. FADA റിപ്പോര്ട്ട് പ്രകാരം കഴിഞ്ഞ സാമ്പത്തിക വര്ഷം വെറും 342 വാഹനങ്ങളാണ് ടെസ്ല ഇന്ത്യയില് വിറ്റത്. 30-35 ലക്ഷം രൂപയുടെ സാധാരണ കാറുകളില് നിന്നും 80 ലക്ഷത്തിന് മുകളിലുള്ള ലക്ഷ്വറി കാറുകളിലേക്ക് മാറാന് മടിക്കുന്ന വലിയൊരു വിഭാഗം അര്ബന് ഉപഭോക്താക്കളെയാണ് 50 ലക്ഷം രൂപയുടെ ഈ പുതിയ പ്രൈസ് ടാഗിലൂടെ ടെസ്ല ലക്ഷ്യമിടുന്നത്. മുംബൈയ്ക്കും ഡല്ഹിക്കും പുറമെ ബംഗളൂരു, ഹൈദരാബാദ് തുടങ്ങിയ നഗരങ്ങളിലേക്ക് സര്വീസ്, ചാര്ജിങ് ശൃംഖല വ്യാപിപ്പിക്കുന്നതും ടെസ്ലയ്ക്ക് വിപണിയില് കരുത്താകുമെന്നാണ് നിരീക്ഷണങ്ങള്.
Global EV giant Tesla slashes entry prices by ₹9 lakh in India to challenge German luxury heavyweights like BMW and Mercedes-Benz.
Read DhanamOnline in English
Subscribe to Dhanam Magazine
