ടൂ വീലര്‍ വിപണിയിൽ പോരാട്ടം മുറുകുന്നു; ഞെട്ടിച്ച് ടിവിഎസും എൻഫീൽഡും, ഒന്നാം സ്ഥാനം വിടാതെ ഹീറോ

ഇന്ത്യൻ ഇരുചക്ര വാഹന വിപണിയിൽ മെയ് മാസത്തെ വിൽപ്പന കണക്കുകൾ പ്രകാരം ഹീറോ മോട്ടോകോർപ്പ് ഒന്നാം സ്ഥാനം നിലനിർത്തി. എന്നാല്‍ ഏറ്റവും വേഗത്തിൽ വളരുന്ന കമ്പനികളായി ടിവിഎസ് മോട്ടോർ കമ്പനിയും റോയൽ എൻഫീൽഡും മാറി. ഇന്ധനവില വർദ്ധിച്ചിട്ടും മോട്ടോർസൈക്കിളുകൾക്കും സ്കൂട്ടറുകൾക്കും വിപണിയിൽ മികച്ച ആവശ്യക്കാരുണ്ടെന്ന് സൂചിപ്പിക്കുന്നതാണ് ഈ മുന്നേറ്റം.

കൂടിയ വളർച്ചാ നിരക്ക്

ടിവിഎസ് മോട്ടോർ കമ്പനി: പ്രധാന നിർമ്മാതാക്കളിൽ ഏറ്റവും ഉയർന്ന വളർച്ചാ നിരക്ക് രേഖപ്പെടുത്തിയത് ടിവിഎസ് ആണ്. 2025 മെയ് മാസത്തിൽ 3,09,287 യൂണിറ്റുകൾ വിറ്റഴിച്ച കമ്പനി, 2026 മെയ് മാസത്തിൽ 24.34 ശതമാനം വളർച്ചയോടെ 3,84,565 യൂണിറ്റുകൾ വിറ്റഴിച്ചു. മോട്ടോർസൈക്കിളുകൾക്കും സ്കൂട്ടറുകൾക്കും ഒരുപോലെ ശക്തമായ ഡിമാൻഡ് ലഭിച്ചതാണ് ടിവിഎസിനെ ഈ നേട്ടത്തിന് അർഹരാക്കിയത്.

റോയൽ എൻഫീൽഡ്: മിഡ്-സൈസ്, പ്രീമിയം മോട്ടോർസൈക്കിൾ വിഭാഗത്തിൽ ശ്രദ്ധ കേന്ദ്രീകരിക്കുന്ന റോയൽ എൻഫീൽഡ് 24.13 ശതമാനം വളർച്ചയുമായി ടിവിഎസിന് തൊട്ടുപിന്നാലെയുണ്ട്. കഴിഞ്ഞ വർഷം ഇതേ കാലയളവിൽ 75,820 യൂണിറ്റുകൾ വിറ്റഴിച്ച സ്ഥാനത്ത് നിന്ന് ഇത്തവണ 94,115 യൂണിറ്റുകളിലേക്ക് ഉയരാൻ കമ്പനിക്ക് സാധിച്ചു. പ്രീമിയം ഉൽപ്പന്നങ്ങളോടുള്ള ഉപഭോക്താക്കളുടെ താൽപ്പര്യമാണ് ഇതിലൂടെ വ്യക്തമാകുന്നത്.

മറ്റ് പ്രമുഖ കമ്പനികൾ

വിപണിയിൽ ഒന്നാം സ്ഥാനത്തുള്ള ഹീറോ മോട്ടോകോർപ്പ് 5,36,784 യൂണിറ്റുകൾ വിറ്റഴിച്ചുകൊണ്ട് 9.77 ശതമാനം വളർച്ച രേഖപ്പെടുത്തി. ഡീലക്സ് 125 സിസി വിഭാഗത്തിലും പ്രീമിയം മോഡലുകളിലുമുള്ള ഡിമാൻഡ് ഹീറോയ്ക്ക് തുണയായി. രണ്ടാമതുള്ള ഹോണ്ട 10.15 ശതമാനം വളർച്ചയോടെ 4,59,611 യൂണിറ്റുകൾ വിറ്റഴിച്ചു. ബജാജ് 9.46 ശതമാനം വളർച്ച നേടിയപ്പോൾ, സുസുക്കി തങ്ങളുടെ ചരിത്രത്തിലെ ഏറ്റവും ഉയർന്ന പ്രതിമാസ വിൽപ്പനയായ 1,10,028 യൂണിറ്റുകൾ കൈവരിച്ചുവെങ്കിലും വളർച്ചാ നിരക്ക് 2.09 ശതമാനമായിരുന്നു.

ഫീച്ചറുകൾ കൂടുതലുള്ള സ്കൂട്ടറുകൾക്കും പ്രീമിയം മോട്ടോർസൈക്കിളുകൾക്കും വിപണിയിൽ ലഭിക്കുന്ന സ്വീകാര്യതയാണ് ടിവിഎസ്, റോയൽ എൻഫീൽഡ് തുടങ്ങിയ കമ്പനികളെ വേഗത്തിൽ വളരാൻ സഹായിക്കുന്നത്.