തമിഴ് രാഷ്ട്രീയത്തിലെ പുതിയ 'ദളപതി'യായി വിജയ് മാറുമ്പോള്, അദ്ദേഹത്തിന്റെ യാത്രയിലും ഒപ്പമുള്ള ആഡംബര വാഹനം ആരാധകര്ക്കിടയില് വലിയ ചര്ച്ചയാകുന്നു. തമിഴക വെട്രി കഴകം (TVK) അധ്യക്ഷന് വിജയ് തന്റെ രാഷ്ട്രീയ നീക്കങ്ങള്ക്കായി തിരഞ്ഞെടുത്തിരിക്കുന്നത് ബിഎംഡബ്ല്യുവിന്റെ ഫ്ളാഗ്ഷിപ്പ് ഇലക്ട്രിക് സെഡാനായ i7 ആണ്. ജര്മ്മന് ആഡംബര കാര് നിര്മ്മാതാക്കളായ ബിഎംഡബ്ല്യുവിന്റെ ഈ ഇലക്ട്രിക് മോഡലിന് ഇന്ത്യയില് 2.05 കോടി രൂപ മുതലാണ് എക്സ്-ഷോറൂം വില വരുന്നത്.
ബിഎംഡബ്ല്യുവിന്റെ ഏഴാം തലമുറ 7 സീരീസിനൊപ്പം 2023 ജനുവരി 7-നാണ് i7 ഇന്ത്യയില് ഔദ്യോഗികമായി പുറത്തിറക്കിയത്. ആഗോളതലത്തില് 2022 ഏപ്രിലില് അവതരിപ്പിക്കപ്പെട്ട ഈ വാഹനം, ചുരുങ്ങിയ കാലം കൊണ്ട് തന്നെ ലോകത്തിലെ ഏറ്റവും മികച്ച ആഡംബര ഇലക്ട്രിക് കാറുകളിലൊന്നായി മാറി. വിജയ് ഉപയോഗിക്കുന്നത് ഇതിന്റെ ആദ്യ വേര്ഷനാണെങ്കിലും, 2026 ഏപ്രിലില് ഇതിന്റെ പുതുക്കിയ പതിപ്പായ (Facelift) i7 ബിഎംഡബ്ല്യു ആഗോള വിപണിയില് അവതരിപ്പിച്ചിട്ടുണ്ട്.
പ്രധാന ഫീച്ചറുകള് ഇവയാണ്:
1. പിന്സീറ്റിലെ സിനിമാ ലോകം
ഈ കാറിന്റെ ഏറ്റവും വലിയ പ്രത്യേകത പിന്നിലെ സീറ്റിലിരിക്കുന്നവര്ക്കായി ഒരുക്കിയിരിക്കുന്ന 31.3 ഇഞ്ച് 8K പനോരമിക് സ്ക്രീന് ആണ്. കാറിനുള്ളില് ഒരു മിനി തിയറ്റര് തന്നെ ഉണ്ടെന്ന് പറയാം. രാഷ്ട്രീയ യാത്രകള്ക്കിടയില് വിജയ്ക്ക് വാര്ത്തകള് കാണാനോ മീറ്റിംഗുകള് വിലയിരുത്താനോ ഇത് സഹായിക്കുന്നു
2. ഹാന്സ് സിമ്മറുടെ സംഗീതം
ലോകപ്രശസ്ത സംഗീത സംവിധായകന് ഹാന്സ് സിമ്മര് പ്രത്യേകം തയ്യാറാക്കിയ 'ഐക്കണിക് സൗണ്ടുകള്' ആണ് ഈ ഇലക്ട്രിക് കാറിനുള്ളത്. ഓരോ ഡ്രൈവിംഗ് മോഡിനും അനുയോജ്യമായ ശബ്ദങ്ങള് കാറിനുള്ളിലെ അന്തരീക്ഷം മാറ്റുന്നു. കൂടാതെ 35 സ്പീക്കറുകള് ഉള്ള Bowers & Wilkins സറൗണ്ട് സൗണ്ട് സിസ്റ്റം 4D അനുഭവം നല്കുന്നു.
3. സ്വയം പ്രവര്ത്തിക്കുന്ന വാതിലുകള്
ഒരു ബട്ടണ് അമര്ത്തിയാല് കാറിന്റെ നാല് വാതിലുകളും തനിയെ തുറക്കുകയും അടയുകയും ചെയ്യും. വാതിലിനടുത്ത് തടസങ്ങളുണ്ടെങ്കില് സെന്സറുകള് വഴി അത് തിരിച്ചറിഞ്ഞ് വാതില് തുറക്കുന്നത് നിയന്ത്രിക്കാനും ഇതിന് സാധിക്കും.
4. ക്രിസ്റ്റല് ഫീല്
കാറിന്റെ ഹെഡ്ലൈറ്റുകളില് സ്വരോസ്കി ക്രിസ്റ്റലുകള് പതിപ്പിച്ചിട്ടുണ്ട്. കാറിനുള്ളിലെ ഗിയര് സെലക്ടര്, ഐ-ഡ്രൈവ് കണ്ട്രോളര്, സീറ്റ് അഡ്ജസ്റ്റ്മെന്റ് ബട്ടണുകള് എന്നിവയും സ്ഫടിക തുല്യമായ ഗ്ലാസ് ഫിനിഷിംഗിലാണ് ഒരുക്കിയിരിക്കുന്നത്.
5. റിയര് സീറ്റ് എക്സിക്യൂട്ടീവ് ലോഞ്ച്
പിന്സീറ്റിലിരിക്കുന്നവര്ക്ക് കാലുകള് നീട്ടി സുഖമായി ഇരിക്കാന് ലെഗ് റെസ്റ്റ് സൗകര്യമുണ്ട്. കൂടാതെ എല്ലാ സീറ്റുകളിലും മസാജ്, വെന്റിലേഷന്, ഹീറ്റിംഗ് സൗകര്യങ്ങള് ലഭ്യമാണ്. കാറിന്റെ വാതിലുകളിലുള്ള 5.5 ഇഞ്ച് ടച്ച്സ്ക്രീനുകള് വഴി ഇവ നിയന്ത്രിക്കാം.
6. മിന്നല് വേഗതയും കരുത്തും:
പൂര്ണ്ണമായും ഇലക്ട്രിക് ആയ ഈ വാഹനം വെറും 4.7 സെക്കന്ഡിനുള്ളില് 0 മുതല് 100 കിലോമീറ്റര് വേഗത കൈവരിക്കും. ഒറ്റത്തവണ ചാര്ജ് ചെയ്താല് ഏകദേശം 625 കിലോമീറ്റര് വരെ സഞ്ചരിക്കാം എന്നതും ഇതിന്റെ പ്രത്യേകതയാണ്. 101.7 kWh വലിയ ബാറ്ററിയാണ് ഇതിനുള്ളത്.
7. നിശബ്ദമായ യാത്ര
ഇലക്ട്രിക് വാഹനമായതിനാല് എന്ജിന് ശബ്ദം ഒട്ടുമില്ല. പുറത്തെ ശബ്ദം അകത്തേക്ക് കടക്കാത്ത വിധത്തിലുള്ള ഇന്സുലേഷന് യാത്ര അതീവ ശാന്തമാക്കുന്നു.
വിജയ് തന്റെ രാഷ്ട്രീയ റാലികള്ക്കും പ്രധാന കൂടിക്കാഴ്ചകള്ക്കും ഈ വാഹനം തിരഞ്ഞെടുക്കാനുള്ള പ്രധാന കാരണവും ഇതിലെ ഈ 'എക്സിക്യൂട്ടീവ് ലോഞ്ച്' സൗകര്യങ്ങളാണ്. പരിസ്ഥിതി സൗഹൃദവും ഒപ്പം പ്രൗഢിയും ഒത്തിണങ്ങിയ വാഹനമാണിതെന്ന് ചുരുക്കം.
Actor-politician Vijay’s BMW i7 electric luxury sedan is drawing attention for its premium executive features, silent electric performance, and ₹2 crore price tag.
Read DhanamOnline in English
Subscribe to Dhanam Magazine
