ഡ്രൈവിംഗ് ലൈസന്‍സിലെ വിലാസം മാറ്റാന്‍ അപേക്ഷിച്ചിട്ട് തീരുമാനം കാത്തിരിക്കുകയാണോ? പുതിയ ലൈസന്‍സ് എടുക്കാനുള്ള ഒരുക്കത്തിലാണോ? കേന്ദ്രം നിര്‍ദേശിച്ചിരിക്കുന്ന ചട്ടഭേദഗതികള്‍ ഈ രണ്ടു വിഭാഗങ്ങളെയും ബാധിക്കും. പുതിയ അപേക്ഷകര്‍ക്ക് റോഡ് സുരക്ഷ സംബന്ധിച്ച വിലയിരുത്തല്‍ കൂടുതല്‍ കര്‍ശനമാകും.നിലവിലെ ലൈസന്‍സ് ഉടമകള്‍ക്ക് വിവരങ്ങള്‍ തിരുത്തുന്നതിനുള്ള ചെലവും കാത്തിരിപ്പും കുറയും. മോട്ടോര്‍ വാഹന ചട്ടങ്ങള്‍ ഭേദഗതി ചെയ്യുന്നതിനായി കേന്ദ്ര റോഡ് ഗതാഗത, ഹൈവേ മന്ത്രാലയം പുറത്തിറക്കിയ കരട് നിര്‍ദേശങ്ങളാണ് ഇവ.
സുരക്ഷിത ഡ്രൈവിംഗിനെക്കുറിച്ചുള്ള ട്യൂട്ടോറിയലുമായി ബന്ധപ്പെട്ട വിലയിരുത്തലിന്റെ പാസ് മാര്‍ക്ക് നിലവിലെ 60%ല്‍ നിന്ന് 75% ആക്കാനാണ് നിര്‍ദേശം. ട്യൂട്ടോറിയലിന് കുറഞ്ഞത് 30 മിനിറ്റ് ദൈര്‍ഘ്യവും വേണം. വാഹനം ഓടിച്ചുകാണിക്കുന്ന പ്രായോഗിക ഡ്രൈവിംഗ് ടെസ്റ്റിന്റെ പാസ് മാര്‍ക്ക് 75% ആക്കുകയാണ് എന്നു കരുതരുത്. ലേണേഴ്സ് ലൈസന്‍സ് നടപടിക്രമത്തിന്റെ ഭാഗമായ റോഡ് സുരക്ഷാ വിജ്ഞാന വിലയിരുത്തലിലാണ് ഈ മാറ്റം നിര്‍ദേശിച്ചിരിക്കുന്നത്. വാഹനം നിയന്ത്രിക്കാനുള്ള കഴിവിനൊപ്പം സുരക്ഷിതമായി ഡ്രൈവ് ചെയ്യുന്നതിനുള്ള അറിവിനും കൂടുതല്‍ പ്രാധാന്യം നല്‍കുന്നുവെന്ന് അര്‍ഥം.
ലൈസന്‍സിലെ പേരോ മറ്റ് വ്യക്തിഗത വിവരങ്ങളോ മാറ്റുന്നതിനുള്ള 200 രൂപ ഫീസ് ഒഴിവാക്കാന്‍ കരടില്‍ നിര്‍ദേശമുണ്ട്. വിലാസം, മൊബൈല്‍ നമ്പര്‍, ഇമെയില്‍ ഐഡി എന്നിവ പുതുക്കുന്നതിനും ഫീസ് ഈടാക്കരുതെന്നാണ് നിര്‍ദേശം. ഓണ്‍ലൈന്‍ ആധാര്‍ പ്രാമാണീകരണം വഴി ലഭ്യമാക്കുന്ന സേവനങ്ങള്‍ക്ക് ഫീസ് ഒഴിവാക്കാനുള്ള വ്യവസ്ഥയും ഉള്‍പ്പെടുത്തിയിട്ടുണ്ട്. അതായത്, ആധാര്‍ ഉപയോഗിച്ച് അപേക്ഷകന്റെ തിരിച്ചറിയല്‍ സ്ഥിരീകരിച്ച് പൂര്‍ത്തിയാക്കുന്ന സേവനങ്ങള്‍ക്കാണ് ഈ ഇളവ് നിര്‍ദേശിക്കുന്നത്. ആധാര്‍ നമ്പര്‍ കൈവശമുണ്ടെന്നതുകൊണ്ട് മാത്രം എല്ലാ ലൈസന്‍സ് സേവനങ്ങളും സൗജന്യമായെന്ന് അര്‍ഥമില്ല.
ലൈസന്‍സിലെ വിവരങ്ങള്‍ മാറ്റാനുള്ള അപേക്ഷയില്‍ 15 ദിവസത്തിനകം അനുമതി നല്‍കുകയോ നിരസിക്കുകയോ വേണമെന്നാണ് നിര്‍ദേശം. നിരസിക്കുകയാണെങ്കില്‍ കാരണം രേഖപ്പെടുത്തി അപേക്ഷകനെ അറിയിക്കണം. വിലാസമാറ്റ അപേക്ഷകള്‍ക്ക് മറ്റൊരു പ്രധാന വ്യവസ്ഥയുമുണ്ട്. അപേക്ഷ ലഭിച്ച് 30 ദിവസത്തിനകം അംഗീകരിക്കുകയോ നിരസിക്കുകയോ ചെയ്തില്ലെങ്കില്‍, അത് അംഗീകരിച്ചതായി കണക്കാക്കും.
ഇന്ത്യന്‍ പൗരന്മാര്‍ക്കും വിദേശ പൗരന്മാര്‍ക്കും നല്‍കുന്നതോ പുതുക്കുന്നതോ ആയ ഡ്രൈവിംഗ് ലൈസന്‍സുകള്‍ക്ക് വേറിട്ട കാര്‍ഡ് മാതൃകകളും നിറവും നിര്‍ദേശിച്ചിട്ടുണ്ട്. ലാമിനേറ്റഡ് അല്ലെങ്കില്‍ പി.വി.സി കാര്‍ഡ് രൂപത്തിലായിരിക്കും ലൈസന്‍സ്. ലൈസന്‍സ് ഉടമയുടെ രക്തഗ്രൂപ്പ്, മൊബൈല്‍ നമ്പര്‍, അടിയന്തര സാഹചര്യങ്ങളില്‍ ബന്ധപ്പെടാനുള്ള നമ്പറുകള്‍ എന്നിവ ഉള്‍പ്പെടുത്താനും നിര്‍ദേശമുണ്ട്. നിലവിലെ ലൈസന്‍സ് ഉടമകള്‍ എല്ലാവരും ഉടന്‍ കാര്‍ഡ് മാറ്റണമെന്ന പ്രഖ്യാപനമായി ഇതിനെ കാണേണ്ടതില്ല.
വിലാസം, ജനനത്തീയതി, തിരിച്ചറിയല്‍ എന്നിവ തെളിയിക്കാനുള്ള രേഖകളുടെ പട്ടികയും പരിഷ്‌കരിക്കുന്നുണ്ട്. വിലാസത്തിന് ആധാര്‍, വോട്ടര്‍ ഐഡി, പാസ്പോര്‍ട്ട്, ഇ-റേഷന്‍ കാര്‍ഡ് തുടങ്ങിയവയ്‌ക്കൊപ്പം മൂന്ന് മാസത്തിലധികം പഴക്കമില്ലാത്ത വൈദ്യുതി ബില്‍, ഗാര്‍ഹിക ഗ്യാസ് ബില്‍ എന്നിവയും നിര്‍ദേശിച്ചിട്ടുണ്ട്.
ഓരോ ആവശ്യത്തിനും അംഗീകരിക്കുന്ന രേഖകള്‍ വ്യത്യസ്തമാണ്. ഉദാഹരണത്തിന്, വിലാസം തെളിയിക്കാന്‍ ഉപയോഗിക്കാവുന്ന ഒരു രേഖ ജനനത്തീയതിയുടെ തെളിവായി സ്വീകരിക്കണമെന്നില്ല. അതിനാല്‍ അന്തിമ ചട്ടങ്ങള്‍ വരുമ്പോള്‍ അപേക്ഷയുടെ ആവശ്യത്തിനനുസരിച്ചുള്ള പട്ടിക പരിശോധിക്കേണ്ടി വരും.
കരട് പ്രസിദ്ധീകരിച്ചതിന് പിന്നാലെ ഫീസിളവ് ലഭിക്കുമെന്ന പ്രതീക്ഷയില്‍ അടിയന്തരമായ ലൈസന്‍സ് പുതുക്കലോ വിവരങ്ങള്‍ തിരുത്തലോ മാറ്റിവെക്കേണ്ട സാഹചര്യമില്ല. നിലവിലുള്ള ചട്ടങ്ങളും ബാധകമായ ഫീസുകളും അനുസരിച്ചാണ് ഇപ്പോള്‍ അപേക്ഷിക്കേണ്ടത്. കരടിന്മേല്‍ പൊതുജനങ്ങള്‍ക്കും ബന്ധപ്പെട്ടവര്‍ക്കും അഭിപ്രായങ്ങളും എതിര്‍പ്പുകളും അറിയിക്കാന്‍ 30 ദിവസത്തെ അവസരമാണ് നല്‍കിയിരിക്കുന്നത്. അവ പരിഗണിച്ചുള്ള അന്തിമ വിജ്ഞാപനവും തുടര്‍ന്ന് സേവനങ്ങളില്‍ വരുത്തുന്ന മാറ്റങ്ങളുമാണ് അപേക്ഷകര്‍ ശ്രദ്ധിക്കേണ്ടത്.
Read DhanamOnline in English
Subscribe to Dhanam Magazine
