വരുന്നൂ ഷവോമിയുടെ വൈദ്യുത കാര്‍, ടെസ്‌ലയ്ക്ക് വെല്ലുവിളി

ആധുനികലോകത്തിന്റെ നിര്‍ണായക മാറ്റങ്ങളിലൊന്നായ വൈദ്യുത കാര്‍ മേഖലയിലേക്കും ചുവടുവച്ചിരിക്കുകയാണ് പ്രമുഖ ചൈനീസ് കണ്‍സ്യൂമര്‍ ഇലക്ട്രിക് കമ്പനിയായ ഷവോമിയും. 300 കോടി യുവാനാണ് (ഏകദേശം 3600 കോടി രൂപ) ഇതിനായി ഷവോമി നിക്ഷേപിച്ചത്. ഷവോമി ഓട്ടോമൊബൈല്‍ എന്ന വിഭാഗവും രൂപീകരിച്ചു. ഫാക്ടറി നിര്‍മ്മാണം കഴിഞ്ഞവര്‍ഷം ചൈനീസ് തലസ്ഥാനമായ ബെയ്ജിംഗില്‍ ആരംഭിച്ചിരുന്നു. പത്തുവര്‍ഷത്തിനകം നിക്ഷേപം 1000 കോടി യുവാനായി (12,000 കോടി രൂപ) ഉയര്‍ത്തും.

ബി.വൈ.ഡിയില്‍ നിന്ന് കടംകൊള്ളുന്ന ലിഥിയം-അയോണ്‍ ഫോസ്‌ഫേറ്റ് (എല്‍.എഫ്.പി) ബാറ്ററിയാണ് ഷവോമി എം.എസ് 11ല്‍ ഉണ്ടാവുക. വാഹനം സ്വയം ഡ്രൈവ് ചെയ്യുന്ന ഓട്ടോണമസ് ഡ്രൈവിംഗ് ടെക്‌നോളജിയും പ്രതീക്ഷിക്കാം. മുന്‍കൂട്ടി നിശ്ചയിച്ച സ്ഥലത്തേക്ക് സെന്‍സറുകളുടെ സഹായത്തോടെ വഴികളും തടസങ്ങളും തിരിച്ചറിഞ്ഞ് സ്വയം ഡ്രൈവ് ചെയ്യുന്ന ടെക്‌നോളജിയാണിത്.