ആസ്റ്റര്‍ കൂടുതല്‍ ആശുപത്രികളെ ഏറ്റെടുക്കാനൊരുങ്ങുന്നു, ഇനി ശ്രദ്ധ ഇന്ത്യയില്‍
ലക്ഷ്യം മൂന്നു വര്‍ഷത്തിനുള്ളില്‍ 1,500 കിടക്കകള്‍ കൂട്ടിച്ചേര്‍ക്കുക
Image : asterhospitals.ae /canva
പ്രമുഖ ആരോഗ്യ സേവനദാതാക്കളായ ആസ്റ്റര്‍ ഡി.എം ഹെല്‍ത്ത്‌കെയര്‍ ഇന്ത്യയിലെ പ്രവര്‍ത്തനങ്ങള്‍ വിപുലപ്പെടുത്തുന്നതിന്റെ ഭാഗമായി സ്വകാര്യ ആശുപത്രികളെ ഏറ്റെടുക്കാനൊരുങ്ങുന്നു.ഇന്ത്യയിലെയും ഗള്‍ഫിലെയും ബിസിനസ് രണ്ട് സ്വതന്ത്ര കമ്പനികളായി വേര്‍തിരിച്ച ആസ്റ്റര്‍, ഇനി കൂടുതല്‍ ശ്രദ്ധയൂന്നുക ഇന്ത്യയിലാകും.
അടുത്ത മൂന്ന് വര്‍ഷത്തിനുള്ളില്‍ 1,500 കിടക്കകള്‍ കൂടി ആശുപത്രി ശൃംഖലയിലേക്ക് കൂട്ടിചേര്‍ക്കുകയാണ് ലക്ഷ്യം. നിലവില്‍ 4,800 ബെഡുകളാണ് ആസ്റ്ററിന് രാജ്യത്തുള്ളത്. ലിസ്റ്റ് ചെയ്തിട്ടില്ലാത്ത എന്നാല്‍ മികച്ച പ്രവര്‍ത്തനം കാഴ്ചവയ്ക്കുന്ന കമ്പനികളെ ഏറ്റെടുക്കാനാണ് ഉദ്ദേശിക്കുന്നതെന്ന് ബ്ലൂം ബെര്‍ഗ് ടെലിവിഷന് നല്‍കിയ അഭിമുഖത്തില്‍ ആസ്റ്റര്‍ ഡി.എം.ഹെല്‍ത്ത്‌കെയര്‍ ചെയര്‍മാനും മാനേജിംഗ് ഡയറക്ടറുമായ ആസാദ് മൂപ്പന്‍ പറഞ്ഞു.
കഴിഞ്ഞ മാസമാണ് ആസ്റ്ററിന്റെ ഗള്‍ഫ് ബിസിനസ് ആല്‍ഫ ജി.സി.സി ഹോള്‍ഡിംഗ്‌സിന് വിറ്റത്. 100 കോടി ഡോളറിന്റേതായിരുന്നു (ഏകദേശം 8,300 കോടി രൂപ) ഇടപാട്. ദുബൈയിലെ പ്രൈവറ്റ് ഇക്വിറ്റി സ്ഥാപനമായ ഫജ്‌ര്‍ ക്യാപിറ്റലിന്റെ നേതൃത്വത്തിലുള്ള കണ്‍സോര്‍ഷ്യമാണ് ആല്‍ഫ ജി.സി.സി. ഇതില്‍ ആസ്റ്റര്‍ ഗ്രൂപ്പിന് 35 ശതമാനം ഓഹരിയുണ്ട്. ബാക്കി 65 ശതമാനം ഓഹരിയും കൈവശം വയ്ക്കുന്ന ഫജ്‌റിനാണ് ഇനി ഗള്‍ഫ് ബിസിനസിന്റെ നിയന്ത്രണം. ഗള്‍ഫ് ബിസിനസിന്റെയും ചെയര്‍മാനായി ഡോ.ആസാദ് മൂപ്പന്‍ തുടരും. ഡോ.മൂപ്പന്റെ മകള്‍ അലീഷ മൂപ്പന്‍ ഗള്‍ഫ് ബിസിനസിന്റെ മാനേജിംഗ് ഡയറക്ടറും ഗ്രൂപ്പ് സി.ഇ.ഒയുമായിരിക്കും.