വമ്പൻ ഡിവിഡന്ഡ് നല്കാനൊരുങ്ങി ആസ്റ്റര് ഡി.എം ഹെല്ത്ത്കെയര്; ഓഹരി കുതിച്ചുയര്ന്നു
![Aster Hospital, Dr Azaad Moopen, Alisha Moopen Aster Hospital, Dr Azaad Moopen, Alisha Moopen](https://dhanamonline.com/h-upload/2023/11/29/1822508-aster-hospital-dr-azaad-moopen-alisha-moopen.webp)
ഡോ. ആസാദ് മൂപ്പൻ, അലീഷ മൂപ്പൻ/Image : Aster Website
മലയാളിയായ ഡോ. ആസാദ് മൂപ്പന്റെ നേതൃത്വത്തിലുള്ള പ്രമുഖ ആരോഗ്യ സേവന ശൃംഖയായ ആസ്റ്റര് ഡി.എം ഹെല്ത്ത്കെയര് ഗള്ഫ് ബിസിനസ് വിറ്റഴിച്ച് നേടുന്ന പണത്തിന്റെ നല്ലൊരു പങ്ക് ഡിവിഡന്ഡ് വിതരണത്തിനായി ഉപയോഗിക്കാനൊരുങ്ങുന്നു. ഓഹരിയൊന്നിന് 110-120 രൂപ വീതം ഓഹരിയുടമകള്ക്ക് ഡിവിഡന്ഡ് നല്കാനുണുദ്ദേശിക്കുന്നതെന്ന് എക്സ്ചേഞ്ചുകള്ക്ക് നല്കിയ റിപ്പോര്ട്ടില് ആസ്റ്റര് പറഞ്ഞു. ഓഹരിയുടമകളുടെ അനുമതിക്കും വില്പ്പന ഇടപാട് പൂര്ത്തിയാക്കലിനും ശേഷമായിരിക്കും ഡിവിഡന്ഡ് പ്രഖ്യാപിക്കുക.
പ്രമോട്ടര്മാര്ക്ക് സ്വന്തംപേരിലും വിവിധ കമ്പനികളുടെ പേരിലുമായി 20.92 കോടി ഓഹരികള് (41.88%) ആസ്റ്റര് ഡി.എം ഹെല്ത്ത്കെയറിലുണ്ട്. 120 രൂപ വീതം ഡിവിഡന്ഡ് പ്രഖ്യാപിച്ചാല് 2,510 കോടി രൂപയോളം പ്രമോട്ടര്മാരുടെ കീശയില് വീഴും. മൊത്തം 49.95 കോടി ഓഹരികളാണ് ആസ്റ്റര് ഡി.എം ഹെല്ത്ത്കെയറിനുള്ളത്. അതിനാല് ഓഹരിയൊന്നിന് 120 രൂപ വീതം ഡിവിഡന്ഡ് പ്രഖ്യാപിച്ചാല് 5,994 കോടി രൂപയോളം ഇതിനായി വേണ്ടി വരും.
ഓഹരിയില് കുതിപ്പ്
ഡിവിഡന്റ് വാര്ത്തകളെ തുടര്ന്ന് ആസ്റ്റര് ഡി.എം ഹെല്ത്ത്കെയര് ഓഹരികള് ഇന്ന് 11 ശതമാനത്തോളം കുതിച്ചു കയറി. 52 ആഴ്ചത്തെ ഉയര്ന്ന വിലയും പിന്നിട്ട ഓഹരി 449.70 രൂപയിലാണ് നിലവില് വ്യാപാരം നടത്തുന്നത്. കഴിഞ്ഞ മൂന്നു വര്ഷത്തില് 163 ശതമാനത്തലധികം നേട്ടമാണ് ഓഹരി നല്കിയിട്ടുള്ളത്. ഒരു വര്ഷക്കാലയളവില് 92 ശതമാനവും മൂന്ന് മാസക്കാലയളവില് 27 ശതമാനവുമാണ് ഓഹരിയുടെ നേട്ടം.
ഗള്ഫ് ബിസിനസ്
ഗള്ഫില് 1,439 കിടക്കകളോടെ മൊത്തം 15 ആശുപത്രികളാണ് ആസ്റ്ററിനുള്ളത്. ഇതു കൂടാതെ 115 ക്ലിനിക്കുകളും 264 ഫാര്മസികളും പ്രവര്ത്തിക്കുന്നു.