സംസ്ഥാനത്ത് സ്വര്ണ വിലയില് വന് ഇടിവ്. ഇന്ന് ഗ്രാമിന് ഒറ്റയടിക്ക് 275 രൂപ കുറഞ്ഞ് 14,000 രൂപയും പവന് 2,200 രൂപ താഴ്ന്ന് 1,12,000 രൂപയുമായി. 18 കാരറ്റിന് ഗ്രാമിന് 225 രൂപ കുറഞ്ഞ് 11,505 രൂപയിലെത്തി 14 കാരറ്റിന് ഗ്രാമിന് 8,960 രൂപയും ഒമ്പത് കാരറ്റിന് ഗ്രാമിന് 5,775 രൂപയുമാണ് വില. വെള്ളി വിലയും ഇടിവിലാണ്. ഗ്രാമിന് 10 രൂപ കുറഞ്ഞ് 265 രൂപയായി.
ഇന്നലെ രാജ്യാന്തര സ്വര്ണ വില ഏകദേശം 3.6% ഇടിഞ്ഞ് ഔണ്സിന് 4,315.35 ഡോളറായി കുറഞ്ഞു. ഇതോടെ ഈ വര്ഷം ഇതുവരെ നേടിയ മുന്നേറ്റങ്ങളെല്ലാം സ്വര്ണത്തിന് നഷ്ടമായി. ശക്തമായ തൊഴില് വിപണി നിലനില്ക്കുന്നതിനാല്, യുദ്ധം മൂലമുണ്ടാകുന്ന ഊര്ജ്ജ-ഇന്ധന വിലക്കയറ്റത്തിന്റെ പശ്ചാത്തലത്തില് പലിശനിരക്ക് വര്ധിപ്പിക്കുന്ന കാര്യം ഫെഡറല് റിസര്വ് പരിഗണിച്ചേക്കാമെന്ന ആശങ്കകളാണ് സ്വര്ണത്തിന്റെ വിലയെ ബാധിച്ചത്. സാധാരണയായി പലിശനിരക്ക് ഉയരുന്നത് പലിശയോ മറ്റ് വരുമാനമോ നല്കാത്ത സ്വര്ണത്തിന്റെ വിലയെ പ്രതികൂലമായി ബാധിക്കാറുണ്ട്.
യു.എസില് നിന്നുള്ള ശക്തമായ തൊഴില് കണക്കുകള്, യു.എസ് ഫെഡറല് റിസര്വ് പലിശനിരക്ക് വര്ദ്ധിപ്പിച്ചേക്കുമെന്ന പ്രവചനങ്ങള്, യു.എസും ഇറാനും തമ്മില് ഉടനെങ്ങും സമാധാന കരാറിന് സാധ്യതയില്ലെന്ന സൂചനകള്, അതോടൊപ്പം സുപ്രധാനമായ ഹോര്മുസ് കടലിടുക്കില് നിലനില്ക്കുന്ന അനിശ്ചിതത്വം എന്നിവയെത്തുടര്ന്ന് സ്വര്ണത്തിന് തിളക്കം നഷ്ടപ്പെടുകയും 2026-ല് കൈവരിച്ച നേട്ടങ്ങളെല്ലാം ഇല്ലാതാവുകയും ചെയ്തിട്ടുണ്ട്.
മേയ് മാസത്തില് യു.എസിലെ തൊഴില് വളര്ച്ച എല്ലാ പ്രവചനങ്ങളെയും മറികടന്നു. അതേസമയം തൊഴിലില്ലായ്മ നിരക്ക് 4.3 ശതമാനമായി മാറ്റമില്ലാതെ തുടര്ന്നു. ദീര്ഘനാളത്തെ മന്ദഗതിയിലുള്ള നിയമനങ്ങള്ക്ക് ശേഷം രാജ്യത്തെ തൊഴില് വിപണി ശക്തമായി തിരിച്ചുവരുന്നതിന്റെ ഏറ്റവും വ്യക്തമായ സൂചനയാണിത്.
2026 ജനുവരി 29ന് രേഖപ്പെടുത്തിയ ഔണ്സിന് 5,995 ഡോളറാണ് ഇതുവരെയുള്ള റെക്കോഡ് വില. അതുമായി നോക്കുമ്പോള് 19.83 ശതമാനം ഇടിവാണ് രേഖപ്പെടുത്തുന്നത്. കേരളത്തില് പവന് വില ജനുവരി 29ന് 13,1160 രൂപയിലെത്തിയ ശേഷമാണ് വലിയ ഇടിവിലേക്ക് നീങ്ങിയത്. ഇന്നത്തെ നിരക്കനുസരിച്ച് കേരളത്തില് ഒരു പവന് ആഭരണം വാങ്ങാന് പണിക്കൂലിയും നികുതിയുമടക്കം 1,21,293 രൂപയാണ് നല്കേണ്ടത്.
Gold and silver prices witness a sharp decline in Kerala following strong US jobs data and geopolitical tensions.
Read DhanamOnline in English
Subscribe to Dhanam Magazine
