മൂന്നാം നാളും സ്വര്‍ണം മുന്നോട്ട്, മിഡിൽ ഈസ്റ്റിൽ തീ പുകയുമ്പോൾ സ്വർണം ഇനിയും കുതിക്കുമോ?

സംസ്ഥാനത്ത് തുടര്‍ച്ചയായ മൂന്നാം ദിവസവും സ്വര്‍ണ വില മുന്നോട്ട്. ഇന്ന് ഗ്രാമിന് 70 രൂപ ഉയര്‍ന്ന് 13,220 രൂപയും പവന് 560 രൂപ ഉയര്‍ന്ന് 1,05,760 രൂപയുമായി. 18 കാരറ്റിന് ഗ്രാമിന് 55 രൂപയാണ് കൂടിയത്. ഇതോടെ വില 10,860 രൂപയിലേക്കെത്തി. 14 കാരറ്റിന് 45 രൂപ ഉയര്‍ന്ന് 8,465 രൂപയും ഒമ്പത് കാരറ്റിന് 30 രൂപ ഉയര്‍ന്ന് 5,460 രൂപയുമായി.

വെള്ളി വിലയില്‍ ഇന്നും മാറ്റമില്ല. ഗ്രാമിന് 235 രൂപ. തുടര്‍ച്ചയായ മൂന്നാം ദിവസമാണ് വെള്ളി വില അനങ്ങാതെ നില്‍ക്കുന്നത്.

മിഡില്‍ ഈസ്റ്റ് സംഘര്‍ഷം അവസാനിപ്പിക്കാനുള്ള നയതന്ത്ര നീക്കങ്ങളെക്കുറിച്ചുള്ള റിപ്പോര്‍ട്ടുകള്‍ ക്രൂഡ് ഓയില്‍ വിയില്‍ ഇടിവുണ്ടാക്കിയത് സ്വര്‍ണം പോലുള്ള അമൂല്യ ലോഹങ്ങളോട് താത്പര്യം വര്‍ധിപ്പിച്ചതാണ് വിലയില്‍ മുന്നേറ്റമുണ്ടാക്കിയത്. രാജ്യാന്തര വില ഔണ്‍സിന് 0.71 ശതമാനത്തോളം വര്‍ധിച്ച് 4,038 ഡോളറിലെത്തി.

യുദ്ധം മുറുകുമ്പോള്‍ സ്വര്‍ണം താഴുമോ?

ഇറാനെ ലക്ഷ്യമിട്ടുള്ള ഏറ്റവും പുതിയ വ്യോമാക്രമണങ്ങള്‍ യുഎസ് അവസാനിപ്പിച്ചതിനെത്തുടര്‍ന്ന് ബ്രെന്റ് ക്രൂഡ് ഓയില്‍ വില ബാരലിന് 90 ഡോളറിന് താഴേക്ക് എത്തിയിട്ടുണ്ട്. മേഖലയിലെ സംഘര്‍ഷം അവസാനിപ്പിക്കാനുള്ള നയതന്ത്ര ശ്രമങ്ങളുടെ ലക്ഷണങ്ങള്‍ക്കിടയിലും സംഘര്‍ഷാവസ്ഥ രൂക്ഷമായിത്തന്നെ തുടരുകയാണ്.

സൗദി അറേബ്യയ്ക്ക് മേല്‍ നാവിക ഉപരോധം ഏര്‍പ്പെടുത്തുമെന്ന് ഇറാന്റെ പിന്തുണയുള്ള ഹൂതികള്‍ അറിയിച്ചു. ഇത് യുഎസ്-ഇറാന്‍ യുദ്ധത്തില്‍ പുതിയൊരു പോര്‍മുഖം തുറക്കാനും ഗള്‍ഫിന് അപ്പുറത്തേക്ക് ആഗോള ഊര്‍ജ്ജ വിതരണത്തിനും വ്യാപാരത്തിനും ഭീഷണിയുയര്‍ത്താനും സാധ്യതയുണ്ട്.

യുഎസ്-ഇറാന്‍ സംഘര്‍ഷം എണ്ണവില ബാരലിന് 90 ഡോളറിന് മുകളിലേക്ക് എത്തിച്ചിരുന്നുു. ഇത് വര്‍ധിച്ചുവരുന്ന പണപ്പെരുപ്പം തടയുന്നതിനായി യുഎസ് ഫെഡറല്‍ റിസര്‍വും മറ്റ് ആഗോള കേന്ദ്ര ബാങ്കുകളും സാമ്പത്തിക നയങ്ങള്‍ കൂടുതല്‍ കര്‍ശനമാക്കുമെന്ന ഭയം വര്‍ധിപ്പിച്ചിട്ടുണ്ട്.

പലിശ നിരക്കുകള്‍ ഉയരുന്നത് സ്വര്‍ണം പോലെ പലിശ വരുമാനം ലഭിക്കാത്ത ഒരു നിക്ഷേപം കൈവശം വെക്കുന്നതിന്റെ ചിലവ് (opportunity cost) വര്‍ധിപ്പിക്കുന്നതിനാല്‍, സാമ്പത്തിക നയങ്ങള്‍ കര്‍ശനമാക്കുന്ന സമയത്ത് സ്വര്‍ണവില കുറയാനാണ് സാധ്യത.

ഇന്ന് ഒരു പവന്‍ ആഭരണത്തിന് നല്‍കേണ്ടത്

ഇന്ന് ഒരു പവന്‍ സ്വര്‍ണത്തിന്റെ വില 1,05,760 രൂപയാണെങ്കിലും മനസിനിണങ്ങിയ സ്വര്‍ണാഭരണം വാങ്ങാന്‍ കൂടുതല്‍ പണം കൊടുക്കേണ്ടി വരും. ഇന്നത്തെ വിലക്കൊപ്പം ഏറ്റവും കുറഞ്ഞത് അഞ്ച് ശതമാനം പണിക്കൂലി, സ്വര്‍ണത്തിനും പണിക്കൂലിക്കും മൂന്ന് ശതമാനം നികുതി, 45 രൂപ ഹാള്‍മാര്‍ക്ക് ചാര്‍ജ്, അതിന് 18 ശതമാനം നികുതി എന്നിവയും ചേര്‍ത്ത് 1,14,538 രൂപയാകും. എന്നാല്‍ ആഭരണങ്ങളുടെ ഡിസൈന്‍ അനുസരിച്ച് പണിക്കൂലിയിലും വ്യത്യാസമുണ്ടാകുമെന്ന് മറക്കരുത്. ഇത് സ്വര്‍ണവിലയിലും പ്രതിഫലിക്കും.

Kerala gold rates hit new highs crossing Rs 1.05 lakh per sovereign for the third straight day, driven by Middle East conflicts, while crude oil shifts keep investors guessing on future trends.