2025-26 സാമ്പത്തിക വര്‍ഷത്തെ സംസ്ഥാന ബജറ്റില്‍ ബാര്‍ ഹോട്ടലുകള്‍ക്കായി പ്രഖ്യാപിച്ച ആംനെസ്റ്റി പദ്ധതി പ്രകാരം കുടിശ്ശിക ഒടുക്കാത്തവര്‍ക്കെതിരെ അരിയര്‍ റിക്കവറി നടപടികളുമായി സംസ്ഥാന ജി.എസ്.ടി വകുപ്പ് . ജൂണ്‍ 20, 21, 23 തീയതികളില്‍ സംസ്ഥാന വ്യാപകമായി 65 ലധികം ബാര്‍ ഹോട്ടലുകളില്‍ നടത്തിയ അരിയര്‍ റിക്കവറി ഡ്രൈവില്‍ 3.5 കോടിയാണ് പിരിച്ചെടുത്തത്.
വകുപ്പ് നടത്തിയ അരിയര്‍ റിക്കവറി ഡ്രൈവിലൂടെ 11 ഓളം ഹോട്ടലുകള്‍ ആംനെസ്റ്റി പദ്ധതിയുടെ ഭാഗമായി. 25 ലധികം ഹോട്ടല്‍ ഉടമകള്‍ പദ്ധതിയുടെ ഭാഗമാകാന്‍ താത്പര്യം പ്രകടിപ്പിച്ചതായി സംസ്ഥാന ചരക്ക് സേവന നികുതി വകുപ്പ് കമ്മീഷണര്‍ അറിയിച്ചു.
ബാര്‍ ഹോട്ടലുകാര്‍ 2005-06 മുതല്‍ 2020-21 വര്‍ഷം വരെയുള്ള എല്ലാ ടേണ്‍ഓവര്‍ ടാക്‌സ് കുടിശ്ശികകളും തീര്‍പ്പാക്കാനായി പൂര്‍ണമായ ടേണ്‍ഓവര്‍ ടാക്‌സ് കുടിശ്ശികയും സെസ്സും, പലിശയുടെ അന്‍പത് ശതമാനവും ഇ-ട്രഷറി പോര്‍ട്ടലായ www.etreasury.kerala.gov.in എന്ന വെബ് സൈറ്റ് വഴി ഒടുക്കിയ ശേഷം അതിന്റെ ഇ - ചെല്ലാനും ആംനെസ്റ്റിക്കായുള്ള ഓഫ്ലൈന്‍ അപേക്ഷയും 2025 ജൂണ്‍ 30 നുള്ളില്‍ അസസിങ് അതോറിറ്റി മുന്‍പാകെ സമര്‍പ്പിച്ചാല്‍ ബാക്കി പലിശയും പിഴയും ഒഴിവാക്കുന്നതാണ്.
2025-2026 ലെ സംസ്ഥാന ബ്ജറ്റില്‍ പ്രഖ്യാപിച്ച ആംനെസ്റ്റി പദ്ധതി 2025 ജൂണ്‍ 30 ന് അവസാനിക്കും. ജനറല്‍ ആംനെസ്റ്റി പദ്ധതി 2025, ഫ്‌ലഡ് സെസ്സ് ആംനെസ്റ്റി 2025, ബാര്‍ ഹോട്ടലുകള്‍ക്കായുള്ള ആംനെസ്റ്റി 2025, ഡിസ്റ്റിലറി അരിയര്‍ സെറ്റില്‍മെന്റ് സ്‌കീം 2025 എന്നീ നാല് തരത്തിലുള്ള ആംനെസ്റ്റി പദ്ധതികളാണ് സംസ്ഥാന സര്‍ക്കാര്‍ പ്രഖ്യാപിച്ചിട്ടുള്ളത്.
ജി.എസ്.ടി നിയമം നിലവില്‍ വരുന്നതിനു മുന്‍പുള്ള നികുതി നിയമങ്ങളുമായി ബന്ധപ്പെട്ട കുടിശ്ശികകള്‍ തീര്‍പ്പാക്കുന്നതിനു വേണ്ടി നടപ്പിലാക്കിയ സമഗ്ര കുടിശ്ശിക നിവാരണ പദ്ധതിയാണ് ജനറല്‍ ആംനെസ്റ്റി പദ്ധതി 2025. പദ്ധതിയില്‍ ഭാഗമാകുന്നവര്‍ക്ക് കുടിശ്ശികയിലുള്ള നികുതിയുടെ നിശ്ചിത ശതമാനം കിഴിവും, പിഴയിലും പലിശയിലും പൂര്‍ണ്ണ ഒഴിവും ലഭ്യമാകുന്നതാണ്. പദ്ധതി പ്രകാരം ബാധകമാകുന്ന നിരക്കിലുള്ള നികുതി തുക ഇ-ട്രഷറി പോര്‍ട്ടലായ www.etreasury.kerala.gov.in എന്ന വെബ് സൈറ്റ് വഴി അടച്ചതിനു ശേഷം അപ്രകാരം അടച്ചതിന്റെ വിവരങ്ങളും അനുബന്ധ ചലാനുകളും ഉള്‍പ്പെടുത്തിക്കൊണ്ടുള്ള അപേക്ഷ 2025 ജൂണ്‍ 30 നകം സംസ്ഥാന ചരക്ക് സേവന നികുതി വകുപ്പിന്റെ വെബ് സൈറ്റായ www.keralataxes.gov.in വഴി ഓണ്‍ലൈനായി സമര്‍പ്പിക്കേണ്ടതാണ്.
2019 ആഗസ്റ്റ് മുതല്‍ 2021 ജൂലൈ വരെയുള്ള കാലയളവിലെ ഫ്‌ലഡ് സെസ്സ് ഒടുക്കുവാന്‍ ബാക്കിയുള്ളവര്‍, 2025 ജൂണ്‍ 30 നുള്ളില്‍ ഇ-ട്രഷറി പോര്‍ട്ടലായ www.etreasury.kerala.gov.in എന്ന വെബ് സൈറ്റ് വഴി കുടിശ്ശികവന്ന സെസ്സ് തുക ഒടുക്കി അസ്സസ്സിങ് അതോറിറ്റിയെ അറിയിച്ചാല്‍, ഫ്‌ലഡ് സെസ്സ് ആംനെസ്റ്റി, 2025 പ്രകാരം പലിശയും, പിഴയും പൂര്‍ണ്ണമായും ഒഴിവാക്കുന്നതാണ്.
സംസ്ഥാന സര്‍ക്കാര്‍ പ്രഖ്യാപിച്ച ഈ ആംനെസ്റ്റി പദ്ധതി നികുതിദായകര്‍ പരമാവധി പ്രയോജനപ്പെടുത്തണമെന്നും കുടിശ്ശിക ഉണ്ടായിട്ടും ഈ അവസരം പ്രയോജനപ്പെടുത്തി നികുതി കുടിശ്ശിക തീര്‍പ്പാക്കത്തവര്‍ക്കെതിരെ കര്‍ശനമായ റിക്കവറി നടപടികള്‍ തുടരുമെന്നും സംസ്ഥാന ചരക്ക് സേവന നികുതി വകുപ്പ് കമ്മീഷണര്‍ അറിയിച്ചു.
Read DhanamOnline in English
Subscribe to Dhanam Magazine
