ഇ-രൂപ ഇനി വിദേശത്തേക്കും; തായ്ലന്‍ഡും മലേഷ്യയുമായി ബന്ധിപ്പിക്കാന്‍ റിസര്‍വ് ബാങ്ക്

അതിര്‍ത്തി കടന്നുള്ള ധനമിടപാടുകള്‍ കൂടുതല്‍ വേഗത്തിലും ചെലവുകുറഞ്ഞതുമാക്കാന്‍ ഡിജിറ്റല്‍ രൂപയെ (CBDC - Central Bank Digital Currency) അയല്‍രാജ്യങ്ങളുടെ ഡിജിറ്റല്‍ കറന്‍സി ശൃംഖലകളുമായി ബന്ധിപ്പിക്കാന്‍ റിസര്‍വ് ബാങ്ക് ഓഫ് ഇന്ത്യ (RBI) നടപടികള്‍ വേഗത്തിലാക്കുന്നു. തായ്ലന്‍ഡ്, മലേഷ്യ, വിയറ്റ്നാം തുടങ്ങിയ തെക്കുകിഴക്കന്‍ ഏഷ്യന്‍ രാജ്യങ്ങളുമായി ഇത് സംബന്ധിച്ച പ്രാഥമിക ചര്‍ച്ചകള്‍ ആരംഭിച്ചു കഴിഞ്ഞതായി മണി കണ്‍ട്രോള്‍ റിപ്പോര്‍ട്ട് ചെയ്യുന്നു.

ലളിതമായ ക്യു.ആര്‍ കോഡ് (QR Code) സംവിധാനത്തിലൂടെ വിദേശ രാജ്യങ്ങളില്‍ ഇടപാടുകള്‍ നടത്താന്‍ സാധിക്കുന്ന തരത്തിലാണ് പുതിയ നീക്കം. നിലവില്‍ റീട്ടെയില്‍ ഇ-രൂപ (e-Rupee) ഉപയോഗിച്ചുള്ള ഇടപാടുകള്‍ വ്യാപിപ്പിക്കുന്നതിന്റെ ഭാഗമായാണ് ആര്‍.ബി.ഐ വിദേശ കേന്ദ്രബാങ്കുകളുമായി കൈകോര്‍ക്കുന്നത്.

ഡിജിറ്റല്‍ ഇടപാടുകളിലെ പുതിയ വിപ്ലവത്തിന് ഇന്ത്യ

ഇന്ത്യയുടെ തദ്ദേശീയ യു.പി.ഐ (UPI) ശൃംഖലയെ നേരത്തെ തന്നെ സിംഗപ്പൂരിലെ പേനൗ (PayNow) സംവിധാനവുമായി ബന്ധിപ്പിച്ചിരുന്നു. ഇതിന്റെ തുടര്‍ച്ചയായാണ് കേന്ദ്രബാങ്ക് ഡിജിറ്റല്‍ കറന്‍സിയെയും (CBDC) അന്താരാഷ്ട്ര തലത്തിലേക്ക് ഉയര്‍ത്തുന്നത്. നിലവില്‍ ബാങ്ക് ഇടനിലക്കാര്‍ വഴി വിദേശത്തേക്ക് പണം അയക്കുമ്പോള്‍ ഈടാക്കുന്ന ഉയര്‍ന്ന കമ്മീഷനും സമയനഷ്ടവും ഇല്ലാതാക്കാന്‍ ഇ-രൂപയിലൂടെ സാധിക്കും.

പ്രവാസി മലയാളി സമൂഹത്തിനും വിനോദസഞ്ചാരികള്‍ക്കും ഏറെ ആശ്വാസം പകരുന്ന തീരുമാനമാണിത്. തായ്ലന്‍ഡ്, മലേഷ്യ തുടങ്ങിയ രാജ്യങ്ങളിലേക്ക് വന്‍തോതില്‍ മലയാളി ടൂറിസ്റ്റുകള്‍ യാത്ര ചെയ്യുന്ന സാഹചര്യത്തില്‍, കറന്‍സി എക്സ്ചേഞ്ച് ഏജന്‍സികളെ ആശ്രയിക്കാതെ നേരിട്ട് ഡിജിറ്റല്‍ രൂപ വഴി പണമടയ്ക്കാന്‍ ഭാവിയില്‍ സാധിക്കും. കൂടാതെ ഈ രാജ്യങ്ങളിലുള്ള ചെറുകിട മലയാളി സംരംഭകര്‍ക്കും ബിസിനസ് ഇടപാടുകള്‍ ലളിതമാക്കാം.

ആസിയാന്‍ (ASEAN) രാജ്യങ്ങളുമായുള്ള സാമ്പത്തിക ബന്ധം ശക്തമാക്കി കൊണ്ടുപോകുന്നതിന്റെ ഭാഗമായാണ് തെക്കുകിഴക്കന്‍ ഏഷ്യന്‍ രാജ്യങ്ങളെ റിസര്‍വ് ബാങ്ക് പ്രധാനമായും ലക്ഷ്യമിടുന്നത്. ഇന്ത്യയില്‍ ഡിജിറ്റല്‍ രൂപയുടെ പൈലറ്റ് പ്രോജക്റ്റ് വിജയകരമായി മുന്നേറുന്ന പശ്ചാത്തലത്തില്‍, ക്രോസ്-ബോര്‍ഡര്‍ പേയ്മെന്റുകള്‍ക്ക് ഇ-രൂപ ഉപയോഗിക്കുന്നത് അന്താരാഷ്ട്ര തലത്തില്‍ ഇന്ത്യന്‍ രൂപയുടെ മൂല്യവും പ്രസക്തിയും വര്‍ധിപ്പിക്കാന്‍ സഹായിക്കും.

സ്മാര്‍ട്ട് ഫോണുകള്‍ ഉപയോഗിച്ച് ആപ്പുകള്‍ വഴിയോ ഫിസിക്കല്‍ കാര്‍ഡുകള്‍ വഴിയോ വിദേശ രാജ്യങ്ങളിലും ക്യു.ആര്‍ കോഡ് സ്‌കാന്‍ ചെയ്ത് നേരിട്ട് ഇടപാടുകള്‍ നടത്താന്‍ കഴിയും വിധമാണ് പദ്ധതി തയ്യാറാക്കുന്നത്. ഇതിലൂടെ വിദേശനാണ്യ വിനിമയ നിരക്കിലെ സങ്കീര്‍ണതകള്‍ വലിയ അളവില്‍ കുറയ്ക്കാനാവുമെന്നാണ് സാമ്പത്തിക വിദഗ്ധരുടെ വിലയിരുത്തല്‍.

RBI is in talks to integrate India's Central Bank Digital Currency (e-Rupee) with Asian nations to streamline cross-border payments and reduce transaction costs.