ഇന്ത്യയിലെ ഏറ്റവും വിലപിടിപ്പുള്ള സുഗന്ധവ്യഞ്ജനമാണ് കുങ്കുമപ്പൂവ് (Saffron). കശ്മീരിലെ തണുപ്പാർന്ന കാലാവസ്ഥയിൽ മാത്രം സമൃദ്ധമായി വളരുന്ന ഈ വിള, ഇപ്പോൾ കേരളത്തിന്റെ മണ്ണിലും (ഇൻഡോർ സാഹചര്യങ്ങളിൽ) വിജയകരമായി പൂവിട്ടിരിക്കുകയാണ്. തൃശ്ശൂർ ജില്ലയിലെ പുത്തൂർ സ്വദേശിയായ ജെയിംസ് കാപ്പൻ ആണ് കശ്മീരി കുങ്കുമപ്പൂവ് കൃഷി കേരളത്തിൽ യാഥാർത്ഥ്യമാക്കിയിരിക്കുന്നത്.
വിദേശത്ത് പ്രതിരോധ വകുപ്പിൽ ജോലി ചെയ്ത് നാട്ടിൽ തിരിച്ചെത്തിയ ജെയിംസ്, കൃഷിയിൽ താൽപര്യമുള്ള ഒരു സംരംഭകനാണ്. വിപണിയിലെ കുങ്കുമപ്പൂവിന്റെ വലിയ ഡിമാൻഡ് മനസ്സിലാക്കിയ അദ്ദേഹം, കശ്മീരിൽ നിന്ന് 'കോംസ്' (വിത്തുകൾ) ശേഖരിച്ച് തന്റെ വീട്ടിൽ ഒരു ഹൈടെക് കൃഷി കേന്ദ്രം സ്ഥാപിച്ചു.
കശ്മീരിലെ കാലാവസ്ഥ കേരളത്തിൽ പുനഃസൃഷ്ടിക്കാൻ എയറോപോണിക്സ് (Aeroponics) എന്ന മണ്ണില്ലാ കൃഷി രീതിയാണ് ഇവിടെ അവലംബിച്ചത്. കൃത്യമായ താപനില, ഈർപ്പം, ആവശ്യമായ അളവിലുള്ള അൾട്രാവയലറ്റ് രശ്മികൾ എന്നിവ നിയന്ത്രിത സാഹചര്യങ്ങളിൽ നൽകിയാണ് ഇത് സാധ്യമാക്കിയത്.
തണുപ്പുള്ള കാലാവസ്ഥ ആവശ്യമുള്ള ഈ ചെടിക്ക് അനുകൂലമായ അന്തരീക്ഷം ഒരുക്കുന്നതിനായി റായ്പൂരിലെ (ഛത്തീസ്ഗഢ്) കശ്മീർ കേസര് അഗ്രി ടെക് എന്ന സ്ഥാപനവുമായി സഹകരിച്ചാണ് ഈ ഇൻഡോർ കൃഷിരീതി തുടങ്ങിയത്.
ആദ്യഘട്ട വിളവെടുപ്പ് വിജയകരമായി പൂർത്തിയാക്കിയതോടെ, ജെയിംസ് തന്റെ 'കാശ്മീരി കേസർ അഗ്രി ടെക്' സംരംഭം വിപുലീകരിക്കാൻ ഒരുങ്ങുകയാണ്. ഒരു കിലോ കുങ്കുമപ്പൂവിന് 3 ലക്ഷം രൂപ മുതൽ 6 ലക്ഷം രൂപ വരെ വിലയുള്ളതിനാൽ ഈ കൃഷി വലിയ വരുമാന സാധ്യത നൽകുന്നുണ്ട്.
കശ്മീരി കുങ്കുമപ്പൂവിന് ലഭിച്ചിട്ടുള്ള ഭൂമിശാസ്ത്രപരമായ അംഗീകാരം (GI Tag) അതിന്റെ ഗുണമേന്മ ഉറപ്പാക്കുന്നു. പരമ്പരാഗത കൃഷി രീതികളെ ആശ്രയിക്കാതെ, നൂതന സാങ്കേതികവിദ്യയുടെ സഹായത്തോടെ കേരളത്തിലും വിലയേറിയ കുങ്കുമപ്പൂവ് കൃഷി ചെയ്യാൻ കഴിയുമെന്ന ആത്മവിശ്വാസം ഈ വിജയം നൽകുന്നു. ഈ മേഖലയിൽ കൂടുതൽ സംരംഭകർക്ക് കടന്നുവരാനും കർഷകർക്ക് പുതിയൊരു വരുമാനമാർഗം കണ്ടെത്താനും പ്രചോദനമാകുന്നതാണ് ഈ വിജയം.
Kashmiri saffron in Kerala: success story of James Kappan's high-tech cultivation in Thrissur
Read DhanamOnline in English
Subscribe to Dhanam Magazine
