സംസ്ഥാന വനംവകുപ്പിന്റെ വന്യജീവി സംരക്ഷണ പ്രവർത്തനങ്ങൾക്കും ജനങ്ങളുടെ സുരക്ഷയ്ക്കും കരുത്തേകിക്കൊണ്ട് കെ.ഇ.എഫ്. ഹോസ്പിറ്റാലിറ്റി ഇന്ത്യ പ്രൈവറ്റ് ലിമിറ്റഡ് നാല് റാപ്പിഡ് റെസ്പോൺസ് ടീം (RRT) വാഹനങ്ങൾ കൈമാറി. കമ്പനിയുടെ കോർപ്പറേറ്റ് എൻവയോൺമെൻ്റൽ റെസ്പോൺസിബിലിറ്റി (CER) പദ്ധതിയുടെ ഭാഗമായാണ് ഈ നിർണായക സഹായം നൽകിയത്.
ഏകദേശം 92 ലക്ഷം രൂപ ചെലവഴിച്ചാണ് വാഹനങ്ങളും മറ്റ് രക്ഷാപ്രവർത്തന സാമഗ്രികളും സജ്ജീകരിച്ചിരിക്കുന്നത്. ഇതിൽ ഉൾപ്പെടുന്ന പ്രധാന ഇനങ്ങള് താഴെ പറയുന്നവയാണ്:
മൂന്ന് ബൊലേറോ ക്യാമ്പർ 4WD വാഹനങ്ങളും ഒരു ബൊലേറോ B6 OPT വാഹനവും.
രണ്ട് റിമോട്ട് കൺട്രോൾ ഡ്രോണുകൾ.
ജി.പി.എസ് സംവിധാനമുള്ള 40 ജി.എസ്.എം. ക്യാമറ ട്രാപ്പുകൾ.
മൊബൈൽ ഹാൻഡ്ഹെൽഡ് കമ്മ്യൂണിക്കേഷൻ ഉപകരണങ്ങൾ, ലാപ്ടോപ്പുകൾ, പ്രിന്ററുകൾ.
കടുവ, പുലി, കുരങ്ങ് എന്നിവയെ പിടികൂടുന്നതിനുള്ള പ്രത്യേക കൂടുകൾ.
കെ.ഇ.എഫ്. ഹോസ്പിറ്റാലിറ്റി ചെയർമാൻ ഫൈസൽ കൊട്ടിക്കോളൻ, വൈസ് ചെയർവുമൺ ഷബാന ഫൈസൽ എന്നിവർ ചേർന്ന് വാഹനങ്ങളുടെ ഫ്ലാഗ് ഓഫ് കർമ്മം നിർവഹിച്ചു. മനുഷ്യനും വന്യജീവികളും തമ്മിലുള്ള വർദ്ധിച്ചുവരുന്ന സംഘർഷങ്ങൾ കൈകാര്യം ചെയ്യുന്നതിൽ വനംവകുപ്പ് ഉദ്യോഗസ്ഥർ നേരിടുന്ന വെല്ലുവിളികൾക്ക് ഈ അത്യാധുനിക സംവിധാനങ്ങൾ വലിയ പരിഹാരമാകുമെന്ന് ഡിവിഷണൽ ഫോറസ്റ്റ് ഓഫീസർ (DFO) ജോഷിൽ എം. അഭിപ്രായപ്പെട്ടു.
പരിസ്ഥിതി സംരക്ഷണം, ജൈവവൈവിധ്യ സംരക്ഷണം, പ്രാദേശിക സമൂഹങ്ങളുടെ ക്ഷേമം എന്നിവയോടുള്ള സ്ഥാപനത്തിന്റെ പ്രതിബദ്ധതയാണ് സംരംഭത്തിലൂടെ പ്രതിഫലിക്കുന്നത്. കേവലം ബിസിനസ് നേട്ടങ്ങൾക്കപ്പുറം സമൂഹത്തിന് ശാശ്വതമായ മാറ്റങ്ങൾ സൃഷ്ടിക്കാനാണ് തങ്ങൾ ലക്ഷ്യമിടുന്നതെന്ന് ഫൈസൽ കൊട്ടിക്കോളൻ ഉദ്ഘാടന പ്രസംഗത്തിൽ പറഞ്ഞു. വന്യജീവി പരിപാലനം ശക്തിപ്പെടുത്തുന്നതിനും മനുഷ്യരും വന്യജീവികളും തമ്മിലുള്ള സമാധാനപരമായ സഹവർത്തിത്വം പ്രോത്സാഹിപ്പിക്കുന്നതിനുമുള്ള മികച്ച ചുവടുവെപ്പാണ് പദ്ധതി.
Read DhanamOnline in English
Subscribe to Dhanam Magazine
