ഫേസ്ബുക്കിന്റെയും ഇന്സ്റ്റാഗ്രാമിന്റെയും വാട്സാപ്പിന്റെയും മാതൃകമ്പനിയായ മെറ്റ (Meta) ഇന്ത്യയില് ആദ്യത്തെ എ.ഐ (Artificial Intelligence) അധിഷ്ഠിത ഡാറ്റാ സെന്റര് സ്ഥാപിക്കുന്നു. റിലയന്സ് ഇന്ഡസ്ട്രീസുമായി ചേര്ന്നാണ് മെറ്റ ഈ വന്കിട പദ്ധതി നടപ്പാക്കുന്നത്. ചെന്നൈയില് റിലയന്സിന് പങ്കാളിത്തമുള്ള ആര്പിജിഡി (RPGD) കാമ്പസിലാണ് ഈ പുതിയ ഡാറ്റാ സെന്റര് പ്രവര്ത്തനമാരംഭിക്കുക. ഇന്ത്യയിലെ അതിവേഗം വളരുന്ന ആര്ട്ടിഫിഷ്യല് ഇന്റലിജന്സ് വിപണി ലക്ഷ്യമിട്ടാണ് ആഗോള ഭീമന്മാരായ മെറ്റയുടെ ഈ നീക്കം.
മെറ്റയുടെ ആഗോള എഐ ഇന്ഫ്രാസ്ട്രക്ചര് ശക്തമാക്കുന്നതിനൊപ്പം ഇന്ത്യയിലെ ഉല്പ്പന്നങ്ങളുടെയും എഐ സേവനങ്ങളുടെയും വേഗതയും കാര്യക്ഷമതയും വര്ധിപ്പിക്കാന് ഈ പങ്കാളിത്തം സഹായിക്കുമെന്നാണ് മെറ്റ ചീഫ് എക്സിക്യൂട്ടീവ് ഓഫീസര് മാര്ക്ക് സക്കര്ബര്ഗ് വ്യക്തമാക്കിയത്.
റിലയന്സ് ഇന്ഡസ്ട്രീസിന് പുറമെ ബ്രൂക്ക്ഫീല്ഡ് അസറ്റ് മാനേജ്മെന്റും ഡിജിറ്റല് റിയല്റ്റിയും ചേര്ന്നുള്ള സംയുക്ത സംരംഭമാണ് ചെന്നൈയിലെ ഈ ഡാറ്റാ സെന്റര് കാമ്പസ് കൈകാര്യം ചെയ്യുന്നത്. 100 മെഗാവാട്ട് (MW) ഐടി കപ്പാസിറ്റിയുള്ള ഈ കാമ്പസില് മെറ്റയ്ക്ക് ആവശ്യമായ അത്യാധുനിക അടിസ്ഥാന സൗകര്യങ്ങള് റിലയന്സ് ഒരുക്കും. കപ്പാസിറ്റി ഉയര്ത്തുന്നതിലൂടെ മെറ്റയുടെ ഇന്ത്യന് ഉപഭോക്താക്കള്ക്ക് കൂടുതല് വേഗതയേറിയ സേവനം ഉറപ്പാക്കാന് സാധിക്കും.
ഡാറ്റാ സെന്റര് സ്ഥാപിക്കുമെന്ന വാര്ത്തകള് പുറത്തുവന്നതിന് പിന്നാലെ റിലയന്സ് ഇന്ഡസ്ട്രീസ് (RIL) ഓഹരികള്ക്ക് വിപണിയില് പ്രിയമേറി. വ്യാപാരത്തിനിടയില് റിലയന്സിന്റെ ഓഹരി വില രണ്ട് ശതമാനത്തിലധികം വര്ധന രേഖപ്പെടുത്തി.
കഴിഞ്ഞ കുറച്ചു ദിവസങ്ങളായി വിപണിയില് വലിയ ചലനമില്ലാതിരുന്ന റിലയന്സ് ഓഹരികളിലേക്ക് നിക്ഷേപകര് കൂട്ടത്തോടെ എത്തിയതാണ് ഈ പെട്ടെന്നുള്ള വര്ധനയ്ക്ക് കാരണം. ആഗോള ടെക് ഭീമന്മാരുമായുള്ള റിലയന്സിന്റെ ബിസിനസ് പങ്കാളിത്തം കമ്പനിയുടെ ഭാവി വളര്ച്ചയ്ക്ക് കരുത്താകുമെന്നാണ് വിപണി വിലയിരുത്തല്.
ഇന്ത്യയില് സമുദ്രത്തിനടിയിലൂടെയുള്ള കേബിളുകള് (Subsea cables) വന്നുചേരുന്ന പ്രധാന ഹബ്ബുകളില് ഒന്നാണ് ചെന്നൈ. ഇത് അന്താരാഷ്ട്ര തലത്തിലുള്ള അതിവേഗ ഡാറ്റാ കൈമാറ്റത്തിന് സഹായകരമാണ്. കൂടാതെ തടസമില്ലാത്ത വൈദ്യുതി ലഭ്യതയും ചെന്നൈയെ മെറ്റയുടെ പ്രിയപ്പെട്ട ലോക്കേഷനാക്കി മാറ്റി. ഇന്ത്യയിലെ കോടിക്കണക്കിന് വരുന്ന ഉപഭോക്താക്കളുടെ ഡാറ്റാ പ്രോസസിംഗ് ഇനി ഇന്ത്യയില് തന്നെ പ്രാദേശികമായി നടക്കും എന്നതാണ് ഇതിന്റെ പ്രധാന നേട്ടം.
ഇന്ത്യയില് ഫേസ്ബുക്ക്, ഇന്സ്റ്റാഗ്രാം, വാട്സാപ്പ് എന്നിവയ്ക്ക് നിലവില് കോടിക്കണക്കിന് ഉപഭോക്താക്കളുണ്ട്. പുതിയ ഡാറ്റാ സെന്റര് വരുന്നതോടെ ഉപഭോക്താക്കളുടെ ഡാറ്റാ ലോഡിംഗ് സമയം ഗണ്യമായി കുറയും. ലേറ്റന്സി (Latency) കുറയുന്നത് വഴി ഇന്സ്റ്റാഗ്രാം റീല്സ് ഉള്പ്പെടെയുള്ള വിഡിയോ കണ്ടന്റുകള് കൂടുതല് വേഗതയില് ലഭ്യമാകും. കൂടാതെ പ്രാദേശികമായി ഡാറ്റ സൂക്ഷിക്കുന്നത് സുരക്ഷ കൂടുതല് ശക്തമാക്കാന് സഹായിക്കുമെന്നാണ് വിലയിരുത്തല്.
റിലയന്സിന്റെ ഉടമസ്ഥതയിലുള്ള ജിയോയുടെ വലിയ യൂസര് ബേസിനും ഈ സാങ്കേതിക പങ്കാളിത്തം വലിയ ഗുണം ചെയ്യും. പ്രത്യേകിച്ച് ജിയോ സിനിമ പോലുള്ള പ്ലാറ്റ്ഫോമുകളിലെ ഉള്ളടക്കങ്ങള് തടസ്സമില്ലാതെ അതിവേഗത്തില് ഉപഭോക്താക്കളിലേക്ക് എത്തിക്കാന് പുതിയ എ.ഐ അടിസ്ഥാനമാക്കിയുള്ള ഡാറ്റാ സംവിധാനത്തിലൂടെ സാധ്യമാകും. റിലയന്സിന്റെ ഡിജിറ്റല് ഇക്കോസിസ്റ്റത്തിന് പുതിയ വേഗത നല്കുന്നതാണ് ഈ ഡീല്.
Read DhanamOnline in English
Subscribe to Dhanam Magazine
