കേരളത്തിലെ ബിസിനസുകൾക്ക് പ്രവർത്തന ചെലവ് കുറയ്ക്കാനും ലാഭം വർദ്ധിപ്പിക്കാനും ഊർജ വിനിയോഗത്തിൽ വിവേകപൂർണ്ണമായ തീരുമാനങ്ങൾ എടുക്കേണ്ടത് അനിവാര്യമാണെന്ന് എലിസ്റ്റോ എനർജീസ് മാനേജിംഗ് ഡയറക്ടർ ഷാഹദ് ബംഗ്ലാ. പതിനെട്ടാമത് ധനം ബിസിനസ് സമിറ്റ് ആന്റ് അവാർഡ് നൈറ്റിൽ പ്രത്യേക പ്രഭാഷണം നടത്തുകയായിരുന്നു ഷാഹദ് ബംഗ്ലാ. നിലവിൽ കേരളത്തിലെ വ്യവസായങ്ങൾ പ്രധാനമായും കെ.എസ്.ഇ.ബി.യെയും പരമ്പരാഗത ഊർജ സ്രോതസ്സുകളെയും ആണ് ആശ്രയിക്കുന്നത്. എന്നാൽ തമിഴ്നാട്, കർണാടക തുടങ്ങിയ സംസ്ഥാനങ്ങൾ ക്ലീൻ എനർജി മോഡലുകൾ ഫലപ്രദമായി ഉപയോഗിച്ച് മുന്നേറുകയാണ്.
മികച്ച ഊർജ തീരുമാനങ്ങൾ എടുക്കുന്നതിന് പ്രധാനമായും രണ്ട് മോഡലുകളാണ് കമ്പനികൾക്ക് മുന്നിലുള്ളത്:
കാപെക്സ് (CAPEX) മോഡൽ: സ്വന്തമായി നിക്ഷേപം നടത്തി സോളാർ പ്ലാന്റുകൾ പോലുള്ള ആസ്തികൾ സ്ഥാപിക്കുന്ന രീതിയാണിത്. ഇതിലൂടെ 3.5 മുതൽ 4 വർഷത്തിനുള്ളിൽ നിക്ഷേപം തിരിച്ചുപിടിക്കാനും (ROI) നികുതി ആനുകൂല്യങ്ങളും ദീർഘകാല ലാഭവും നേടാനും സാധിക്കും.
റെസ്കോ (RESCO) മോഡൽ: മുൻകൂറായി വലിയ തുക നിക്ഷേപം നടത്താൻ കഴിയാത്തവർക്ക് ഈ രീതി തിരഞ്ഞെടുക്കാം. ഇതിൽ ഒരു എനർജി പാർട്ണർ നിക്ഷേപം നടത്തുകയും കുറഞ്ഞ നിരക്കിൽ വൈദ്യുതി നൽകുകയും ചെയ്യുന്നു. ഇതുവഴി ആദ്യ ദിവസം മുതൽ തന്നെ സാമ്പത്തിക ലാഭം ലഭ്യമാകും.
ഹരിത ഊർജം വലിയ കമ്പനികൾക്ക് മാത്രമുള്ളതാണെന്നത് ഒരു മിഥ്യാധാരണയാണ്. അർത്ഥവത്തായ വൈദ്യുതി ബില്ലുകളുള്ള ഏത് ബിസിനസിനും ഇടത്തരം വ്യവസായങ്ങൾക്കും മാളുകൾക്കും ആശുപത്രികൾക്കും ഇത്തരം സ്മാർട്ട് എനർജി മോഡലുകൾ വഴി ലാഭം നേടാം. വൈദ്യുതി ചെലവ് കുറയുന്നതിലൂടെ ഉൽപ്പന്നങ്ങളുടെ ഉൽപ്പാദന ചെലവ് കുറയ്ക്കാനും കമ്പനിയുടെ ഇബിഐടിഡിഎ (EBITDA) മെച്ചപ്പെടുത്താനും സാധിക്കുന്നു.
കൂടാതെ, ബാറ്ററി എനർജി സ്റ്റോറേജ് സിസ്റ്റംസ് (BESS) പോലുള്ള സാങ്കേതിക വിദ്യകൾ ഭാവിയിലെ ഊർജ ആവശ്യങ്ങൾക്കായി പരിഗണിക്കാവുന്നതാണ്.ബിസിനസിനെ കൂടുതൽ മത്സരക്ഷമമാക്കാനും ഭാവിയിലെ വളർച്ച ഉറപ്പാക്കാനും ഇത്തരം സുസ്ഥിരമായ ഊർജ തീരുമാനങ്ങൾ സഹായിക്കും. സ്മാർട്ട് എനർജി എന്നത് കേവലം ഒരു പരീക്ഷണമായല്ല, മറിച്ച് ബിസിനസിന്റെ കരുത്ത് വർദ്ധിപ്പിക്കുന്നതിനുള്ള തന്ത്രമായാണ് കാണേണ്ടതെന്നും ഷാഹദ് ബംഗ്ലാ പറഞ്ഞു.
Read DhanamOnline in English
Subscribe to Dhanam Magazine
