പരമ്പരാഗതമായ കൃഷിരീതികൾ അധ്വാനഭാരമുള്ളതും പ്രവചനാതീതവുമായ വെല്ലുവിളികൾ നിറഞ്ഞതുമാണ്. എന്നാൽ സാങ്കേതികവിദ്യയുടെ വളർച്ചയോടെ കൃഷി കൂടുതൽ ലളിതവും ലാഭകരവുമായ ഒന്നായി മാറിക്കൊണ്ടിരിക്കുന്നു. ഗൗരീഷ് ജി. പിള്ള എന്ന യുവ എഞ്ചിനീയർ വികസിപ്പിച്ചെടുത്ത സ്മാർട്ട് ഫാമിംഗ് സംവിധാനം ഈ രംഗത്ത് വലിയൊരു മാറ്റത്തിനാണ് തുടക്കം കുറിച്ചിരിക്കുന്നത്. കുറഞ്ഞ സ്ഥലത്ത് നിന്ന് പരമാവധി വിളവ് ഉൽപ്പാദിപ്പിക്കാൻ സഹായിക്കുന്ന പൂർണമായും ഓട്ടോമേറ്റഡ് ആയ പ്ലാന്റ് ഗ്രോത്ത് ഇക്കോസിസ്റ്റമാണ് ഗൗരീഷ് വികസിപ്പിച്ചെടുക്കുന്നത്.
സാധാരണ കൃഷിരീതികളിൽ ഓരോ വിളയ്ക്കും ആവശ്യമായ പോഷകങ്ങൾ, പി.എച്ച് (pH) നില എന്നിവയെക്കുറിച്ച് പഠിക്കാൻ വളരെയധികം സമയം ആവശ്യമാണ്. എന്നാൽ ഗൗരീഷിന്റെ 'സെൽ ബൈറ്റ്സ്' (Zelbytes) എന്ന സ്റ്റാർട്ടപ്പ് വികസിപ്പിച്ചെടുത്ത സംവിധാനം കൃഷിയെ 'ഓട്ടോണമസ്' ആക്കുന്നു. സാധാരണ ഓട്ടോമേഷനിൽ ടൈമറുകൾ ഉപയോഗിച്ച് വെള്ളമൊഴിക്കുക പോലുള്ള കാര്യങ്ങളാണ് ചെയ്യുന്നത്. എന്നാൽ ഇവിടെ ആർട്ടിഫിഷ്യൽ ഇന്റലിജൻസ് (AI) ഉപയോഗിക്കുന്നതിലൂടെ ഒരു അഗ്രോണമിസ്റ്റിന്റെയോ അഗ്രികൾച്ചർ ഓഫീസറുടെയോ സഹായമില്ലാതെ തന്നെ തീരുമാനങ്ങൾ എടുക്കാൻ സിസ്റ്റത്തിന് സാധിക്കുന്നതായി ഗൗരീഷ് ധനം ഓണ്ലൈനോട് പറഞ്ഞു. ചെടികളുടെ വളർച്ച അളക്കുക, മണ്ണിലെ ധാതുക്കളുടെ കുറവ് തിരിച്ചറിഞ്ഞ് അവ നൽകുക, കൃത്യമായ പി.എച്ച് നില നിലനിർത്തുക, ആവശ്യമായ സൂര്യപ്രകാശവും ഈർപ്പവും ഉറപ്പാക്കുക എന്നിവയെല്ലാം ഈ സിസ്റ്റം സ്വയം ചെയ്യുന്നു.
എഡ്ജ് എ.ഐ (Edge AI), ഐ.ഒ.ടി (IoT) ശൃംഖലകൾ എന്നിവയെ അടിസ്ഥാനമാക്കിയാണ് ഈ ഇക്കോസിസ്റ്റം പ്രവർത്തിക്കുന്നത്. ഒരു മൊബൈൽ ആപ്പ് വഴി കൃഷിയിടം എവിടെയിരുന്നും നിരീക്ഷിക്കാൻ സാധിക്കും. ചെടികളുടെ വളർച്ച നിരീക്ഷിക്കാനും കീടങ്ങളുടെയോ രോഗങ്ങളുടെയോ ആക്രമണം തിരിച്ചറിയാനും പ്രത്യേക ക്യാമറകൾ സജ്ജീകരിച്ചിട്ടുണ്ട്. താപനില, ഈർപ്പം, പ്രകാശത്തിന്റെ തീവ്രത എന്നിവ ക്രമീകരിക്കാനുള്ള ഓട്ടോമാറ്റിക് സൗകര്യങ്ങളും ഇതിലുണ്ട്. അടിയന്തര സാഹചര്യങ്ങൾ ഒഴികെ, ഈ സംവിധാനം സജ്ജമാക്കിയാൽ കർഷകന് വിളയെക്കുറിച്ച് ആശങ്കപ്പെടേണ്ടതില്ല; സിസ്റ്റം എല്ലാം നിയന്ത്രിച്ചുകൊള്ളും. ഇതിനെ 'Plant it, forget it' എന്നാണ് ഗൗരീഷ് വിശേഷിപ്പിക്കുന്നത്.
സ്ഥലപരിമിതിയുള്ള നഗരപ്രദേശങ്ങളിൽ ഈ സാങ്കേതികവിദ്യ ഏറെ പ്രയോജനകരമാണ്. വെർട്ടിക്കൽ ഫാമിംഗ് രീതിയിലൂടെ വെറും 200 സ്ക്വയർ ഫീറ്റ് സ്ഥലത്ത് ഏകദേശം 500 ചെടികൾ വരെ വളർത്താൻ സാധിക്കും. ഹൈഡ്രോപോണിക്സ്, ഏറോപോണിക്സ് തുടങ്ങിയ ആധുനിക രീതികളാണ് ഇതിനായി ഉപയോഗിക്കുന്നത്. ഇതിൽ തന്നെ എൻ.എഫ്.ടി (NFT), ഡി.എഫ്.ടി (DFT), ഡച്ച് ബക്കറ്റ് സിസ്റ്റം (Dutch Bucket system) എന്നിങ്ങനെ വിവിധ സാങ്കേതികവിദ്യകൾ വിളകൾക്കനുസരിച്ച് തിരഞ്ഞെടുക്കാം. ചീര, തക്കാളി, വെണ്ട, വഴുതന, പാലക്ക് തുടങ്ങി ഏത് വിളകളും ഇത്തരത്തിൽ ശാസ്ത്രീയമായി കൃഷി ചെയ്യാവുന്നതാണ്.
ഈ സംവിധാനം സ്ഥാപിക്കുന്നതിന് സ്ക്വയർ ഫീറ്റിന് ഏകദേശം 2000 മുതൽ 2500 രൂപ വരെയാണ് ചെലവ് വരുന്നത്. എന്നാൽ ഇതിൽ നിന്നുള്ള വരുമാനം വളരെ മികച്ചതാണ്. കൃത്യമായി പരിപാലിച്ചാൽ 200 സ്ക്വയർ ഫീറ്റ് ഏരിയയിൽ നിന്ന് പ്രതിമാസം 15,000 മുതൽ 20,000 രൂപ വരെ ലാഭം നേടാൻ സാധിക്കുമെന്ന് ഗൗരീഷ് പറയുന്നു. നിലവിൽ വെള്ളായണി കാർഷിക കോളേജിന് കീഴിലുള്ള കെ-ആഗ്ടെക് ലോഞ്ച്പാഡുമായി (K-AgTech LaunchPad) സഹകരിച്ചാണ് പദ്ധതി മുന്നോട്ട് പോകുന്നത്. സംവിധാനത്തിന്റെ ആദ്യത്തെ പ്രോട്ടോടൈപ്പ് ചെയ്യുന്നതിനായി ഡൽഹി ICAR-IARI യുടെ 5 ലക്ഷം രൂപയുടെ ഗ്രാന്റും 2024 ല് സ്ഥാപനത്തിന് ലഭിച്ചിരുന്നു.
കാലാവസ്ഥാ വ്യതിയാനം മൂലം ഉണ്ടാകുന്ന പ്രളയം, കഠിനമായ ചൂട് തുടങ്ങിയ പ്രശ്നങ്ങൾ ഈ കൺട്രോൾഡ് എൻവയോൺമെന്റ് ഫാമിംഗിനെ ബാധിക്കില്ല. കൂടാതെ, ഇടനിലക്കാരുടെ ചൂഷണം ഒഴിവാക്കി വിളകൾക്ക് ന്യായവില ഉറപ്പാക്കാനുള്ള മാർക്കറ്റിംഗ് പ്ലാറ്റ്ഫോമും ഇവർ വികസിപ്പിക്കുന്നുണ്ട്. ഉപഭോക്താക്കൾക്ക് തന്നെ ഇൻസ്റ്റാൾ ചെയ്യാവുന്ന 'പ്ലഗ് ആൻഡ് പ്ലേ' (Plug and Play) മോഡലുകളിലേക്ക് ഈ സാങ്കേതികവിദ്യ മാറ്റാനും ലക്ഷ്യമിടുന്നു. സെൽ ബൈറ്റ്സിന്റെ വെബ്സൈറ്റ് സന്ദര്ശിച്ചോ ഫോണിലോ താല്പര്യമുള്ളവർക്ക് ബന്ധപ്പെടാവുന്നതാണ്. അടുത്ത വർഷത്തോടെ പ്രവർത്തനം മറ്റ് സ്ഥലങ്ങളിലേക്ക് കൂടി വ്യാപിപ്പിക്കാൻ കമ്പനി പദ്ധതിയിടുന്നു.
ഗൗരീഷ് തന്റെ ബി.ടെക് പഠനം പൂർത്തിയാക്കിയത് തിരുവനന്തപുരം ഗവൺമെന്റ് എൻജിനീയറിങ് കോളേജിലാണ് (GEC). സെൽ ബൈറ്റ്സ്, തിരുവനന്തപുരം ഗവൺമെന്റ് എൻജിനീയറിങ് കോളേജിനുള്ളിലെ ടെക്നോളജി ബിസിനസ് ഇൻക്യുബേറ്ററിലാണ് പ്രവർത്തിക്കുന്നത്. സ്ഥാപനത്തിന്റെ ഗവേഷണവും വികസനവും (R&D) ഇവിടെയാണ് നടക്കുന്നത്. 2020-ലാണ് സംരംഭത്തിന്റെ പ്രവർത്തനങ്ങൾ ആരംഭിച്ചത്. എന്നാൽ ഔദ്യോഗികമായി കമ്പനി രജിസ്റ്റർ ചെയ്തത് 2022-ലാണ്. ആദ്യത്തെ മൂന്ന് നാല് വർഷക്കാലം ഉൽപ്പന്നത്തിന്റെ ഗവേഷണത്തിനും വികസനത്തിനുമായാണ് (R&D) ചെലവഴിച്ചത്.
പ്ലസ് ടു കഴിഞ്ഞ സമയത്ത് ഗൗരീഷിന് ഉടൻ തന്നെ ഉപരിപഠനത്തിന് ചേരാൻ സാധിച്ചിരുന്നില്ല. ആ കാലയളവിൽ അദ്ദേഹം മണ്ണിൽ നേരിട്ട് ചെയ്യുന്ന പരമ്പരാഗതമായ ഓപ്പൺ ഫാമിംഗിൽ (Open Farm) സജീവമായിരുന്നു. 2018 ൽ മികച്ച യുവ കർഷകനുള്ള ഓണാട്ടുകര ഡവലപ്പ്മെന്റ് സൊസൈറ്റിയുടെ പുരസ്കാരവും ഗൗരീഷിന് ലഭിച്ചു. ശാസ്ത്രീയ കൃഷിരീതികൾ പഠിച്ചെടുക്കുന്നതിലെ ബുദ്ധിമുട്ടുകൾ, 2018-ലെ പ്രളയം മൂലമുണ്ടായ വലിയ കൃഷിനാശം, ഉൽപ്പന്നങ്ങൾക്ക് ന്യായവില ലഭിക്കാത്ത വിപണിയിലെ പ്രശ്നങ്ങൾ എന്നിവ അദ്ദേഹം അക്കാലത്ത് നേരിട്ടു. ഈ അനുഭവങ്ങളാണ് പിന്നീട് കൃഷിയും സാങ്കേതികവിദ്യയും കൂട്ടിയിണക്കിയുള്ള സ്റ്റാർട്ടപ്പിലേക്ക് അദ്ദേഹത്തെ നയിച്ചത്. ഗൗരീഷ് നിലവില് തിരുവനന്തപുരം ഗവൺമെന്റ് എൻജിനീയറിങ് കോളേജിൽ തന്നെ ഡാറ്റ സയൻസിൽ എം.ടെക് (M.Tech in Data Science) പഠിച്ചുകൊണ്ടിരിക്കുകയാണ്.
കൃഷി പഠിക്കാനുള്ള ബുദ്ധിമുട്ടും സ്ഥലപരിമിതിയും തൊഴിലാളികളുടെ ലഭ്യതക്കുറവും പരിഹരിക്കാൻ സാങ്കേതികവിദ്യയ്ക്ക് സാധിക്കുമെന്ന് ഈ സംരംഭം തെളിയിക്കുന്നു. ഐ.ടി മേഖലയിലെ അറിവ് കാർഷിക രംഗത്ത് പ്രയോജനപ്പെടുത്തിയാൽ കൃഷി ലാഭകരവും ആധുനികവുമായ ഒരു ബിസിനസായി മാറ്റാൻ സാധിക്കും. സ്മാർട്ട് ഫാർമിംഗിലൂടെ കേരളത്തിലെ കാർഷിക മേഖലയ്ക്ക് പുതിയൊരു ദിശ നൽകാനാണ് ഗൗരീഷ് പരിശ്രമിക്കുന്നത്.
Read DhanamOnline in English
Subscribe to Dhanam Magazine
