രൂപയുടെ മൂല്യമിടിവ് ആശങ്കയല്ല; രാജ്യം 7.2% വളർച്ചയിലേക്ക് കുതിക്കുമെന്ന് സാമ്പത്തിക സർവേ

ഇന്ത്യൻ സമ്പദ്‌വ്യവസ്ഥ ശക്തമായ വളർച്ചാ പാതയിലാണെന്ന് കേന്ദ്ര ബജറ്റിന് മുന്നോടിയായി പാർലമെന്റിൽ സമർപ്പിച്ച 2025-26 സാമ്പത്തിക സർവേ. ആഗോള വ്യാപാര രംഗത്തെ അനിശ്ചിതത്വങ്ങൾക്കിടയിലും 2026-27 സാമ്പത്തിക വർഷത്തിൽ ഇന്ത്യയുടെ ജി.ഡി.പി (GDP) 6.8 ശതമാനം മുതൽ 7.2 ശതമാനം വരെ വളർച്ച കൈവരിക്കുമെന്നാണ് സർവേ പ്രവചിക്കുന്നത്. 2026 സാമ്പത്തിക വർഷത്തിൽ രാജ്യം 7.4 ശതമാനം വളർച്ച നേടുമെന്നും, ഇത് പ്രധാനമായും ഉപഭോഗം (Consumption), നിക്ഷേപം (Investment) എന്നിവയുടെ കരുത്തിലായിരിക്കുമെന്നും റിപ്പോർട്ട് പറയുന്നു.

കയറ്റുമതിക്ക് ഗുണകരം

രൂപയുടെ മൂല്യത്തിലുണ്ടാകുന്ന കുറവ് നിലവിൽ ഇന്ത്യൻ സമ്പദ്‌വ്യവസ്ഥയെ ദോഷകരമായി ബാധിക്കുന്നില്ല എന്നതാണ് സർവേയിലെ പ്രധാനമായ ഒരു നിരീക്ഷണം. വാസ്തവത്തിൽ, രൂപയുടെ മൂല്യത്തകർച്ച കയറ്റുമതി മേഖലയ്ക്ക് ഗുണകരമാവുകയാണ് ചെയ്യുന്നത്. അമേരിക്കൻ വിപണിയിൽ ഇന്ത്യൻ ഉൽപ്പന്നങ്ങൾക്ക് ഏർപ്പെടുത്തിയ ഉയർന്ന താരിഫുകൾ മൂലമുണ്ടാകുന്ന ആഘാതം ഒരു പരിധിവരെ കുറയ്ക്കാൻ ഈ മൂല്യത്തകർച്ച സഹായിക്കുന്നു.

രൂപയുടെ നിലവിലെ മൂല്യം ഇന്ത്യയുടെ ശക്തമായ സാമ്പത്തിക അടിത്തറയെ പൂർണമായി പ്രതിഫലിപ്പിക്കുന്നില്ലെന്നും, രൂപ അതിന്റെ യഥാർത്ഥ ശേഷിയേക്കാൾ താഴെയാണ് നിൽക്കുന്നതെന്നും സർവേ വ്യക്തമാക്കുന്നു. കൂടാതെ, ക്രൂഡ് ഓയിൽ വില വർദ്ധനവ് മൂലം പണപ്പെരുപ്പമുണ്ടാകാനുള്ള ഭീഷണി നിലവിലില്ലെന്നും റിപ്പോർട്ട് പറയുന്നു.

ധനക്കമ്മി കുറയ്ക്കും

ഇന്ത്യൻ സമ്പദ്‌വ്യവസ്ഥയുടെ 60 ശതമാനവും കൈയ്യാളുന്ന ആഭ്യന്തര ഉപഭോഗം തന്നെയാണ് വളർച്ചയുടെ പ്രധാന ചാലകശക്തി. നഗരമേഖലകളിലെ ശക്തമായ ഡിമാൻഡ് മൊത്തത്തിലുള്ള സാമ്പത്തിക പ്രവർത്തനങ്ങൾക്ക് കരുത്തേകുന്നു. സർക്കാരിന്റെ മൂലധനച്ചെലവ് (Capex) ജി.ഡി.പിയുടെ 4 ശതമാനമായി ഉയർന്നിട്ടുണ്ട്. ധനക്കമ്മി (Fiscal Deficit) 2025-ലെ 4.8 ശതമാനത്തിൽ നിന്ന് 2026-ൽ 4.4 ശതമാനമായി കുറയ്ക്കാനാണ് സർക്കാർ ലക്ഷ്യമിടുന്നത്. ഭൗമരാഷ്ട്രീയ വെല്ലുവിളികൾ നിമിത്തം ചില അനിശ്ചിതത്വങ്ങൾ നിലനിൽക്കുന്നുണ്ടെങ്കിലും, ഇന്ത്യയുടെ സാമ്പത്തിക സ്ഥിരത ശക്തമാണെന്നും വളർച്ച സുസ്ഥിരമായി തുടരുമെന്നും സാമ്പത്തിക സർവേ പറയുന്നു.

യുഎസുമായുള്ള വ്യാപാര കരാറിനായുള്ള നടന്നുകൊണ്ടിരിക്കുന്ന ചർച്ചകൾ ഈ വർഷത്തിൽ അവസാനിക്കുമെന്നാണ് പ്രതീക്ഷ. സെപ്റ്റംബർ 22 മുതൽ ആരംഭിച്ച ജിഎസ്ടി പരിഷ്കാരങ്ങൾ ഗാർഹിക വാങ്ങൽ ശേഷി വർദ്ധിപ്പിക്കുകയും പണപ്പെരുപ്പം കുറയ്ക്കുകയും ചെയ്തു. ഷെഡ്യൂൾഡ് വാണിജ്യ ബാങ്കുകളുടെ (SCB) ആസ്തി ഗുണനിലവാരത്തിൽ ഗണ്യമായ പുരോഗതി ഉണ്ടായിട്ടുണ്ട്. SCB കളുടെ കുടിശ്ശിക വായ്പയിലെ വാർഷിക വളർച്ച 14.5 ശതമാനം ആയി വർധിച്ചു. 2025 സാമ്പത്തിക വർഷത്തിൽ ഇന്ത്യയുടെ മൊത്തം കയറ്റുമതി 825.3 ബില്യൺ ഡോളറെന്ന റെക്കോർഡ് നിലവാരത്തിലെത്തി. സേവന കയറ്റുമതിയിലെ ശക്തമായ വളർച്ചയാണ് പ്രധാനമായും ഇതിന് കാരണമെന്നും സാമ്പത്തിക സർവേ പറയുന്നു.

_{Economic Survey 2025-26 forecasts 7.2% GDP growth for India, says rupee depreciation poses no major concern.}