7 മാസത്തിനിടെ ഇന്ത്യയ്ക്ക് 5 വമ്പൻ വ്യാപാര കരാറുകൾ; ചൈന വിരോധമാണോ ​നേട്ടമേകുന്നത്? 1 ട്രില്യൺ ഡോളർ കയറ്റുമതി സാധിക്കുമോ?

ലോകത്തിന്റെ വിവിധയിടങ്ങളിൽ തലപൊക്കിയ ജിയോപൊളിറ്റിക്കൽ സംഘർഷങ്ങളും യുഎസ് പ്രസിഡന്റ് ഡൊണാൾഡ് ട്രംപിന്റെ ഏകപക്ഷീയ തീരുവ നയങ്ങളും കാരണം കഴിഞ്ഞ ഒരു വർഷമായി ആ​ഗോള സാമ്പത്തികരം​ഗം കലങ്ങിമറിയുകയായിരുന്നു. ഇന്ത്യയുടെ വ്യാപാര, വാണിജ്യ മേഖലയിലും ഏറെ വെല്ലുവിളികൾ നേരിട്ട കാലയളവാണിത്. എന്നാൽ മുന്നിലുണ്ടായിരുന്ന പ്രതിസന്ധികളെ ഓരോന്നായി തരണം ചെയ്തു ഇന്ത്യ നിശബ്​ദമായി മുന്നേറുന്ന കാഴ്ചയാണ് യുഎസുമായുള്ള വ്യാപാര കരാർ യാഥാർത്ഥ്യമായതോടെ ഇപ്പോൾ തെളിഞ്ഞുവരുന്നത്.

കഴിഞ്ഞ ഏഴ് മാസത്തിനിടെ 5 വമ്പൻ ഉഭയകക്ഷി വ്യാപാര കരാറുകളാണ് ഇന്ത്യ സ്വന്തമാക്കിയത്. അരഡസനോളം വിദേശ രാ​ജ്യങ്ങളുമായുള്ള വ്യാപാര ചർച്ചകൾ പുരോ​ഗമിക്കുന്നു. എന്തായാലും വടക്കേ അമേരിക്ക, യൂറോപ്പ്, ​ഗൾഫ്, പസിഫിക് എന്നിങ്ങനെ ഭൂ​ഗോളത്തിന്റെ വിവിധ കോണുകളിൽ നിന്നുള്ള രാജ്യങ്ങളിൽ നിന്നും തുടർച്ചയായി നേടിയെടുത്ത വ്യാപാര കരാറുകളിലൂടെ 2030-ൽ ചരക്ക് കയറ്റുമതിയിൽ (Merchandise exports) നിന്നും ഒരു ട്രില്യൺ ഡോളർ (ഏകദേശം 90,50,000 കോടി രൂപ) നേടിയെടുക്കണമെന്ന സ്വപ്നം സഫലമാകുമോ? വികസിത രാജ്യങ്ങളെ ഇന്ത്യയുമായി അടുപ്പിക്കുന്നത് ചൈന+1 നയതന്ത്രമാണോ? വിശദമായി നോക്കാം.

ഇന്ത്യ ഇതിനകം കരസ്ഥമാക്കിയ 5 വ്യാപാര കരാറുകൾ

തീരുവ യുദ്ധങ്ങളെ തുടർന്ന് ആ​ഗോള സമ്പദ്ഘടന പ്രക്ഷുബ്ധമായി തുടരുന്നതിനിടയിലാണ്, സു​ഗമമായി വിദേശ വിപണികളിലേക്ക് കടന്നുചെല്ലാൻ സഹായിക്കുന്ന ഉഭയകക്ഷി വ്യാപാര കരാറുകൾ ഇന്ത്യ അതിവേ​ഗത്തിൽ സ്വന്തമാക്കുന്നത്. അവ ചുവടെ ചേർക്കുന്നു.

1. ഇന്ത്യ - യുഎസ് ഉഭയകക്ഷി വ്യാപാര കരാർ: 2026 ഫെബ്രുവരി 2-നാണ് ഇരുരാജ്യങ്ങളും ധാരണയിലെത്തിയത്. 50,000 കോടി ഡോളറിന്റെ (ഏകദേശം 45,25,000 കോടി രൂപ) വ്യാപാരമാണ് ഇരുകൂട്ടരും ലക്ഷ്യമിടുന്നത്. ഇന്ത്യൻ ഉത്പന്നങ്ങൾക്കുള്ള യുഎസ് ഇറക്കുമതി തീരുവ 50 ശതമാനത്തിൽ നിന്നും 18 ശതമാനത്തിലേക്ക് താഴ്ത്തി; ചില യുഎസ് ഉത്പന്നങ്ങൾക്ക് ഇന്ത്യയിലേക്കുള്ള തീരുവ പൂർണമായും ഒഴിവാക്കി. ചില സെക്ടറുകളെ കരാറിന്റെ ഭാ​ഗമാക്കിയിട്ടില്ല. റഷ്യയ്ക്ക് പകരം വെനസ്വേലയിൽ നിന്നും ഇന്ത്യ കൂടുതൽ ക്രൂഡോയിൽ വാങ്ങിയേക്കും.

2. ഇന്ത്യ - ഇ.യു സ്വതന്ത്ര വ്യാപാര കരാർ: 2026 ജനുവരിയിലാണ് 27 രാജ്യങ്ങൾ അം​ഗങ്ങളായുള്ള യൂറോപ്യൻ യൂണിയനുമായുള്ള (ഇ.യു) സ്വതന്ത്ര വ്യാപാര കരാർ ഇന്ത്യ ഒപ്പിട്ടത്. എല്ലാ കരാറുകളുടേയും മാതാവ് എന്നായിരുന്നു ഇരുകൂട്ടരുടേയും വിശേഷണം. 2032-ഓടെ 25,000 കോടി ഡോളർ (ഏകദേശം 22,62,500 കോടി രൂപ) വ്യാപാരമാണ് ലക്ഷ്യം. ഘട്ടംഘട്ടമായി യൂറോപ്യൻ വിപണിയിലേക്കുള്ള ഇന്ത്യൻ കയറ്റുമതി മൂല്യത്തിന്റെ 99.5 ശതമാനത്തിനും ഇറക്കുമതി തീരുവ ഇല്ലാതാകും. ഇന്ത്യയുടെ ടെക്​സ്റ്റൈൽ, സീഫുഡ്സ്, ജ്വല്ലറി, റീട്ടെയിൽ സെക്ടറുകൾക്ക് നേട്ടമേകും. ആൾക്കഹോൾ‌, ഓട്ടോമൊബീൽ എന്നിവ യൂറോപ്പിൽ നിന്നും ഇന്ത്യയിലേക്ക് സു​ഗമമായി വരും.

3. ഇന്ത്യ - യു.കെ (ബ്രിട്ടൺ) സമ​ഗ്ര സാമ്പത്തിക വ്യാപാര കരാർ: 2025 ജൂലൈയിൽ ഒപ്പിട്ടു. ഇന്ത്യ ആദ്യമായി നേടിയ വമ്പൻ വ്യാപാര കരാറായിരുന്നു ഇത്. 2030-ഓടെ 10,000 കോടി ഡോളർ (ഏകദേശം 9,05,000 കോടി രൂപ) വ്യാപാരമാണ് ലക്ഷ്യം. ബ്രിട്ടണിലേക്കുള്ള 99 ശതമാനം ഇന്ത്യൻ ഉത്പന്നങ്ങൾക്കും തീരുവ ഒഴിവാകും. ടെക്​സ്റ്റൈൽ, സീഫുഡ്സ്, ലെഥർ പോലെയുള്ള സെക്ടറിലെ ഇന്ത്യൻ കമ്പനികൾക്ക് ​ഗുണകരം.

4. ഇന്ത്യ - ഒമാൻ സമ​ഗ്ര സാമ്പത്തിക സഹകരണം: 2025 ഡിസംബറിൽ ഇരുരാജ്യങ്ങളും ധാരണയിലെത്തി. 2030-ഓടെ 2,500 കോടി ഡോളർ (ഏകദേശം 2,26,250 കോടി രൂപ) വ്യാപാരമാണ് ലക്ഷ്യം. ഇന്ത്യയുടെ ഒമാനിലേക്കുള്ള 98 ശതമാനം ഉത്പന്നങ്ങൾക്കും തീരുവ ഒഴിവാകും. ജ്വല്ലറി, ടെക്​സ്റ്റൈൽസ്, ഫാ‌‍ർമ, എനജിനീയറിങ് സെക്ടറുകളിലെ ഇന്ത്യൻ കമ്പനികൾക്ക് നേട്ടം.

5. ഇന്ത്യ - ന്യൂസിലാൻഡ് സ്വതന്ത്ര വ്യാപാര കരാർ: 2025 ഡിസംബറിൽ ഒപ്പിട്ടു. അടുത്ത അഞ്ച് വർഷത്തിനുള്ളിൽ 500 കോടി ഡോളർ വ്യാപാരമാണ് (ഏകദേശം 45,250 കോടി രൂപ) ലക്ഷ്യം. ഇന്ത്യയിൽ 2,000 കോടി ഡോളർ (ഏകദേശം 1,81,000 കോടി രൂപ) നിക്ഷേപവും വാ​ഗ്ദാനമുണ്ട്. ന്യൂസിലാൻഡിലേക്കുള്ള എല്ലാ ഇന്ത്യൻ ഉത്പന്നങ്ങൾക്കും തീരുവ ഇളവ് ലഭിക്കും. ടെക്സ്റ്റൈൽ, ഫാർമ സെക്ടറിന് നേട്ടം.

നിലവിൽ ഇന്ത്യയുമായി വ്യാപാര ചർച്ച പുരോ​ഗമിക്കുന്ന രാജ്യങ്ങൾ‌: പെറു, ചിലി, ഇസ്രായേൽ, റഷ്യയുടെ നേതൃത്വത്തിലുള്ള യൂറേഷ്യൻ ഇക്കണോമിക് യൂണിയൻ (EAEU).

ഒരു ട്രില്യൺ ഡോളറിന്റെ ചരക്ക് കയറ്റുമതി സാധിക്കുമോ?

നിലവിൽ ധാരണയിലെത്തിയതും ചർച്ചകൾ പുരോ​ഗമിക്കുന്നതും ഉൾപ്പെടെയുള്ള വ്യാപാര കരാറുകളുടെ ​ഗുണഫലം പ്രതീക്ഷിച്ചതുപോലെ കൈവരിക്കാൻ സാധിച്ചാൽ അടുത്ത 5-7 വർഷംകൊണ്ട് ചരക്ക് കയറ്റുമതിയിൽ നിന്നും ഇന്ത്യ ലക്ഷ്യമിടുന്ന ഒരു ട്രില്യൺ (1,00,000 കോടി) ഡോളർ എത്തിപ്പിടിക്കാൻ സാധിക്കാമോ എന്നാണ് ഏവരും ഉറ്റുനോക്കുന്നത്.

കഴിഞ്ഞ സാമ്പത്തിക വർഷം (2024-25) ഇന്ത്യയുടെ ചരക്ക് കയറ്റുമതി റെക്കോഡ് നിലവാരമായ 43,770 കോടി ഡോളറിലേക്ക് എത്തിയിട്ടുണ്ട്. നടപ്പ് സാമ്പത്തിക വർഷമിത് 52,500 - 53,500 കോടി ഡോളറാകുമെന്നാണ് നി​ഗമനം. വമ്പൻ വ്യാപാര കരാറുകൾ യാഥാർത്ഥ്യമായ പശ്ചാത്തലത്തിൽ കയറ്റുമതിക്ക് ​ഗതിവേ​ഗം ലഭിച്ചാൽ ഇന്ത്യ ലോകത്തെ മൂന്നാമത്തെ വലിയ സമ്പദ്ഘടന എന്ന് ആകുമെന്നേ ഇനി നോക്കേണ്ടതുള്ളൂ.

അതിവേ​ഗ ഡീലുകൾക്ക് കാരണം ചൈന+1 നയം?

വിതരണ ശൃംഖലയിൽ ഒരു രാജ്യത്തെ മാത്രം ആശ്രയിക്കുന്നതിന്റെ അപകടം കോവിഡ് മഹാമാരിയുടെ കാലഘട്ടത്തിൽ വെളിവാക്കപ്പെട്ട സത്യമാണ്. ഇതോടെ ഉത്പന്നങ്ങൾക്കായി ചൈനയെ മാത്രം ആശ്രയിക്കുന്നതിലെ റിസ്ക് ലോകരാജ്യങ്ങൾ തിരിച്ചറിഞ്ഞു. ചൈന+1 വ്യാപാരനയം യൂറോപ്പ് ഉൾപ്പെടെയുള്ള വികസിത സമ്പദ്ഘടനകളിൽ അലയടിച്ചു.

ഇതിനോടൊപ്പം ജിയോപൊളിറ്റിക്കൽ കാലാവസ്ഥ പ്രക്ഷുബ്ധമാകുന്നതും വിശ്വസിക്കാവുന്ന പങ്കാളി എന്ന നിലയിൽ ഇന്ത്യയെ ആകർഷകമാക്കി. ഇവയോടൊപ്പം ലോകത്ത് അതിവേ​ഗം വളരുന്ന വൻകിട സമ്പദ്ഘടനയെന്ന നേട്ടവും വലിയ ആഭ്യന്തര വിപണിയും ഇന്ത്യയ്ക്ക് വ്യാപാര കരാറുകൾ സ്വന്തമാക്കുന്നതിന് വഴിയൊരുക്കുവെന്നാണ് പൊതുവായ വിലയിരുത്തൽ.