ജിഎസ്ടി പരിഷ്കരണം: നിത്യോപയോഗ വസ്തുക്കൾക്ക് വില കുറയും, വില കുറയുന്ന ഉൽപ്പന്നങ്ങള്‍ ഇവയാണ്

കേന്ദ്രം നിർദ്ദേശിക്കുന്ന ജിഎസ്ടി പരിഷ്കാരങ്ങൾ യാഥാർത്ഥ്യമായാല്‍ വില കുറയുക ദൈനംദിന ഉപയോഗ സാധനങ്ങള്‍ ഉള്‍പ്പെടെ നിരവധി വസ്തുക്കളുടെ. ബിഹാർ ഉപമുഖ്യമന്ത്രി സാമ്രാട്ട് ചൗധരി കൺവീനറായ മന്ത്രിതല സമിതി ഈ ആഴ്ച യോഗം ചേർന്ന് നിർദ്ദേശങ്ങൾ ജിഎസ്ടി കൗൺസിലിന്റെ അംഗീകാരത്തിനായി അയയ്ക്കുമെന്നാണ് കരുതുന്നത്. റഫ്രിജറേറ്ററുകൾ, എയർ കണ്ടീഷണറുകൾ, ആരോഗ്യ സംരക്ഷണ ഉൽപ്പന്നങ്ങൾ, സേവനങ്ങൾ എന്നിവയുൾപ്പെടെയുള്ള നിരവധി വസ്തുക്കളുടെ വില കുറയും.

നിലവിലുള്ള 12 ശതമാനവും 28 ശതമാനവും സ്ലാബുകൾ ഒഴിവാക്കി 5 ശതമാനവും 18 ശതമാനവും എന്ന രണ്ട് നിരക്കിലുള്ള ജിഎസ്ടി സംവിധാനമാണ് കേന്ദ്രം നിർദ്ദേശിച്ചിരിക്കുന്നത്.

5 ശതമാനം ബ്രാക്കറ്റിലേക്ക് മാറുമെന്ന് പ്രതീക്ഷിക്കുന്ന നിത്യോപയോഗ സാധനങ്ങളും സേവനങ്ങളും ഇവയാണ്.

•പല്ലുപൊടി, ടൂത്ത് പേസ്റ്റ്, സോപ്പുകൾ, മുടിയില്‍ ഉപയോഗിക്കുന്ന എണ്ണ

• സംസ്കരിച്ച ഭക്ഷണങ്ങൾ, ലഘുഭക്ഷണങ്ങൾ, ശീതീകരിച്ച പച്ചക്കറികൾ, കണ്ടൻസ്ഡ് പാൽ

• മൊബൈലുകൾ, കമ്പ്യൂട്ടറുകൾ, തയ്യൽ മെഷീനുകൾ, പ്രഷർ കുക്കറുകൾ, ഗീസറുകൾ

• വാട്ടർ ഫിൽട്ടറുകൾ (വൈദ്യുതി ആവശ്യമില്ലാത്ത), ഇസ്തിരിപ്പെട്ടികള്‍, വാക്വം ക്ലീനറുകൾ

• 1,000 രൂപക്ക് മുകളിലുള്ള റെഡിമെയ്ഡ് വസ്ത്രങ്ങൾ, 500 നും 1,000 രൂപക്കും ഇടയിലുളളപാദരക്ഷകൾ

• മിക്ക വാക്സിനുകളും, എച്ച്ഐവി/ക്ഷയരോഗ നിർണ്ണയ കിറ്റുകള്‍, ആയുർവേദ മരുന്നുകള്‍

• സൈക്കിളുകൾ, മണ്ണെണ്ണ ആവശ്യമില്ലാത്ത സ്റ്റൗകൾ, പാചക പാത്രങ്ങൾ

• വ്യായാമ പുസ്തകങ്ങൾ, ജ്യോമട്രി ബോക്സുകൾ, ഭൂപടങ്ങൾ, ഗ്ലോബുകൾ

• ഗ്ലേസ്ഡ് ടൈലുകൾ, പ്രീ-ഫാബ്രിക്കേറ്റഡ് കെട്ടിടങ്ങൾ, വെൻഡിംഗ് മെഷീനുകൾ

• പൊതുഗതാഗത വാഹനങ്ങൾ, കാർഷിക യന്ത്രങ്ങൾ

• സോളാർ വാട്ടർ ഹീറ്ററുകൾ

18 ശതമാനം സ്ലാബിൽ വില കുറയുന്ന സാധനങ്ങൾ

• ഇൻഷുറൻസ് (ചില പ്രീമിയങ്ങള്‍ 0 ശതമാനമായേക്കാം)

• സിമൻറ്, റെഡി-മിക്സ് കോൺക്രീറ്റ്

• ടിവികൾ, റഫ്രിജറേറ്ററുകൾ, വാഷിംഗ് മെഷീനുകൾ, എസികൾ

• കാർ, മോട്ടോർ സൈക്കിൾ സീറ്റുകൾ, റെയിൽവേ എസി യൂണിറ്റുകൾ

• ഡിഷ്‌വാഷറുകൾ, പഞ്ചസാര സിറപ്പുകൾ

• പ്ലാസ്റ്റിക് ഉൽപ്പന്നങ്ങൾ, റബ്ബർ ടയറുകൾ, അലുമിനിയം ഫോയിൽ, ടെമ്പർഡ് ഗ്ലാസ്

• പ്രിന്ററുകൾ, റേസറുകൾ, മാനിക്യൂർ കിറ്റുകൾ, ഡെന്റൽ ഫ്ലോസ്

ദീപാവലിക്ക് മുമ്പുതന്നെ പുതിയ ജിഎസ്ടി ഘടന പുറത്തിറക്കാനുളള ശ്രമങ്ങളിലാണ് കേന്ദ്ര സർക്കാര്‍. ജിഎസ്ടി കൗൺസിലിന്റെ ആദ്യ യോഗം സെപ്റ്റംബർ പകുതിയോടെ നടക്കുമെന്നാണ് പ്രതീക്ഷിക്കുന്നത്. പുതിയ നിരക്കുകൾ നടപ്പിലാക്കിയാൽ സര്‍ക്കാര്‍ വരുമാനത്തിൽ ഉടനടി ചില പ്രത്യാഘാതങ്ങൾ ഉണ്ടായേക്കാം. എന്നാൽ വിലക്കുറവ് മൂലം ഉപഭോഗം വർദ്ധിക്കുന്നത് വിപണിയില്‍ ഉണർവിന് കാരണമാകുമെന്നാണ് വിലയിരുത്തല്‍.

_{GST reform likely to reduce prices of daily-use items and services across India.}