12 മാസം കൊണ്ട് ₹10,000 വളര്‍ന്ന് ₹23,000! ഏതാണ് മെച്ചം, സ്വര്‍ണമോ വെള്ളിയോ ഓഹരിയോ?

കണക്കു കൂട്ടി നോക്കിയിട്ടുണ്ടോ? ഈ വര്‍ഷമാദ്യം 10,000 രൂപ നിക്ഷേപിച്ചിരുന്നെങ്കില്‍ ഇപ്പോള്‍ എത്രയായായേനെ? നമുക്കൊന്നു കണക്കു കൂട്ടി നോക്കാം.

എഫ്.ഡിയാണെങ്കില്‍ 12 മാസം കൊണ്ട് പതിനായിരത്തിന്റെ കൂടെ ഏറിയാല്‍ 650 രൂപ പലിശ കിട്ടിയേനെ. ബാങ്ക് പലിശ ശരാശരി ആറര ശതമാനം മാത്രം.

സ്വര്‍ണത്തിലോ, വെള്ളിയിലോ ചെമ്പിലോ, അല്ലെങ്കില്‍ വേണ്ട ഓഹരി വിപണിയിലിട്ടിരുന്നെങ്കില്‍ എത്ര കിട്ടുമായിരുന്നു എന്ന് ചിന്തിച്ചിട്ടുണ്ടോ? ലോഹങ്ങളുടെ വര്‍ഷമായിരുന്നു ഇത്. കണക്കു കേട്ടാല്‍ ഞെട്ടും.

ഏറ്റവും കൂടുതല്‍ വരുമാനം നല്‍കിയത് വെള്ളി. 150 ശതമാനം വരെയാണ് വില കയറിയത്. എന്നുവെച്ചാല്‍ 10,000 രൂപ ഇന്ന് 23,000 രൂപയായേനെ.

സ്വര്‍ണം കയറിയത് 80 ശതമാനം വരെയാണ്. 10,000 രൂപയിട്ടാല്‍ ഇന്ന് കിട്ടുമായിരുന്നത് 18,000 വരെ. ഇനി കോപ്പറിന്റെ കാര്യം നോക്കാം. ചെമ്പിന് വില കൂടിയത് 40 ശതമാനത്തോളം. 12 മാസം മുമ്പത്തെ 10,000 ഇന്ന് 13,500.

എഫ്.ഡിയേക്കാളും ഭേദമാണെന്നു പറയാമെന്നല്ലാതെ ഓഹരി വിപണി ശോഭിച്ചില്ല. നിഫ്റ്റി-50 സൂചികയുടെ വളര്‍ച്ച പരമാവധി 12 ശതമാനം. എന്നുവെച്ചാല്‍ 10,000 രൂപ വളര്‍ന്ന് 11,200 രൂപയായേനെ. ബാങ്ക് നിഫ്റ്റിയാണെങ്കില്‍ 16 ശതമാനം വളര്‍ച്ച. വരുമാനം 1,600 രൂപ.

അടുത്ത വര്‍ഷം ഏതാണ് കൂടുതല്‍ വരുമാനം തരുക? ഏതായാലും എഫ്.ഡിയാവില്ല. പക്ഷേ, ഭദ്രത-അതൊന്നു വേറെ തന്നെ. സ്വര്‍ണവും വെള്ളിയും അടുത്ത വര്‍ഷം ഇതേപോലെ നിക്ഷേപ മൂല്യം പെരുപ്പിക്കുമെന്ന് കരുതുന്നവര്‍ ആരുമുണ്ടാവില്ല. എന്നാല്‍ ചാഞ്ചാട്ടത്തോടെ വില ഇനിയും കയറുമെന്ന് കരുതുന്നവരാണ് ഏറെ.