വിദേശപഠനം: ഇന്ത്യന്‍ വിദ്യാര്‍ത്ഥികള്‍ക്കിഷ്ടം അമേരിക്ക തന്നെ, പിന്നെ കാനഡ
പോളണ്ട്, തായ്‌വാന്‍, ബെല്‍റസ്, സൗത്ത് ആഫ്രിക്ക തുടങ്ങിയ രാജ്യങ്ങളോടും പ്രിയം
വിദേശ പഠനത്തിന് ഇന്ത്യന്‍ വിദ്യാര്‍ത്ഥികള്‍ തിരഞ്ഞെടുക്കുന്ന രാജ്യങ്ങളുടെ പട്ടികയില്‍ വീണ്ടും ഒന്നാം സ്ഥാനത്തെത്തി യു.എസ്. കാനഡയെ പിന്തള്ളിയാണ് യു.എസ് ഈ സ്ഥാനം തിരിച്ചുപിടിച്ചിതെന്ന് അപ്‌ഗ്രേഡ് സ്റ്റഡി എബ്രോഡിന്റെ ട്രാന്‍സ്‌നേഷണല്‍ എഡ്യുക്കേഷന്‍ റിപ്പോര്‍ട്ട് 2.0 നെ അധികരിച്ച് ഇക്കണോമിക് ടൈസ് റിപ്പോര്‍ട്ട് ചെയ്യുന്നു.
സമ്മിശ്രപഠന രീതിയോടും പ്രിയം
ഓണ്‍ലൈനായി പഠനം തുടങ്ങുകയും പിന്നീട് കാംപസിലേക്ക് പഠനം മാറ്റുകയും ചെയ്യുന്ന സമ്മിശ്ര പഠന രീതി കോവിഡിനു ശേഷം ഉയര്‍ന്നിട്ടുണ്ട്. സര്‍വേയില്‍ പങ്കെടുത്ത 67 ശതമാനം പേര്‍ പുതിയ പഠന രീതി പിന്തുടരുന്നതിനോട് അനുകൂല മനോഭാവം പ്രകടിപ്പിച്ചു. പഠനശേഷമുള്ള വര്‍ക്ക് വിസയും സ്ഥിരതാമസവുമാണ് അവര്‍ ലക്ഷ്യമിടുന്നത്.
ഉന്നത വിദ്യാഭ്യാസത്തിനായി വിദേശത്തു പോകുന്ന വിദ്യാര്‍ത്ഥികളുടെ എണ്ണം 2022 ല്‍ കഴിഞ്ഞ ആറ് വര്‍ഷത്തെ റെക്കോഡ് കുതിപ്പ് രേഖപ്പെടുത്തിയിരുന്നു. വിദ്യാഭ്യാസത്തിന്റെ നിലവാരത്തിനപ്പുറം അതാതു രാജ്യങ്ങളില്‍ ലഭിക്കുന്ന സാമൂഹിക സുരക്ഷയും ഉന്നത ജീവിതനിലവാരവും യുവജനങ്ങളെ വിദേശങ്ങളിലേക്ക് ആകര്‍ഷിക്കുന്നു.