ലോകത്തെ ഏറ്റവും വലിയൊരു ജനാധിപത്യ രാജ്യം മറ്റൊരു രാജ്യത്തെ പ്രസിഡന്റിനെയും ഭാര്യയേയും ഉറങ്ങിക്കിടക്കുമ്പോൾ പിടികൂടി കൊണ്ടുപോകുന്നു. അന്താരാഷ്ട്ര നിയമങ്ങളെയും മര്യാദകളെയും നോക്കുകുത്തിയാക്കി സ്വന്തം രാജ്യത്തെ നിയമങ്ങൾ പ്രകാരം ശിക്ഷിക്കാൻ ഒരുങ്ങുന്നു. വെനിസ്വേലയുടെ എണ്ണയിൽ കണ്ണു വെക്കുന്ന ഡൊണൾഡ് ട്രംപിന്റെ കടുത്ത നടപടിയിലൂടെ ലോകം പുതിയ ഉത്കണ്ഠകളിൽ.
വെനിസ്വേലയിൽ കടുത്ത രാഷ്ട്രീയ അസ്ഥിരതയുണ്ട്. ഭരണകൂടത്തിന്റെ നിയമസാധുതയെച്ചൊല്ലി അന്തർദേശീയ ആശങ്കകളുണ്ട്. മനുഷ്യാവകാശ ആരോപണങ്ങൾ നിലനിൽക്കുന്നു. അതിനെല്ലാമിടയിലും ‘ലോക പോലീസാ’യി അമേരിക്ക നടത്തിയ നീക്കം എണ്ണശേഖരത്തിൽ കണ്ണുവെച്ചാണ് എന്ന കാര്യത്തിൽ ആർക്കുമില്ല. അമേരിക്ക ആദ്യം എന്ന ട്രംപ് നയത്തിന്റെ തുടർച്ചയായ വെനിസ്വേലയിലെ നടപടി വലിയ ശക്തികൾ തമ്മിലുള്ള പോരും മത്സരവും കൂടുതൽ രൂക്ഷമാക്കും.
വെനിസ്വേല ലോകത്തിലെ ഏറ്റവും വലിയ എണ്ണശേഖരങ്ങളിലൊന്നാണ്. ഇവിടെ ഉണ്ടാകുന്ന അസ്ഥിരത ആഗോള എണ്ണവിതരണ ശൃംഖലയെ ബാധിക്കും. എണ്ണവിലയിൽ താൽക്കാലിക ഉയർച്ച പ്രതീക്ഷിക്കണം. എണ്ണ ഇറക്കുമതി ചെയ്യുന്ന രാജ്യങ്ങൾക്ക് ചെലവ് വർധിക്കുകയും, ബദൽ വിതരണ കേന്ദ്രങ്ങൾ തേടേണ്ടിവരുന്ന സാഹചര്യം ഉണ്ടാവുകയും ചെയ്യും. ഇവയെല്ലാം ചേർന്ന് ആഗോള സാമ്പത്തിക രംഗത്ത് അനിശ്ചിതത്വം കൂട്ടാൻ സാധ്യതയുണ്ട്.
അമേരിക്കയുടെ നടപടി പിന്തുണയ്ക്കുന്ന രാജ്യങ്ങളും എതിർക്കുന്ന രാജ്യങ്ങളും തമ്മിലുള്ള ഭിന്നത കൂടുതൽ ശക്തമാവുന്നു. ലാറ്റിൻ അമേരിക്കൻ മേഖലയിൽ അമേരിക്കയ്ക്കെതിരായ വികാരം ശക്തമാകാനും, മറ്റ് വലിയ ശക്തികൾ വെനിസ്വേലയുമായി കൂടുതൽ അടുക്കാനും സാധ്യതയുണ്ട്. ഇത് ആഗോള ശക്തിസമവാക്യങ്ങളിൽ പുതിയ കൂട്ടുകെട്ടുകൾക്ക് വഴിയൊരുക്കാം.
1990-കളിൽ ഇറാഖിനെതിരെ അമേരിക്ക നേതൃത്വം നൽകിയ നടപടികളെ ഓർമിപ്പിക്കുകയാണ് വെനിസ്വേല. തന്ത്രപ്രധാനമായ എണ്ണസമ്പത്ത്, ഭരണകൂടത്തിന്റെ നിയമസാധുതയെച്ചൊല്ലിയ വാദങ്ങൾ, അന്തർദേശീയ പിന്തുണ സമാഹരിക്കാനുള്ള ശ്രമങ്ങൾ എന്നിവയിലെല്ലാം സാമ്യങ്ങളുണ്ട്. എന്നാൽ ആഗോള രാഷ്ട്രീയ സാഹചര്യങ്ങളും, ബഹുപക്ഷ സംവിധാനങ്ങളുടെ പങ്കും, പ്രാദേശിക ശക്തിസമവാക്യങ്ങളും ഇവിടെ വ്യത്യസ്തമാണ്.
അമേരിക്കയുടെ വാദമനുസരിച്ച്, ജനാധിപത്യവും മനുഷ്യാവകാശവും സംരക്ഷിക്കലാണ് ലക്ഷ്യം. എന്നാൽ അന്തർദേശീയ നിയമങ്ങൾ അട്ടിമറിക്കുന്ന ഏകപക്ഷീയ നടപടികൾ ദീർഘകാലത്തിൽ കൂടുതൽ അസ്ഥിരത സൃഷ്ടിക്കാൻ പര്യാപ്തമാണ്. അമേരിക്കൻ നീക്കം ഒരു രാജ്യത്തിന്റെ വിഷയമാത്രമല്ല; അത് ആഗോള രാഷ്ട്രീയ, സമ്പദ് ഘടനകളെ ബാധിക്കുന്നതാണ്. എണ്ണവില മുതൽ രാജ്യാന്തര ബന്ധങ്ങൾ വരെ, ഇതിന്റെ പ്രത്യാഘാതങ്ങൾ ദീർഘകാലം അനുഭവപ്പെടാൻ സാധ്യതയുണ്ട്. ലോകക്രമം എങ്ങോട്ട് നീങ്ങുമെന്ന് നിർണയിക്കുക ഇനി വരുന്ന നയതന്ത്ര നീക്കങ്ങളായിരിക്കും.
വെനിസ്വേലയെതിരെ യുഎസ് ഔദ്യോഗികമായി പൂർണ സൈനിക യുദ്ധം പ്രഖ്യാപിച്ചിട്ടില്ല. എന്നാൽ, കഴിഞ്ഞ കുറേ വർഷങ്ങളായി നടപ്പാക്കിയ നടപടികൾ സാമ്പത്തികവും നയതന്ത്രവുമായ ആക്രമണം തന്നെ. അതിന് യു.എസിനു മുമ്പിലുള്ള കാരണങ്ങൾ പലതുണ്ട്. ലോകത്തിലെ ഏറ്റവും വലിയ എണ്ണശേഖരമുള്ള രാജ്യം എന്ന പ്രാധാന്യം. വെനിസ്വേല ഭരണകൂടത്തിന്റെ റഷ്യ, ചൈന, ഇറാൻ ബന്ധങ്ങൾ. ലാറ്റിൻ അമേരിക്കയിൽ യുഎസ് സ്വാധീനം നിലനിർത്താനുള്ള ശ്രമം. ഉപരോധങ്ങളിലൂടെ ലക്ഷ്യമിട്ടത് എണ്ണവരുമാനം തകർക്കുക, അതിലൂടെ ഭരണകൂടത്തെ ദുർബലമാക്കുക എന്നതായിരുന്നു. മയക്കുമരുന്ന് വ്യാപാരവുമായി ബന്ധമുള്ള ‘നാർക്കോ സ്റ്റേറ്റ്’ ആയി മുദ്ര കുത്തിക്കൊണ്ട്, നയതന്ത്രത്തിന് പകരം കടുത്ത സമ്മർദത്തിന്റെ രീതികളാണ് ട്രംപ് മുന്നോട്ടു നീക്കിയത്.
വെനിസ്വേലയെതിരായ യുഎസ് ഉപരോധങ്ങൾ ആഗോള എണ്ണവിപണിയെ നേരിട്ട് ബാധിച്ചു. യുഎസ് റിഫൈനറികൾക്ക് ആവശ്യമായ ഹെവി ക്രൂഡ് ലഭ്യത കുറഞ്ഞു. വെനിസ്വേലൻ എണ്ണ കുറഞ്ഞ വിലയ്ക്ക് റഷ്യയും ചൈനയും വാങ്ങാൻ തുടങ്ങി. ഏഷ്യൻ വിപണിയിൽ പരോക്ഷ ഇടപാടുകൾ വർധിച്ചു. OPEC രാജ്യങ്ങൾക്കിടയിലെ ഐക്യം ദുർബലമായി. എണ്ണം വെറും വ്യാപാര ഇനമല്ല, ജിയോപൊളിറ്റിക്കൽ ആയുധം കൂടിയായി മാറി.
വെനിസ്വേലയിൽ അമേരിക്ക സ്വീകരിക്കുന്ന നടപടികളിൽ ഇറാഖുമായുള്ള സാമ്യങ്ങൾ പലതാണ്. കടുത്ത സാമ്പത്തിക ഉപരോധങ്ങൾ, എണ്ണവരുമാനം നിയന്ത്രിക്കൽ, ഭരണകൂടത്തെ ആഗോള ഭീഷണിയായി ചിത്രീകരിക്കൽ, രഹസ്യാന്വേഷണ വിവരങ്ങളുടെ പേരിലുള്ള സംശയങ്ങളും ആരോപണങ്ങളും, ഇതിനെല്ലാമിടയിൽ സാധാരണ ജനങ്ങളുടെ ദുരിതം വർധിക്കൽ... ഇറാഖിൽ ഉപരോധങ്ങൾ ഒടുവിൽ യുദ്ധത്തിലേക്ക് നയിച്ചു. അതുകൊണ്ടാണ് വെനിസ്വേലയിലും അതേ വഴിയോ എന്ന ആശങ്ക ഉയരുന്നത്. എന്നാൽ വെനിസ്വേല ഇറാഖ് അല്ല. വെനിസ്വേലയുടെ കാര്യത്തിൽ യുഎൻ അംഗീകൃത സൈനിക സഖ്യമില്ല. റഷ്യ–ചൈനയുടെ ശക്തമായ പിന്തുണ അവർക്കുണ്ട്. യുഎസിൽ യുദ്ധവിരോധ മനോഭാവം നിലനിൽക്കുന്നു. എണ്ണവിപണിയിലെ അസ്ഥിരതയോടുള്ള ആഗോള ഭയം മറുവശത്ത്. ഇവയെല്ലാം നേരിട്ടുള്ള സൈനിക ആക്രമണത്തിന് തടസ്സങ്ങളാണ്. 1990കളിൽ ഇറാഖ് ഏകധ്രുവ ലോകത്തിന്റെ ചിഹ്നമായിരുന്നെങ്കിൽ, ഇന്ന് വെനിസ്വേല ഭിന്നിച്ച, ബഹുധ്രുവ ലോകത്തിന്റെ സൂചന ആയി മാറുന്നു.
യുഎസ് വാദങ്ങൾ എന്തൊക്കെയാണ്? ജനാധിപത്യ സംരക്ഷണം, പ്രാദേശിക അസ്ഥിരത തടയൽ, മയക്കുമരുന്ന് വ്യാപാര ശൃംഖലകൾ തകർക്കൽ, ഊർജസുരക്ഷ ഉറപ്പാക്കൽ. അത്തരം വാദഗതികൾക്കിടയിൽ ശക്തമായി ഉയർന്നു വരുന്ന പ്രശ്നങ്ങൾ എന്തൊക്കെയാണ്? ഇത് രാജ്യപരമാധികാര ലംഘനമാണ്. അന്താരാഷ്ട്ര നിയമങ്ങളിലെ ഇരട്ടത്താപ്പാണ്. ശക്തിയുള്ളവർക്ക് മാത്രം നിയമം ബാധകമല്ലാത്ത അവസ്ഥ.
മുന്നിലുള്ള സാധ്യതകൾ: ദീർഘകാല ഉപരോധവും സമ്മർദ്ദവും, യുദ്ധമില്ല. എണ്ണ, തിരഞ്ഞെടുപ്പ് വിഷയങ്ങളിൽ ചർച്ചകളിലൂടെ ഒത്തുതീർപ്പ്. അതല്ലെങ്കിൽ അപ്രതീക്ഷിത ഏറ്റുമുട്ടൽ. ഇപ്പോൾ വരെ സൂചനകൾ പറയുന്നത്, യുഎസ് യുദ്ധമില്ലാത്ത സമ്മർദ്ദനയം തുടരുമെന്നാണ്.
പുതിയ സംഭവവികാസങ്ങളുടെ പശ്ചാത്തലത്തിൽ, അടുത്ത ദിവസങ്ങളിൽ ക്രൂഡ് ഓയിൽ വിലയിൽ ചെറിയ അസ്ഥിരത ഉണ്ടാകാൻ സാധ്യതയുണ്ട്. ഇത്തരം അനിശ്ചിതത്വങ്ങളോട് വിപണികൾ സാധാരണയായി ഉടൻ പ്രതികരിക്കാറുണ്ട്. എന്നാൽ, ദീർഘകാല വില മാറ്റത്തിന് സാധ്യത കുറവാണ്. ഉപരോധങ്ങളും ഉത്പാദനപരിമിതികളും കാരണം ആഗോള എണ്ണവിപണിയിൽ വെനിസ്വേലയുടെ പങ്ക് ഇപ്പോൾ കുറവാണ്. കൂടാതെ മറ്റ് എണ്ണ ഉത്പാദക രാജ്യങ്ങളിൽ നിന്ന് ആവശ്യത്തിന് വിതരണം നടക്കുന്നുണ്ട്.
Read DhanamOnline in English
Subscribe to Dhanam Magazine
