ഉയർന്ന എണ്ണ വിലയും നാണ്യപ്പെരുപ്പ ഭീഷണിയും നിലനിൽക്കുമ്പോഴും, ശക്തമായ ആഭ്യന്തര ഉപഭോഗത്തിന്റെ (domestic consumption) കരുത്തിൽ ഇന്ത്യയുടെ സാമ്പത്തിക വളർച്ചാ നിരക്ക് ലോകബാങ്ക് ഉയർത്തി. 2026-27 സാമ്പത്തിക വർഷത്തിൽ (FY27) ഇന്ത്യ 7.1 ശതമാനം വളർച്ച നേടുമെന്നാണ് ലോകബാങ്കിന്റെ പുതിയ പ്രവചനം, മുൻപ് ഇത് 6.6 ശതമാനമായിരുന്നു. ഇതോടെ ദക്ഷിണേഷ്യൻ മേഖലയുടെ ആകെ വളർച്ചാ പ്രവചനം 6.9 ശതമാനമായും ലോക ബാങ്ക് പുതുക്കി നിശ്ചയിച്ചു.
ആഗോള തലത്തിലുണ്ടായ ഇന്ധനവില വർദ്ധനവ് ജനങ്ങളുടെ വാങ്ങൽ ശേഷിയെ ബാധിച്ചെങ്കിലും, ശക്തമായ ആഭ്യന്തര ഡിമാൻഡും സർക്കാർ പ്രതിരോധ നടപടികളും കാരണം ഇന്ത്യൻ സമ്പദ്‌വ്യവസ്ഥ തിരിച്ചടികളെ അതിജീവിച്ചു. ഏപ്രിൽ-ജൂൺ പാദത്തിൽ രാജ്യം 7.8 ശതമാനം വളർച്ച രേഖപ്പെടുത്തിയിരുന്നു. മൂഡീസ്, എസ് & പി, എ.ഡി.ബി തുടങ്ങിയ പ്രമുഖ അന്താരാഷ്ട്ര ഏജൻസികളും ഇന്ത്യയുടെ വളർച്ച പ്രവചനങ്ങൾ നേരത്തെ ഉയർത്തിയിട്ടുണ്ട്.
ഉയർന്ന എണ്ണവില: ഇറക്കുമതിയെ കൂടുതലായി ആശ്രയിക്കുന്നതിനാൽ ക്രൂഡ് ഓയിൽ വിലയിലുണ്ടാകുന്ന വർദ്ധനവ് നാണ്യപ്പെരുപ്പത്തിനും അതുവഴി വളർച്ചയ്ക്കും വെല്ലുവിളിയാകും.
എൽ നിനോ (El Niño) പ്രതിഭാസം: കടുത്ത എൽ നിനോ മൂലം മഴ കുറഞ്ഞാൽ അത് കാർഷിക ഉൽപ്പാദനത്തെയും ഗ്രാമീണ മേഖലയിലെ ആവശ്യകതയെയും (rural demand) പ്രതികൂലമായി ബാധിക്കുകയും ഭക്ഷ്യവിലക്കയറ്റത്തിന് കാരണമാകുകയും ചെയ്തേക്കാം.
എഐ (AI) സാങ്കേതികവിദ്യയുടെ പങ്കാളിത്തം: ദീർഘകാല വളർച്ച നിലനിർത്തുന്നതിനും മികച്ച തൊഴിലവസരങ്ങൾ സൃഷ്ടിക്കുന്നതിനുമായി നിര്‍മ്മിത ബുദ്ധി (AI) കൂടുതൽ വേഗത്തിൽ സ്വീകരിക്കണമെന്ന് ലോകബാങ്ക് നിർദ്ദേശിക്കുന്നു. നിലവിൽ യു.എസിലെ 43 ശതമാനം കമ്പനികൾ എഐ ഉപയോഗിക്കുമ്പോൾ ഇന്ത്യയിൽ ഇത് 23 ശതമാനം മാത്രമാണ്.
Read DhanamOnline in English
Subscribe to Dhanam Magazine
