കാമ്പസ് റിക്രൂട്ട്‌മെന്റ്: മോഹിപ്പിക്കുന്ന വേതന വര്‍ധനയില്ല

ബാഗ്ലൂരിലെ ഐഐഎം-ലെ 481 വിദ്യാര്‍ത്ഥികളില്‍ 435 പേര്‍ക്ക് ഓഫറുകള്‍ ലഭിച്ചപ്പോള്‍ കോഴിക്കോട ഐഐഎം-ലെ 459 പേര്‍ക്കാണ് അവസരം കിട്ടിയത്. ജാംഷഡ്പൂരിലെ XLRI -യില്‍ നിന്നുള്ള 358 വിദ്യാര്‍ത്ഥികളും ഓഫറുകള്‍ നേടിയപ്പോള്‍ ലഖ്‌നൗ ഐഐഎം-ലെ 460 പേര്‍ക്ക് അവസരം ലഭിച്ചു. അഹമ്മദാബാദ്, കൊല്‍ക്കത്ത എന്നിടങ്ങളിലെ ഐഐഎം-കളിലെ ഓഫര്‍ പ്രക്രിയ ഇനിയും പൂര്‍ത്തിയായിട്ടില്ല. ഐഐഎം ലഖ്‌നവിലെ വിദ്യാര്‍ത്ഥികള്‍ക്ക് ശരാശരി 7 ശതമാനം ശമ്പള വര്‍ദ്ധന ലഭിച്ചപ്പോള്‍ കോഴിക്കോടുകാര്‍ക്ക് ലഭിച്ച ഒഫറുകള്‍ കഴിഞ്ഞ വര്‍ഷത്തെ അപേക്ഷിച്ച് 5 ശതമാനം കുറവായിരുന്നു. XLRI-യില്‍ ശരാശരി 3 ശതമാനം വര്‍ദ്ധന രേഖപ്പെടുത്തി.

കണ്‍സള്‍ട്ടിംഗ്, ബാങ്കിംഗ്, ഇന്‍ഷ്വറന്‍സ്, ഐടി തുടങ്ങിയ മേഖലകളാണ് ഏറ്റവുമധികം ഉദ്യോഗാര്‍ത്ഥികളെ തെരഞ്ഞെടുത്തത്. ഇ-കൊമേഴ്‌സ് മേഖലയിലെ പ്രമുഖ സ്ഥാപനങ്ങളായ ആമസോണും, ഫ്‌ളിപകാര്‍ടും റിക്രൂട്ട്‌മെന്റില്‍ സജീവമായിരുന്നു. ബൈജൂസ് ആപ്പ്, പേടിഎം തുടങ്ങിയ സ്ഥാപനങ്ങളും സജീവമായിരുന്നു. കോവഡിന്റെ പശ്ചാത്തലത്തില്‍ റിക്രൂട്ടമെന്റ് ഓണ്‍ലൈനില്‍ ആയത് വലിയ വെല്ലുവിളിയാണെന്ന് മാനേജ്‌മെന്റ് ഇന്‍സ്റ്റിറ്റ്യൂട്ടുകള്‍ വിലയിരുത്തുന്നു. ഐഐഎം-പോലുള്ള ഒന്നാം നിര സ്ഥാപനങ്ങള്‍ പോലും 100 ശതമാനം പ്ലേസ്‌മെന്റുകള്‍ ഉറപ്പിക്കുവാന്‍ പ്രയാസപ്പെടുമ്പോള്‍ രണ്ടും, മൂന്നും നിരകളില്‍ ഉള്ള സ്ഥാപനങ്ങളുടെയും, വിദ്യാര്‍ത്ഥികളുടെയും സ്ഥിതി അത്ര എളുപ്പമാവില്ല. അത്തരം സ്ഥാപനങ്ങളില റിക്രൂട്ട്‌മെന്റ് പ്ര്ക്രിയ ജൂണ്‍-ജൂലൈ മാസങ്ങള്‍ കഴിയാതെ പൂര്‍ത്തിയാവില്ലെന്നു കരുതപ്പെടുന്നു. സാമ്പത്തിക മേഖലയില്‍ പൊതുവേ ദൃശ്യമാവുന്ന തിരിച്ചു വരവിന്റെ ഉണര്‍വ് സ്ഥിതിഗതികളെ മെച്ചപ്പെടുത്തുമെന്നു കരുതുന്നവരും വിരളമല്ല. അടുത്ത വര്‍ഷത്തെ റിക്രൂട്ട്‌മെന്റ് സീസണിലാവും സാമ്പത്തിക മേഖലയുടെ തിരിച്ചു വരവിന്റെ പ്രതിഫലനം വ്യക്തമാവുക എന്നാണ് അവരുടെ വിലയിരുത്തല്‍.