യുവത്വത്തില്‍ സംരംഭകത്വം ഒരു ട്രെന്‍ഡായി മാറുകയാണ്. സ്ഥിരമായ കോര്‍പറേറ്റ് ജോലി വിട്ട് സ്വന്തം ആശയത്തില്‍ ബിസിനസ് തുടങ്ങണമെന്ന ആഗ്രഹം ഇന്ന് നിരവധി യുവാക്കളെ ആകര്‍ഷിക്കുന്നു. എന്നാല്‍, 'സ്വന്തം ബോസാകുക' എന്ന ആശയത്തിന്റെ തിളക്കത്തിന് അപ്പുറം, ശമ്പളമില്ലാത്ത ആദ്യ വര്‍ഷങ്ങള്‍ കൈകാര്യം ചെയ്യാന്‍ കഴിയുമോ എന്ന ചോദ്യമാണ് യഥാര്‍ഥ വെല്ലുവിളി.
ഒരു സ്റ്റാര്‍ട്ടപ് വിജയിക്കണമെങ്കില്‍ മികച്ച ഐഡിയയും ബിസിനസ് പ്ലാനും മാത്രമല്ല, ഉറച്ച സാമ്പത്തിക പ്ലാനും അനിവാര്യമാണ്. ശമ്പളമുള്ള ജോലി ഉപേക്ഷിക്കുന്ന നിമിഷം മുതല്‍ വ്യക്തിജീവിതവും സാമ്പത്തികമായി ഒരു പരീക്ഷണഘട്ടത്തിലേക്കാണ് കടക്കുന്നത് എന്നോര്‍ക്കണം.
പുതിയ സംരംഭങ്ങളില്‍ പലതും ആദ്യ മാസങ്ങളില്‍ വരുമാനം സൃഷ്ടിക്കാറില്ല. ചിലപ്പോള്‍ ലാഭത്തിലേക്ക് എത്താന്‍ ഒരു വര്‍ഷമോ അതിലധികമോ എടുക്കാം. എന്നാല്‍ പല യുവ സംരംഭകരും വരുമാനം വളരെ വേഗം വാരാമെന്ന് കണക്കുകൂട്ടിയാണ് ജോലി രാജിവെക്കുന്നത്. ഈ അമിത പ്രതീക്ഷകളാണ് പിന്നീട് സമ്മര്‍ദ്ദത്തിനും പാതിവഴിയില്‍ സംരംഭം ഉപേക്ഷിക്കലിനും കാരണമാകുന്നത്.
വിദഗ്ധര്‍ പറയുന്നത് ലളിതമാണ്: ബിസിനസ് തുടങ്ങുന്നതിന് മുന്‍പ് കുറഞ്ഞത് രണ്ടുമുതല്‍ മൂന്ന് വര്‍ഷം വരെ വീട്ടുചെലവുകള്‍ നിറവേറ്റാന്‍ കഴിയുന്നൊരു ധനശേഖരം ഉണ്ടാകണം. ഈ കാലയളവില്‍ ബിസിനസിന് പണം ഉണ്ടാകില്ലെന്ന് കരുതി തന്നെയാണ് പ്ലാനിങ് വേണ്ടത്.
ആദ്യം സ്വന്തം പ്രതിമാസ ചെലവുകള്‍ സത്യസന്ധമായി കണക്കാക്കണം. വാടക, ഭക്ഷണം, യാത്ര, വിദ്യാഭ്യാസ ചെലവ്, ഇന്‍ഷുറന്‍സ് പ്രീമിയം, വായ്പാ ഇഎംഐകള്‍ - എല്ലാം ചേര്‍ത്തുള്ള കണക്ക്. ഇതിന്റെ അടിസ്ഥാനത്തില്‍ 24 മുതല്‍ 36 മാസം വരെ ചെലവുകള്‍ക്കുള്ള പണം മുന്‍കൂട്ടി മാറ്റിവെക്കണം.
ഈ തുക മുഴുവനും സേവിങ്‌സ് അക്കൗണ്ടില്‍ പാര്‍ക്ക് ചെയ്യുന്നതിന് പകരം, ആവശ്യം വന്നാല്‍ ഉടന്‍ പിന്‍വലിക്കാവുന്ന ലിക്വിഡ് ഫണ്ടുകളിലും കുറഞ്ഞ അപകടസാധ്യതയുള്ള ഹ്രസ്വകാല നിക്ഷേപങ്ങളിലും സൂക്ഷിക്കുന്നതാണ് ഉചിതം. ഇതിലൂടെ പണത്തിന് ചെറിയ വരുമാനവും ലഭിക്കും.
യുവാക്കള്‍ പലപ്പോഴും അവഗണിക്കുന്ന ഒന്നാണ് ഇന്‍ഷുറന്‍സ്. ജോലി ഉപേക്ഷിക്കുന്നതിന് മുന്‍പ് ആരോഗ്യ ഇന്‍ഷുറന്‍സ് ഉറപ്പാക്കുന്നത് നിര്‍ബന്ധമാണ്. ഒരു അപ്രതീക്ഷിത മെഡിക്കല്‍ ചെലവ് വന്നാല്‍, വ്യക്തിഗത ഫണ്ടുകളും ബിസിനസ് ഫണ്ടുകളും ഒരുമിച്ച് തകരാന്‍ സാധ്യതയുണ്ട്.
ഇതോടൊപ്പം, ബിസിനസ് ഫണ്ടുകളില്‍ നിന്ന് പൂര്‍ണമായും വേര്‍തിരിച്ച ഒരു അടിയന്തര ഫണ്ടും സൂക്ഷിക്കണം. സ്റ്റാര്‍ട്ടപ്പ് അക്കൗണ്ടില്‍ നിന്നുള്ള പണം വീട്ടുചെലവുകള്‍ക്കായി ഉപയോഗിക്കുന്നത് ദീര്‍ഘകാലത്തില്‍ ബിസിനസിന് തിരിച്ചടിയാകും.
വലിയ ക്രെഡിറ്റ് കാര്‍ഡ് കുടിശ്ശികകളോ അനാവശ്യ വായ്പകളോ ഉള്ളപ്പോള്‍ സംരംഭത്തിലേക്ക് ചാടുന്നത് അപകടകരമാണ്. സ്ഥിരവരുമാനം ഇല്ലാത്ത ഘട്ടത്തില്‍ ഇഎംഐ ബാധ്യതകള്‍ മാനസിക സമ്മര്‍ദ്ദവും സാമ്പത്തിക അസ്ഥിരതയും ഉണ്ടാക്കും.
ചില യുവ സംരംഭകര്‍ ആദ്യഘട്ടത്തില്‍ കണ്‍സള്‍ട്ടിങ് ജോലികളോ ഫ്രീലാന്‍സ് പ്രോജക്റ്റുകളോ തുടരുന്നത് വ്യക്തിഗത ചെലവുകള്‍ നിയന്ത്രിക്കാന്‍ സഹായകമാകുന്നുവെന്ന് പറയുന്നു. ഇത് ബിസിനസില്‍ മുഴുവന്‍ ശ്രദ്ധ നഷ്ടപ്പെടുത്താതെ ഒരു സാമ്പത്തിക താങ്ങായി പ്രവര്‍ത്തിക്കും.
ജോലി ഉപേക്ഷിച്ച് സംരംഭകനാകുന്നത് സാമ്പത്തിക മാറ്റം മാത്രമല്ല, മാനസിക മാറ്റവും കൂടിയാണ്. മാസാവസാനം ശമ്പളം എത്തുന്ന സുരക്ഷിതത്വം ഇല്ലാതാകുമ്പോള്‍ സംശയങ്ങളും ഭയങ്ങളും സ്വാഭാവികമാണ്. വിജയകഥകളേക്കാള്‍ കൂടുതല്‍ ക്ഷമയും നിയന്ത്രണവും ആവശ്യപ്പെടുന്നതാണ് യഥാര്‍ഥ സംരംഭക ജീവിതം.
ബിസിനസ് തുടങ്ങുന്നതിന് മുന്‍പ് വ്യക്തിജീവിതം സാമ്പത്തികമായി സ്ഥിരപ്പെടുത്താന്‍ കഴിയുന്നവര്‍ക്ക് മാത്രമാണ് ഈ യാത്ര ദീര്‍ഘകാലത്തില്‍ നിലനിര്‍ത്താന്‍ കഴിയുക. ഐഡിയ എത്ര മികച്ചതായാലും, സ്വന്തം ധനകാര്യത്തില്‍ ഉറച്ച അടിത്തറയില്ലെങ്കില്‍ സംരംഭകത്വം ഒരു ഭാരമായി മാറാന്‍ സാധ്യതയുണ്ട്.
Read DhanamOnline in English
Subscribe to Dhanam Magazine