ധനം ബിസിനസ് മീഡിയ സംഘടിപ്പിക്കുന്ന 17-ാമത് ധനം ബിസിനസ് സമിറ്റ് ആന്‍ഡ് അവാര്‍ഡ് നൈറ്റിന് തുടക്കമായി. കൊച്ചി ലെ-മെറിഡിയന്‍ കണ്‍വെന്‍ഷന്‍ സെന്ററില്‍ ഉച്ചയ്ക്ക് മൂന്ന് മണിക്ക് ആരംഭിച്ച സമ്മിറ്റ് 1,000 കോടിയിലധികം വിറ്റുവരവുള്ള കേരള കമ്പനികളുടെ സാരഥിമാര്‍ പങ്കെടുത്ത പാനല്‍ ചര്‍ച്ചയോടെയാണ് ആരംഭിച്ചത്.
ജോയ് ആലൂക്കാസ് ഗ്രൂപ്പ് ചെയര്‍മാന്‍ ഡോ. ജോയ് ആലൂക്കാസ്, സിന്തൈറ്റ് ഇന്‍ഡസ്ട്രീസ് മാനേജിംഗ് ഡയറക്റ്റര്‍ അജു ജേക്കബ്, വാക്കറൂ ഇന്റര്‍നാഷണല്‍ മാനേജിംഗ് ഡയറക്റ്റര്‍ വി. നൗഷാദ്, പോപ്പുലര്‍ വെഹിക്ക്ള്‍സ് മാനേജിംഗ് ഡയറക്റ്റര്‍ നവീന്‍ ഫിലിപ്പ് എന്നിവര്‍ പാനല്‍ ചര്‍ച്ചയില്‍ പങ്കെടുത്തു.
ലാഭത്തിനപ്പുറം സ്വാധീന നിര്‍മിതി എന്നതാണ് ഈ വര്‍ഷത്തെ സമിറ്റിന്റെ വിഷയം. ഓസ്‌കാര്‍ പുരസ്‌കാര ജേതാവ് ഗുനീത് മോംഗ കപൂര്‍ വിശിഷ്ടാതിഥയായ ചടങ്ങില്‍ ഫെസല്‍ കൊട്ടിക്കോളന്‍, മുരളി തുമ്മാരുകുടി തുടങ്ങിയവര്‍ പ്രത്യേക പ്രഭാഷണം നടത്തും.
രാത്രി 9.30 വരെ നടക്കുന്ന സമിറ്റില്‍ ബിസിനസ് മേഖലയില്‍ തിളക്കമാര്‍ന്ന നേട്ടം കൊയ്തവര്‍ക്കുള്ള ധനം ബിസിനസ് എക്സലന്‍സ് അവാര്‍ഡുകളും വിതരണം ചെയ്യും. ധനം ബിസിനസ്മാന്‍ ഓഫ് ദി ഇയര്‍ 2025 പുരസ്‌കാരം ജോയ്ആലുക്കാസ് ഗ്രൂപ്പ് ചെയര്‍മാന്‍ ജോയ്ആലുക്കാസിനാണ്. സിജിഎച്ച് എര്‍ത്ത് സഹസ്ഥാപകന്‍ ജോസ് ഡൊമിനിക്കിനാണ് ലൈഫ്ടൈം ലൈഫ്ടൈം അച്ചീവ്‌മെന്റ് പുരസ്‌കാരം. ധനം ബിസിനസ് പ്രൊഫഷണല്‍ 2025 പുരസ്‌കാരത്തിന് വി-ഗാര്‍ഡ് ഇന്‍ഡസ്ട്രീസ് ലിമിറ്റഡ് ഹോള്‍ടൈം ഡയറക്റ്ററും ചീഫ് എക്‌സിക്യുട്ടീവ് ഓഫീസറുമായ വെങ്കിട്ടരാമന്‍ രാമചന്ദ്രന്‍ അര്‍ഹനായി. എലൈറ്റ് ഗ്രൂപ്പ് എക്സിക്യൂട്ടീവ് ഡയറക്ടര്‍ ധനേസ രഘുലാലിനെ വുമണ്‍ എന്റര്‍പ്രണര്‍ ഓഫ് ദി ഇയര്‍ 2025 ആയി തിരഞ്ഞെടുത്തു. ധനം സ്റ്റാര്‍ട്ട് അപ് പുരസ്‌കാരം രാഹുല്‍ ശശി സഹസ്ഥാപകനും സി.ഇ.ഒയുമായ ക്ലൗഡ്സെകിനാണ്.
Read DhanamOnline in English
Subscribe to Dhanam Magazine
