ഇനി രോഗിയുടെ അരികിലെത്തും മൊബീല്‍ കണ്ടെയ്‌നര്‍ ഹോസ്പിറ്റല്‍; പദ്ധതിയുമായി കേന്ദ്ര സര്‍ക്കാര്‍
പിഎം ആയുഷ്മാന്‍ ഭാരത് ഹെല്‍ത്ത് ഇന്‍ഫ്രാസ്ട്രക്ചര്‍ മിഷന്റെ ഭാഗമായുള്ള 64,180 കോടി രൂപയുടെ പദ്ധതിയുടെ ഭാഗമാണിത്
ഏഷ്യന്‍ രാജ്യങ്ങളില്‍ ആദ്യമായി കണ്ടെയ്‌നറില്‍ ഒരുക്കുന്ന മൊബീല്‍ ഹോസ്പിറ്റല്‍ പദ്ധതിയുമായി കേന്ദ്ര സര്‍ക്കാര്‍. 100 പേരെ കിടത്തി ചികിത്സിക്കാന്‍ സൗകര്യമുള്ള രണ്ടു കണ്ടെയ്‌നര്‍ ഹോസ്പിറ്റലുകള്‍ ഉടനെ തയാറാവുമെന്ന് കേന്ദ്ര ആരോഗ്യ കുടുംബക്ഷേമ വകുപ്പ് മന്ത്രി മന്‍സൂഖ് മാണ്ഡവ്യ അറിയിച്ചു. ഡല്‍ഹിയിലും ചെന്നൈയിലുമാണ് തുടക്കത്തില്‍ നടപ്പാക്കുക. 33 കണ്ടെയ്‌നര്‍ ഹോസ്പിറ്റലുകള്‍ കൂടി ഉടനെ തയാറാക്കുമെന്നും അദ്ദേഹം പറയുന്നു. രാജ്യത്തെ ഏത് പ്രദേശത്തേക്കും 24 മണിക്കൂറിനുള്ളില്‍ ഈ മൊബീല്‍ ആശുപത്രിക്ക് എത്താനാവുന്ന സാഹചര്യം ഒരുക്കുകയാണ് ഇതിലൂടെ ലക്ഷ്യമിടുന്നത്. കോവിഡ് പോലുള്ള പകര്‍ച്ചവ്യാധികള്‍ പിടിപെടുമ്പോഴും എല്ലാവിധ ചികിത്സാസൗകര്യങ്ങളോടും കൂടിയ ഇത്തരം കണ്ടെയ്‌നര്‍ ഹോസ്പിറ്റലുകള്‍ ഉപകാരമാകുമെന്നാണ് കണക്കുകൂട്ടല്‍.