ഇന്ത്യൻ ഓഹരി വിപണിയിൽ വരാനിരിക്കുന്ന 'സെപ്റ്റോ' (Zepto) ഐപിഒയിലൂടെ പുതിയൊരു ചരിത്രം കുറിക്കാൻ ഒരുങ്ങുകയാണ് 23-കാരനായ ആദിത് പാലിച്ച. ഈ വർഷം അവസാനം സെപ്റ്റോ ലിസ്റ്റ് ചെയ്യുന്നതോടെ, ഇന്ത്യയിലെ ഒരു ലിസ്റ്റഡ് കമ്പനിയുടെ ഏറ്റവും പ്രായം കുറഞ്ഞ മാനേജിംഗ് ഡയറക്ടറും (MD) ചീഫ് എക്സിക്യൂട്ടീവ് ഓഫീസറുമായി (CEO) ആദിത് മാറും. സഹസ്ഥാപകനായ കൈവല്യ വോറയും (23) ഇതോടെ ലിസ്റ്റഡ് കമ്പനികളുടെ ലോകത്തേക്ക് കാലെടുത്തുവെക്കുന്ന ഏറ്റവും പ്രായം കുറഞ്ഞ സംരംഭകരിൽ ഒരാളാകും.
കോവിഡ് മഹാമാരിക്കാലത്ത് സ്റ്റാൻഫോർഡ് സർവകലാശാലയിലെ പഠനം ഉപേക്ഷിച്ച് ഇന്ത്യയിലേക്ക് മടങ്ങിയ ആദിത്തും കുട്ടിക്കാലം മുതലുള്ള സുഹൃത്തായ കൈവല്യയും ചേർന്നാണ് ഈ സംരംഭത്തിന് തുടക്കമിട്ടത്. ആദ്യം 'കിരാനകാർട്ട്' (KiranaKart) ആരംഭിച്ച ഇവർ, പിന്നീട് 2021-ലാണ് 10 മിനിറ്റിനുള്ളിൽ സാധനങ്ങൾ എത്തിക്കുന്ന ക്വിക്ക് കൊമേഴ്സ് പ്ലാറ്റ്ഫോമായ സെപ്റ്റോയിലേക്ക് ബിസിനസ് മാറ്റിയത്. അന്ന് പലരും അസാധ്യമെന്ന് കരുതിയ ഈ ബിസിനസ് ലക്ഷ്യം ഇന്ന് ഇന്ത്യയിലെ ഇന്റർനെറ്റ് ഇക്കോണമിയിലെ ഏറ്റവും വേഗത്തിൽ വളരുന്ന മേഖലയായി മാറിയിരിക്കുകയാണ്. 2026 സാമ്പത്തിക വർഷത്തിൽ പാലിച്ചയ്ക്ക് 2.74 കോടി രൂപയും വോറയ്ക്ക് 2.61 കോടി രൂപയുമാണ് പ്രതിഫലം ലഭിച്ചത്.
സെപ്റ്റോയുടെ ഐപിഒ ഏകദേശം 9,000 കോടി രൂപ മുതൽ 10,000 കോടി രൂപ വരെയായിരിക്കും എന്നാണ് റിപ്പോർട്ടുകൾ സൂചിപ്പിക്കുന്നത്. 2026 സാമ്പത്തിക വർഷത്തെ കണക്കുകൾ പ്രകാരം കമ്പനിയുടെ പ്രവർത്തന വരുമാനം മുൻവർഷത്തെ അപേക്ഷിച്ച് ഇരട്ടിയായി വർദ്ധിച്ച് 22,624 കോടി രൂപയിലെത്തി. നിലവിൽ 66 നഗരങ്ങളിലായി 1,139 ഡാർക്ക് സ്റ്റോറുകൾ കമ്പനിക്കുണ്ട്.
കമ്പനി നിലവിൽ നഷ്ടത്തിലാണെങ്കിലും (FY26-ലെ അറ്റനഷ്ടം ₹5,905 കോടി), വരുമാനത്തിലും ഓർഡറുകളുടെ എണ്ണത്തിലും വലിയ കുതിപ്പാണ് രേഖപ്പെടുത്തുന്നത്. ശ്രദ്ധേയമായ കാര്യം, ഐപിഒ വേളയിൽ സ്ഥാപകർ തങ്ങളുടെ ഓഹരികൾ വിൽക്കുന്നില്ല എന്നതാണ്, പകരം നിക്ഷേപകർ മാത്രമാണ് ഓഹരികൾ വിറ്റഴിക്കുന്നത്. ബ്ലിങ്കിറ്റ്, സ്വിഗ്ഗി ഇൻസ്റ്റാമാർട്ട് തുടങ്ങിയ വമ്പന്മാരുമായി മത്സരിക്കുന്ന സെപ്റ്റോയുടെ ഈ മുന്നേറ്റം ഇന്ത്യൻ സ്റ്റാർട്ടപ്പ് ലോകത്തിന് വലിയ ആവേശം പകരുന്നതാണ്.
Read DhanamOnline in English
Subscribe to Dhanam Magazine
