യാത്രക്കാർക്ക് തിരിച്ചടി! എയർ ഇന്ത്യയും ഇൻഡിഗോയും ടിക്കറ്റ് നിരക്കുകൾ വർധിപ്പിക്കുന്നു

പശ്ചിമേഷ്യയിലെ സംഘർഷത്തെത്തുടർന്ന് വിമാന ഇന്ധന (ATF) വിലയിലുണ്ടായ കുതിച്ചുചാട്ടം കാരണം വിമാന ടിക്കറ്റ് നിരക്കുകൾ കുത്തനെ ഉയരുന്നു. എയർ ഇന്ത്യ, ഇൻഡിഗോ, ആകാശ എയർ തുടങ്ങിയ പ്രമുഖ വിമാനക്കമ്പനികൾ ആഭ്യന്തര, അന്തർദേശീയ ടിക്കറ്റുകളിൽ ഇന്ധന സർചാർജ് (Fuel Surcharge) ഏർപ്പെടുത്താൻ തീരുമാനിച്ചു.

വര്‍ദ്ധന ഇങ്ങനെ

വിവിധ വിമാനക്കമ്പനികളുടെ നിരക്ക് വർദ്ധന താഴെ പറയുന്നവയാണ്:

ആകാശ എയർ: 2026 മാർച്ച് 15 മുതൽ ബുക്ക് ചെയ്യുന്ന ടിക്കറ്റുകൾക്ക് വിമാനത്തിന്റെ ദൂരവും സമയവും അനുസരിച്ച് 199 രൂപ മുതൽ 1,300 രൂപ വരെ അധിക സർചാർജ് ഈടാക്കും.

എയർ ഇന്ത്യ: വിവിധ ഘട്ടങ്ങളിലായാണ് നിരക്ക് വർദ്ധന നടപ്പിലാക്കുന്നത്. ആഭ്യന്തര സർവീസുകൾക്കും സാർക്ക് (SAARC) രാജ്യങ്ങളിലേക്കുമുള്ള യാത്രകൾക്ക് 399 രൂപ അധികമായി നൽകണം. രണ്ടാം ഘട്ടത്തിൽ (മാർച്ച് 18 മുതൽ) വടക്കേ അമേരിക്ക, യൂറോപ്പ്, ഓസ്‌ട്രേലിയ യാത്രകൾക്ക് 25 ഡോളർ മുതൽ 50 ഡോളർ വരെ (ഏകദേശം 2,300 മുതൽ 4,700 രൂപ വരെ) വർദ്ധനവുണ്ടാകും.

ഇൻഡിഗോ: മാർച്ച് 14 മുതൽ പ്രാബല്യത്തിൽ വന്ന പുതിയ മാറ്റമനുസരിച്ച് 425 രൂപ മുതൽ 2,300 രൂപ വരെ ഇന്ധന സർചാർജ് ഈടാക്കും. ആഭ്യന്തര യാത്രക്കാർക്ക് 425 രൂപയും യൂറോപ്പ് യാത്രക്കാർക്ക് 2,300 രൂപയുമാണ് അധികമായി ചെലവാകുക.

യുഎസ്-ഇസ്രായേൽ-ഇറാൻ സംഘർഷം കാരണം ആഗോളതലത്തിൽ ഇന്ധനവില ഉയർന്നതാണ് ഈ തീരുമാനത്തിന് പിന്നിലെ പ്രധാന കാരണം. വിപണിയിലെ സാഹചര്യങ്ങൾ നിരന്തരം നിരീക്ഷിക്കുമെന്നും ഇതനുസരിച്ച് സർചാർജുകളിൽ മാറ്റങ്ങൾ വരുത്തിയേക്കാമെന്നും വിമാനക്കമ്പനികൾ അറിയിച്ചു.

_{Rising ATF prices due to the West Asia conflict prompt airlines like Air India, IndiGo, and Akasa Air to impose fuel surcharges on domestic and international tickets.}