രാജ്യത്ത് വ്യവസായങ്ങളുടെ വളര്‍ച്ച ആശാവഹമല്ലെന്ന് പുതിയ സ്ഥിതി വിവര കണക്കുകള്‍. ഏപ്രിലില്‍ രേഖപ്പെടുത്തിയത് 2.7 ശതമാനം വളര്‍ച്ചയാണ്. മാര്‍ച്ച് മാസത്തിലെ 3.94 ശതമാനത്തേക്കാള്‍ താഴെ. കഴിഞ്ഞ എട്ട് മാസത്തെ ഏറ്റവും കുറഞ്ഞ നിരക്കാണ് എപ്രിലില്‍ രേഖപ്പെടുത്തിയത്. അതേസമയം, കഴിഞ്ഞ വര്‍ഷം ഏപ്രിലിലെ കണക്കുകളെ അപേക്ഷിച്ച് നേരിയ വളര്‍ച്ച രേഖപ്പെടുത്തി. കേന്ദ്ര സ്റ്റാറ്റിസ്റ്റിക്‌സ് വകുപ്പിന്റേതാണ് പുതിയ കണക്കുകള്‍.
മാനുഫാക്ചറിംഗ് മേഖലയിലാണ് ഏപ്രിലില്‍ നേരിയ വളര്‍ച്ചയുണ്ടായത്. മൊത്ത വ്യവസായ സൂചികയുടെ പ്രധാന ഭാഗം ഈ മേഖലയാണ്. മാര്‍ച്ച് മാസത്തിലെ മൂന്ന് ശതമാനത്തില്‍ നിന്ന് 3.4 ശതമാനം വളര്‍ച്ച നേടി. 23 ഇനം വ്യവസായങ്ങളില്‍ 16 ഇനങ്ങളില്‍ മാര്‍ച്ചിനേക്കാള്‍ നേരിയ വളര്‍ച്ചയുണ്ടായി.
യന്ത്രങ്ങള്‍, (17 %), ഓട്ടോ (15.4%), ലോഹങ്ങള്‍ (4.9%) എന്നിവയുമായി ബന്ധപ്പെട്ട നിര്‍മാണ മേഖലകളും മെച്ചപ്പെട്ട പ്രകടനം കാഴ്ചവെച്ചു. ലോഹങ്ങളിൽ ഇരുമ്പ് പൈപ്പുകൾ, അലോയ് സ്റ്റീല്‍ എന്നിവയിലാണ് ഉല്‍പാദനം കൂടിയത്.
വൈദ്യുതി ഉല്‍പ്പാദനത്തില്‍ 1.1 ശതമാനം വര്‍ധനയുണ്ടായപ്പോള്‍ ഖനന മേഖലയില്‍ ഇടിവാണുള്ളത്. കണ്‍സ്യൂമര്‍ നോണ്‍ ഡ്യൂറബിള്‍ മേഖലക്ക് ക്ഷീണമാണുണ്ടായത്. അതേസമയം, ഡ്യൂറബിള്‍സിനും കാപിറ്റല്‍ ഗുഡ്‌സിനും കെട്ടിട നിര്‍മാണ മേഖലക്കും ഏപ്രില്‍ മെച്ചപ്പെട്ട മാസമായിരുന്നു.
Read DhanamOnline in English
Subscribe to Dhanam Magazine
