ക്ലെയിമുകൾ ഭാഗികമായി നൽകി തടിതപ്പാന്‍ നോക്കി ഇന്‍ഷുറസ് കമ്പനി, മുഴുവന്‍ ക്ലെയിമും നല്‍കണമെന്ന സുപ്രധാന വിധിയുമായി ഉപഭോക്തൃ കോടതി

ഇൻഷുറൻസ് കമ്പനികൾ പോളിസി നിബന്ധനകളിലെ അവ്യക്തതകൾ പറഞ്ഞ് ക്ലെയിമുകൾ ഭാഗികമായി മാത്രം നൽകുന്നത് സാധാരണമാണ്. എന്നാൽ ഇത്തരത്തിൽ തുക വെട്ടിക്കുറച്ച സ്റ്റാർ ഹെൽത്ത് ഇൻഷുറൻസിനെതിരെ (Star Health Insurance) ഉപഭോക്തൃ കോടതിയിൽ നിന്ന് പോളിസി ഉടമ അനുകൂല വിധി നേടിയെടുത്തു. ചണ്ഡിഗഡ് ഡിസ്ട്രിക്റ്റ് കൺസ്യൂമർ ഡിസ്പ്യൂട്ട് റിഡ്രസൽ കമ്മീഷനാണ് ഈ നിർണായക വിധി പുറപ്പെടുവിച്ചത്.

സംഭവത്തിന്റെ പശ്ചാത്തലം

ചണ്ഡിഗഡ് സ്വദേശിയായ വ്യക്തി തന്റെ കുടുംബത്തിനായി സ്റ്റാർ ഹെൽത്ത് ആൻഡ് അലൈഡ് ഇൻഷുറൻസ് കമ്പനിയുടെ 'ഫാമിലി ഹെൽത്ത് ഒപ്റ്റിമ ഇൻഷുറൻസ് പ്ലാൻ' എടുത്തിരുന്നു. 2022 ജൂലൈയിൽ ഇദ്ദേഹത്തിന്റെ ഭാര്യക്ക് കാൺപൂരിലെ ഒരു സ്വകാര്യ ആശുപത്രിയിൽ വെച്ച് ബാരിയാട്രിക് ശസ്ത്രക്രിയ നടത്തേണ്ടി വന്നു. ശസ്ത്രക്രിയയ്ക്കും ചികിത്സയ്ക്കുമായി ആകെ 2.25 ലക്ഷം രൂപയാണ് ചെലവായത്.

ചികിത്സയ്ക്ക് ശേഷം ക്ലെയിം സമർപ്പിച്ചപ്പോൾ നിബന്ധനകളും വ്യവസ്ഥകളും ചൂണ്ടിക്കാട്ടി കമ്പനി കേവലം 69,958 രൂപ മാത്രമാണ് അനുവദിച്ചത്. ബാക്കി 1.55 ലക്ഷം രൂപ നൽകാൻ കമ്പനി തയ്യാറായില്ല. ഇതിനെത്തുടർന്നാണ് പോളിസി ഉടമ ഉപഭോക്തൃ കോടതിയെ സമീപിച്ചത്.

കോടതിയുടെ നിരീക്ഷണം

പോളിസി എടുക്കുന്ന സമയത്ത് ഇത്തരം 'എക്സ്ക്ലൂഷൻ ക്ലോസുകൾ' (Exclusion clauses) അല്ലെങ്കിൽ തുക വെട്ടിക്കുറയ്ക്കാനുള്ള നിബന്ധനകൾ പോളിസി ഉടമയെ കൃത്യമായി ബോധ്യപ്പെടുത്തിയിട്ടില്ലെന്ന് കോടതി കണ്ടെത്തി. ഇൻഷുറൻസ് കരാറുകൾ പരസ്പര വിശ്വാസത്തിലധിഷ്ഠിതമാണെന്നും പോളിസി നൽകുമ്പോൾ തന്നെ എല്ലാ നിബന്ധനകളും ഉപഭോക്താവിനെ അറിയിക്കാൻ കമ്പനിക്ക് ബാധ്യതയുണ്ടെന്നും കോടതി നിരീക്ഷിച്ചു. നിബന്ധനകൾ പോളിസി ഉടമ ഒപ്പിട്ടു സമ്മതിച്ചതാണെന്ന് തെളിയിക്കാൻ കമ്പനിക്ക് സാധിച്ചില്ല.

വിധി ഇങ്ങനെ

ബാക്കിയുള്ള തുകയായ 1,55,042 രൂപ പരാതി നൽകിയ തീയതി മുതൽ 9 ശതമാനം പലിശ സഹിതം കമ്പനി നൽകണം. ഉപഭോക്താവിനുണ്ടായ മാനസിക വിഷമത്തിനും കോടതി ചെലവുകൾക്കുമായി 20,000 രൂപ നഷ്ടപരിഹാരം നൽകണം. 45 ദിവസത്തിനുള്ളിൽ വിധി നടപ്പിലാക്കണമെന്നും കോടതി ഉത്തരവിട്ടു.

ഇൻഷുറൻസ് കമ്പനികൾ ഏകപക്ഷീയമായി ക്ലെയിം തുക വെട്ടിക്കുറയ്ക്കുന്നത് സേവനത്തിലെ വീഴ്ചയായും അവിഹിതമായ വ്യാപാര രീതിയായും കോടതി കണക്കാക്കും എന്നത് വ്യക്തമാക്കുന്നതാണ് ഈ വിധി. അതേസമയം പോളിസി എടുക്കുമ്പോൾ നിബന്ധനകൾ പൂർണമായി വായിച്ചു മനസിലാക്കേണ്ടതും അവയെക്കുറിച്ച് കൃത്യമായ രേഖകൾ സൂക്ഷിക്കേണ്ടതും ഉപയോക്താക്കൾക്ക് അത്യന്താപേക്ഷിതമാണ്.

_{Consumer court orders Star Health to pay full ₹2.25 lakh claim with compensation after partial settlement.}