പുതിയ ഇൻഷുറൻസ് ബിൽ 2025 നിലവിൽ വരുന്നതോടെ ഇന്ത്യൻ ഇൻഷുറൻസ് മേഖലയിൽ സുപ്രധാനമായ മാറ്റങ്ങൾക്ക് കളമൊരുങ്ങുന്നു. ധനമന്ത്രി നിര്മ്മല സീതാരാമന് ലോക്സഭയില് ബില് ഇന്ന് അവതരിപ്പിച്ചു. ഇൻഷുറൻസ് റെഗുലേറ്ററി ആൻഡ് ഡെവലപ്മെന്റ് അതോറിറ്റി ഓഫ് ഇന്ത്യക്ക് (IRDAI) കൂടുതൽ അധികാരം നൽകുന്നതാണ് ഈ ബില്ലിലെ പ്രധാന വ്യവസ്ഥകളിൽ ഒന്ന്. ഇൻഷുറൻസ് ഏജന്റുമാർക്കും മറ്റ് ഇടനിലക്കാർക്കും നൽകുന്ന കമ്മീഷനുകൾക്ക് പരിധി നിശ്ചയിക്കാൻ IRDAI യെ ശാക്തീകരിക്കുന്നതാണ് ഇതിൽ പ്രധാനം.
ഏജന്റുമാർക്ക് നൽകുന്ന ഏതൊരു പ്രതിഫലത്തിനും (കമ്മീഷനായാലും മറ്റ് റിവാർഡുകളായാലും) നിയമപരമായ പരിധി നിശ്ചയിക്കാൻ ഇതോടെ റെഗുലേറ്ററിന് സാധിക്കുമെന്ന് എന്.ഡി.ടി.വി പ്രോഫിറ്റ് റിപ്പോര്ട്ട് ചെയ്യുന്നു. പുതിയ നിയമം പ്രാബല്യത്തിൽ വന്ന് ആറുമാസത്തിനകം കമ്മീഷൻ സംബന്ധിച്ച നിയന്ത്രണങ്ങൾ വിജ്ഞാപനം ചെയ്യേണ്ടതുണ്ട്. കമ്മീഷനുകൾ നിയന്ത്രിക്കുന്നതിലൂടെ ഇൻഷുറൻസ് കമ്പനികളുടെ സാമ്പത്തിക സുതാര്യത വർദ്ധിപ്പിക്കാനും, ഇത് വഴി പോളിസി ഉടമകൾക്ക് മികച്ച സേവനം ലഭ്യമാക്കാനും സാധിക്കുമെന്നാണ് വിലയിരുത്തൽ. നിലവിൽ കമ്മീഷൻ സംബന്ധിച്ച് നിയന്ത്രണങ്ങൾ ഉണ്ടെങ്കിലും, പുതിയ ബിൽ നിയമപരമായി റെഗുലേറ്ററിന് കൂടുതൽ സ്വാധീനം നൽകുന്നു.
കമ്മീഷൻ പരിധി നിശ്ചയിക്കുന്നതിനൊപ്പം, ഇൻഷുറൻസ് ക്ലെയിം വിതരണങ്ങളിലെ (Payouts) മേൽനോട്ടം ശക്തമാക്കാനും വിവരങ്ങൾ പരസ്യപ്പെടുത്തുന്നതിൽ കർശനമായ നിബന്ധനകൾ കൊണ്ടുവരാനും ബിൽ ലക്ഷ്യമിടുന്നു. ഇതിനുപുറമെ വിദേശ നിക്ഷേപം ആകർഷിക്കുന്നതിന്റെ ഭാഗമായി ഇൻഷുറൻസ് മേഖലയിലെ നേരിട്ടുള്ള വിദേശ നിക്ഷേപ പരിധി (FDI) 100 ശതമാനമായി ഉയർത്താനുള്ള തീരുമാനത്തിനും കേന്ദ്ര മന്ത്രിസഭ അംഗീകാരം നൽകിയിരുന്നു. ഈ പരിഷ്കാരങ്ങൾ രാജ്യത്ത് കൂടുതൽ മത്സരം വർദ്ധിപ്പിക്കാനും ഇൻഷുറൻസ് വ്യാപ്തി കൂട്ടാനും സഹായിക്കുമെന്നാണ് സർക്കാർ പ്രതീക്ഷിക്കുന്നത്. ഇൻഷുറൻസ് മേഖലയെ കൂടുതൽ നിയന്ത്രിതവും സുതാര്യവുമാക്കാൻ സഹായിക്കുന്നതാണ് പുതിയ ബിൽ.
24 ലൈഫ് ഇൻഷുറൻസ് സ്ഥാപനങ്ങളും 34 നോൺ-ലൈഫ് ഇൻഷുറൻസ് കമ്പനികളും അടക്കം ഇന്ത്യയിലാകെ 57 ഇൻഷുറൻസ് കമ്പനികളാണ് ഉളളത്. എന്നിട്ടും രാജ്യത്ത് ഇന്ഷുറന്സ് വ്യാപനം വളരെ കുറവാണ്. 2024 സാമ്പത്തിക വർഷത്തിൽ ജിഡിപിയുടെ 3.7 ശതമാനം മാത്രമായിരുന്നു ഇൻഷുറൻസ് പ്രീമിയം വ്യാപനം.
New Insurance Bill empowers IRDAI to regulate agent commissions and enhance sector transparency.
Read DhanamOnline in English
Subscribe to Dhanam Magazine
