സൗത്ത് ഇന്ത്യന് ബാങ്ക് 2024-25 സാമ്പത്തിക വര്ഷത്തില് 1,303 കോടി രൂപയുടെ റെക്കോഡ് ലാഭം രേഖപ്പെടുത്തി. മുന് വര്ഷത്തെ 1070.08 കോടി രൂപയെ അപേക്ഷിച്ച് 21.75 ശതമാനമാണ് വര്ധന. ബാങ്ക് കൈകാര്യം ചെയ്യുന്ന ആകെ ബിസിനസ് 1,95,104.12 കോടി രൂപയായി. മികച്ച പ്രകടനത്തിന്റെ അടിസ്ഥാനത്തില് 40 ശതമാനം ലാഭ വിഹിതത്തിന് ഡയറക്ടര് ബോര്ഡ് ശിപാര്ശ ചെയ്തു.
കഴിഞ്ഞ സാമ്പത്തിക വര്ഷത്തിലെ നാലാം പാദത്തില് (ജനുവരി-മാര്ച്ച്) 342.19 കോടി രൂപയാണ് ബാങ്കിന്റെ ലാഭം. 18.99 ശതമാനം വളര്ച്ചയാണ് രേഖപ്പെടുത്തിയത്. മുന് വര്ഷം ഇതേ കാലയളവില് 287.56 കോടി രൂപയായിരുന്നു. ബാങ്കിന്റെ പ്രവര്ത്തന ലാഭം മുന് വര്ഷത്തെ 1,867.67 കോടി രൂപയില് നിന്ന് 2,270.08 കോടി രൂപയായും വര്ധിച്ചു. 21.55 ശതമാനമാണ് വാര്ഷിക വളര്ച്ച.
മൊത്ത നിഷ്ക്രിയ ആസ്തികള് (GNPA) മുന് വര്ഷത്തെ 4.50 ശതമാനത്തില് നിന്ന് 3.20 ശതമാനമായി കുറയ്ക്കാന് ബാങ്കിന് സാധിച്ചു. അറ്റ നിഷ്ക്രിയ ആസ്തി (NNPA) 1.46 ശതമാനത്തില് നിന്നും 0.92 ശതമാനമാനമായും കുറയ്ക്കാനായത് നേട്ടമാണ്. അറ്റ പലിശ വരുമാനം 4.61 ശതമാനം വാര്ഷിക വളര്ച്ചയോടെ 3,485.64 കോടി രൂപയിലെത്തി. എഴുതിത്തള്ളല് ഉള്പ്പെടെയുള്ള കിട്ടാകടങ്ങളുടെ നീക്കിയിരുപ്പ് അനുപാതം 85.03 ശതമാനമായി. ആസ്തി വരുമാന അനുപാതത്തില് 1.05 ശതമാനത്തിന്റെയും ഓഹരി വരുമാന അനുപാതത്തില് 12.90 ശതമാനത്തിന്റെയും വര്ധന രേഖപ്പെടുത്തി. എഴുതിത്തള്ളലിനു പുറമെയുള്ള കിട്ടാകടങ്ങളുടെ നീക്കിയിരുപ്പ് അനുപാതം 71.77 ശതമാനമായി ഉയര്ന്നു.
ബാങ്കിന്റെ ചെറുകിട നിക്ഷേപങ്ങള് 7.17 ശതമാനം വളര്ച്ചയോടെ 1,04,749.60 കോടി രൂപയിലെത്തി. പ്രവാസി (എന്.ആര്.ഐ) നിക്ഷേപം 6.42 ശതമാനം വര്ധിച്ച് 31,603 കോടി രൂപയിലെത്തി. മുന് വര്ഷം ഈ കാലയളവില് 29,697 കോടി രൂപയായിരുന്നു.സേവിംഗ്സ് ബാങ്ക് നിക്ഷേപത്തില് 4.06 ശതമാനം വര്ധനയോടെ 27,699.31 കോടി രൂപയിലെത്തി.
മൊത്ത വായ്പകള് 8.89 ശതമാനം വളര്ച്ചയോടെ 80,426 കോടി രൂപയില് നിന്നും 87,578.52 കോടി രൂപയായി. കോര്പറേറ്റ് വായ്പകള് 12.82 ശതമാനം വാര്ഷിക വര്ധനയോടെ 32,084 കോടി രൂപയില് നിന്നും 36,198 കോടി രൂപയിലെത്തി. വന്കിട കോര്പ്പറേറ്റ് വിഭാഗത്തില് 99.70 ശതമാനവും ഉയര്ന്ന റേറ്റിംഗ് (എ അല്ലെങ്കില് അതിനു മുകളില്) ഉള്ള അക്കൗണ്ടുകളാണ്.
സ്വര്ണ വായ്പകള് 15,513 കോടി രൂപയില് നിന്ന് 16,982 കോടി രൂപയായി. 9.47 ശതമാനമാണ് വാര്ഷിക വളര്ച്ച. ഭവനവായ്പ 54.97 ശതമാനം വാര്ഷിക വളര്ച്ചയോടെ 7,877 കോടി രൂപയിലെത്തി. വാഹന വായ്പ 24.32 ശതമാനം വാര്ഷിക വളര്ച്ചയോടെ 1,987 കോടി രൂപയിലെത്തി. ബാങ്കിന്റെ പൂര്ണ ഉടമസ്ഥതയിലുള്ള എസ്.ഐ.ബി.ഒ.എസ്.എല്ലിന്റെ സാമ്പത്തിക ഫലങ്ങള് കൂടി ഉള്പ്പെട്ടതാണ് ബാങ്കിന്റെ ഈ സാമ്പത്തിക ഫലങ്ങള്.
സൗത്ത് ഇന്ത്യന് ബാങ്ക് ഓഹരി വില ഇന്ന് പാദഫല പ്രവര്ത്തനക്കണക്കുകള് വന്നതിനു പിന്നാലെ മൂന്ന് ശതമാനത്തിലധികം ഉയര്ന്നു. വ്യാപരം അവസാനിപ്പിക്കുമ്പോള് 27.77 രൂപയാണ് ഓഹരി വില. ഈ വര്ഷം ഇതുവരെ 10 ശതമാനത്തിലധികമാണ് വില ഉയര്ന്നത്.
Read DhanamOnline in English
Subscribe to Dhanam Magazine
