2,000 രൂപക്ക് മുകളിലുള്ള യു.പി.ഐ (UPI) ഇടപാടുകള്ക്ക് മര്ച്ചന്റ് ഡിസ്കൗണ്ട് റേറ്റ് (MDR) വീണ്ടും ഏര്പ്പെടുത്തുമെന്ന ചര്ച്ചകള്ക്കിടയില് വിഷയത്തില് പ്രതികരിച്ച് റിസര്വ് ബാങ്ക് ഗവര്ണര് സഞ്ജയ് മല്ഹോത്ര. ഡിജിറ്റല് പേയ്മെന്റ് സംവിധാനത്തിന്റെ പ്രവര്ത്തനച്ചെലവ് ആരെങ്കിലും വഹിക്കേണ്ടതുണ്ട്, അതിനുള്ള പരിഹാരമാണ് ഇപ്പോള് ചര്ച്ചയിലിരിക്കുന്നതെന്നും ഗവര്ണര് വ്യക്തമാക്കി. എന്നാല് UPI ഇടപാടുകള്ക്ക് ഉടന് ചാര്ജ് ഏര്പ്പെടുത്തുമെന്ന പ്രഖ്യാപനം അദ്ദേഹം നടത്തിയിട്ടില്ല.
ഡിജിറ്റല് പേയ്മെന്റ് സംവിധാനങ്ങള് പ്രവര്ത്തിപ്പിക്കുന്നതിന് ബാങ്കുകള്ക്കും പേയ്മെന്റ് സേവനദാതാക്കള്ക്കും ഗണ്യമായ ചെലവുണ്ട്. നിലവില് UPI ഇടപാടുകളില് ഉപഭോക്താക്കളില് നിന്നോ വ്യാപാരികളില് നിന്നോ MDR ഈടാക്കുന്നില്ല. ഈ സാഹചര്യത്തില്, 'ഈ ചെലവ് ആരെങ്കിലും വഹിക്കേണ്ടതുണ്ട്' എന്നായിരുന്നു ആര്ബിഐ ഗവര്ണറുടെ നിലപാട്. എന്നാല് അന്തിമ തീരുമാനം സര്ക്കാരിന്റെ നയപരമായ തീരുമാനമായിരിക്കുമെന്നും അദ്ദേഹം സൂചിപ്പിച്ചു.
Merchant Discount Rate (MDR) എന്നത് ഡിജിറ്റല് പേയ്മെന്റ് സ്വീകരിക്കുന്നതിന് വ്യാപാരികള് ബാങ്കുകള്ക്കോ പേയ്മെന്റ് സേവനദാതാക്കള്ക്കോ നല്കുന്ന സേവനഫീസാണ്. 2020 മുതല് UPIയും RuPay ഡെബിറ്റ് കാര്ഡ് ഇടപാടുകളും പ്രോത്സാഹിപ്പിക്കുന്നതിനായി MDR സര്ക്കാര് ഒഴിവാക്കിയിരുന്നു. അതിനുശേഷം ഡിജിറ്റല് പേയ്മെന്റുകളുടെ വന് വളര്ച്ചയോടൊപ്പം ബാങ്കുകളും ഫിന്ടെക് കമ്പനികളും ഈ സേവനം സൗജന്യമായി നല്കുന്നതിന്റെ സാമ്പത്തിക ഭാരം ഉയര്ന്നതായി വ്യവസായം ചൂണ്ടിക്കാട്ടുന്നുണ്ട്.
സര്ക്കാര് പരിഗണിക്കുന്ന പ്രധാന നിര്ദേശങ്ങളിലൊന്ന് 2,000-ന് മുകളിലുള്ള വ്യാപാര ഇടപാടുകള്ക്ക് മാത്രം MDR അനുവദിക്കുക എന്നതാണ്. ഇത് വ്യക്തികള് തമ്മിലുള്ള (P2P) UPI പണമിടപാടുകള്ക്ക് ബാധകമാകില്ലെന്നാണ് റിപ്പോര്ട്ടുകള്. കൂടാതെ ചെറുകിട വ്യാപാരികളെ ഒഴിവാക്കി വലിയ വ്യാപാരികള്ക്കാണ് ചാര്ജ് ബാധകമാകാന് സാധ്യതയുള്ളതെന്നും റിപ്പോര്ട്ടുകള് സൂചിപ്പിക്കുന്നു. നിര്ദേശമായി 0.3% മുതല് 0.5% വരെ MDR പരിഗണിക്കപ്പെടുന്നുവെന്ന റിപ്പോര്ട്ടുകളുണ്ട്. എന്നാല് ഇതുസംബന്ധിച്ച് അന്തിമ തീരുമാനം എടുത്തിട്ടില്ല.
നിലവിലെ ചര്ച്ചകള് പ്രകാരം സാധാരണ ഉപഭോക്താക്കള്ക്ക് നേരിട്ട് UPI ചാര്ജ് നല്കേണ്ട സാഹചര്യമില്ല. MDR ഏര്പ്പെടുത്തിയാല് അത് പ്രധാനമായും വ്യാപാരികളില് നിന്നായിരിക്കും ഈടാക്കുക. എന്നിരുന്നാലും, വ്യാപാരികള് ഈ അധിക ചെലവ് ഉല്പ്പന്നങ്ങളുടെയും സേവനങ്ങളുടെയും വിലയില് ഉള്പ്പെടുത്താന് സാധ്യതയുണ്ടെന്ന ആശങ്ക ചില വിദഗ്ധര് പങ്കുവയ്ക്കുന്നുണ്ട്.
പേയ്മെന്റ് ആന്ഡ് സെറ്റില്മെന്റ് സിസ്റ്റംസ് നിയമത്തില് സര്ക്കാര് നിര്ദേശിച്ച ഭേദഗതിയിലൂടെ, ഭാവിയില് ആവശ്യമായാല് ഡിജിറ്റല് പേയ്മെന്റുകള്ക്ക് MDR പോലുള്ള ഫീസ് ഏര്പ്പെടുത്താനുള്ള നിയമപരമായ വഴിയൊരുങ്ങും. എന്നാല് നിയമഭേദഗതി തന്നെ MDR ഏര്പ്പെടുത്തുന്നില്ല; പിന്നീട് സര്ക്കാര് പ്രത്യേക വിജ്ഞാപനം ഇറക്കിയാല് മാത്രമേ അത് പ്രാബല്യത്തില് വരികയുള്ളു.
Read DhanamOnline in English
Subscribe to Dhanam Magazine
