രാജ്യത്തെ ആദ്യകാല യുപിഐ (UPI) ആപ്പുകളിലൊന്നായ ഭീം (BHIM), വിപണിയിൽ ശക്തമായ തിരിച്ചുവരവ് നടത്തുന്നു. നാഷണൽ പേയ്മെന്റ് കോർപ്പറേഷൻ ഓഫ് ഇന്ത്യ (NPCI) പുറത്തുവിട്ട കണക്കുകൾ പ്രകാരം, കഴിഞ്ഞ രണ്ട് വർഷത്തിനിടെ ഭീം ആപ്പ് വഴിയുള്ള പ്രതിമാസ യുപിഐ ഇടപാടുകളിൽ പത്തിരട്ടി വർധനവാണ് രേഖപ്പെടുത്തിയിരിക്കുന്നത്.
2024 ജൂണിൽ വെറും 23 ദശലക്ഷം ഇടപാടുകൾ മാത്രം നടത്തിയിരുന്ന ഭീം, 2026 ജൂണിൽ 224 ദശലക്ഷം ഇടപാടുകളാണ് പൂർത്തിയാക്കിയത്. ഇടപാടുകളുടെ മൂല്യത്തിലും വലിയ വർധനവുണ്ടായി. 2024-ലെ 7,966 കോടി രൂപയിൽ നിന്ന് 25,613 കോടി രൂപയായി ഇത് ഉയർന്നു. നിലവിൽ യുപിഐ വിപണിയുടെ ഒരു ശതമാനത്തോളം മാത്രമാണ് ഭീമിനുള്ളതെങ്കിലും, ഫോൺപേ (PhonePe), ഗൂഗിൾ പേ (Google Pay) എന്നീ ആപ്പുകൾക്ക് വെല്ലുവിളി ഉയർത്തിക്കൊണ്ട് "ഇന്ത്യയുടെ സ്വന്തം ആപ്പ്" എന്ന നിലയിൽ ഇത് വളരുകയാണ്.
പുതിയ സേവനങ്ങളിലേക്ക്: പേയ്മെന്റുകൾക്ക് പുറമെ സാമ്പത്തിക സേവന രംഗത്തേക്ക് കൂടി കടക്കാനാണ് ഭീം ലക്ഷ്യമിടുന്നത്. ഇതിന്റെ ഭാഗമായി വളര്ച്ചയുടെ അടുത്ത ഘട്ടത്തില് ഡിജിറ്റൽ വായ്പകളും (Digital Loans) ക്രെഡിറ്റ് കാർഡ് ഉൽപ്പന്നങ്ങളും അവതരിപ്പിക്കുമെന്ന് കമ്പനി വ്യക്തമാക്കി. സർക്കാർ സേവനങ്ങൾ, ഡയറക്ട് ബെനിഫിറ്റ് ട്രാന്സ്ഫര് (DBT), സ്വയംസഹായ സംഘങ്ങൾ എന്നിവ കേന്ദ്രീകരിച്ചുള്ള ഡിജിറ്റൽ പേയ്മെന്റുകൾ വ്യാപിപ്പിക്കാനാണ് കമ്പനി ഇപ്പോൾ മുൻഗണന നൽകുന്നത്.
2024-ൽ ഭീമിനെ എൻപിസിഐയുടെ ഒരു സ്വതന്ത്ര ഉപകമ്പനിയായി (NPCI BHIM Services Limited) മാറ്റിയത് വളർച്ചയ്ക്ക് നിർണായകമായി. തുടർന്ന് 300 കോടി രൂപയുടെ നിക്ഷേപം നടത്തുകയും, ഉപയോക്താക്കളെ ആകർഷിക്കാൻ കാഷ്ബാക്ക് ഓഫറുകളും മെച്ചപ്പെട്ട ഇന്റർഫേസും അവതരിപ്പിക്കുകയും ചെയ്തു. കാനറ ബാങ്ക് ഉൾപ്പെടെയുള്ള പ്രമുഖ ബാങ്കുകളുമായി ചേർന്ന് പുതിയ സേവനങ്ങൾ സംയോജിപ്പിച്ചു വരികയാണ്. ഭീമിന് പുറമെ വാട്സ്ആപ്പ് പേ (WhatsApp Pay) പോലുള്ള ചെറിയ ആപ്പുകളും വിപണിയിൽ സജീവമാകുന്നുണ്ടെങ്കിലും, ഭീമിന്റെ ഈ വൻ കുതിച്ചുചാട്ടം ശ്രദ്ധേയമാണ്.
Read DhanamOnline in English
Subscribe to Dhanam Magazine
