പശ്ചിമേഷ്യയിലെ വർദ്ധിച്ചുവരുന്ന സംഘർഷങ്ങൾക്കിടയിൽ ആഗോള വിപണിയിൽ ക്രൂഡ് ഓയിൽ വില കുതിച്ചുയരുന്നു. ഇന്ന് (ജൂലൈ 23) ബ്രെന്റ് ക്രൂഡ് ഓയിൽ വില ബാരലിന് 98 ഡോളർ കടന്നു. ഇത് തുടർച്ചയായ അഞ്ചാം ദിവസമാണ് എണ്ണവില വർദ്ധിക്കുന്നത്, കൂടാതെ കഴിഞ്ഞ ആറ് ആഴ്ചയിലെ ഏറ്റവും ഉയർന്ന നിരക്കുമാണിത്.
അമേരിക്കയും ഇറാനും തമ്മിലുള്ള പോരാട്ടവും ചെങ്കടലിലെ സൗദി എണ്ണക്കപ്പലുകൾക്ക് നേരെയുണ്ടായ ഹൂതി ആക്രമണങ്ങളുമാണ് വിപണിയെ വല്ലാതെ ഉലച്ചിരിക്കുന്നത്. ചെങ്കടലിലെ ബാബ് എൽ-മാൻഡെബ് കടലിടുക്ക്, ഹോർമുസ് കടലിടുക്ക് എന്നീ പ്രധാന കപ്പൽ പാതകളിലൂടെയുള്ള ഇന്ധന നീക്കം തടസപ്പെടുമെന്ന ഭീതിയാണ് വില ഉയരാൻ പ്രധാന കാരണം. മിസൈലുകളും ഡ്രോണുകളും ഉപയോഗിച്ച് 'എൻസെലിയ' (Encelia), 'ലൈല' (Layla) എന്നീ രണ്ട് സൗദി ടാങ്കറുകളെ ലക്ഷ്യമിട്ടതായി യെമനിലെ ഹൂതികൾ അവകാശപ്പെട്ടു.
അൽ ഷുഖൈഖിന് സമീപം ഒരു കപ്പലിന് നേരെ ആക്രമണം ഉണ്ടാവുകയും അതിൽ തീപിടുത്തം ഉണ്ടാവുകയും ചെയ്തു. എൻസെലിയ ആക്രമിക്കപ്പെട്ട വിവരം സൗദി അധികൃതരും സ്ഥിരീകരിച്ചിട്ടുണ്ട്.
അസംസ്കൃത എണ്ണയുടെ (Crude Oil) വില ബാരലിന് 100 ഡോളർ കടക്കുന്നത് ഇന്ത്യയെ സാമ്പത്തികമായി പ്രതികൂലമായി ബാധിക്കും. ആവശ്യമായ ക്രൂഡ് ഓയിലിന്റെ 85 ശതമാനത്തിലധികവും ഇറക്കുമതി ചെയ്യുന്നതിനാൽ, വിലക്കയറ്റം രാജ്യത്തിന്റെ ഇറക്കുമതിച്ചെലവും വ്യാപാര കമ്മിയും (Trade Deficit) വർദ്ധിപ്പിക്കും.
ഇത് ഡോളറിനെതിരെ രൂപയുടെ മൂല്യം ഇടിയാൻ കാരണമാകുകയും ഇന്ധനവില വർദ്ധനവിലേക്ക് നയിക്കുകയും ചെയ്യും. ഇന്ധനവില ഉയരുന്നത് ഗതാഗതച്ചെലവ് കൂട്ടി രാജ്യത്ത് പണപ്പെരുപ്പം (Inflation) വർദ്ധിപ്പിക്കും. പണപ്പെരുപ്പം നിയന്ത്രിക്കാൻ റിസർവ് ബാങ്ക് പലിശനിരക്കുകൾ ഉയർത്താൻ നിർബന്ധിതരാകുമ്പോൾ, സാധാരണക്കാരുടെ കുടുംബ ബജറ്റിനെയും രാജ്യത്തിന്റെ മൊത്തത്തിലുള്ള സാമ്പത്തിക വളർച്ചയെയും അത് പ്രതികൂലമായി ബാധിക്കും.
ഇന്ത്യൻ വിപണിയിലെ ആഘാതം: എണ്ണവിലയിലെ വർദ്ധനവ് ഇന്ത്യൻ ഓഹരി വിപണിയെയും പ്രതികൂലമായി ബാധിച്ചു. തുടർച്ചയായ നാലാം ദിവസവും സെൻസെക്സും നിഫ്റ്റിയും ഇടിവ് രേഖപ്പെടുത്തി. ഓട്ടോ ഇൻഡക്സ് ഒഴികെയുള്ള എല്ലാ സെക്ടറുകളും നഷ്ടത്തിലാണ് വ്യാപാരം അവസാനിപ്പിച്ചത്. ആഗോളതലത്തിൽ വിതരണ തടസങ്ങൾ തുടരുകയാണെങ്കിൽ വില ഇനിയും ഉയരാൻ സാധ്യതയുണ്ടെന്ന് വിപണി വിദഗ്ധർ വിലയിരുത്തുന്നു.
Read DhanamOnline in English
Subscribe to Dhanam Magazine
