ആഗോള വിപണിയില്‍ അസംസ്‌കൃത എണ്ണ (Crude Oil) വിലയില്‍ അടുത്ത വര്‍ഷങ്ങളില്‍ ആശ്വാസകരമായ ഇടിവുണ്ടാകുമെന്ന് മുന്‍നിര ആഗോള ധനകാര്യ സ്ഥാപനമായ ഗോള്‍ഡ്മാന്‍ സാക്‌സിന്റെ (Goldman Sachs) പുതിയ റിപ്പോര്‍ട്ട്. മധ്യപൂര്‍വേഷ്യന്‍ (Middle East) രാജ്യങ്ങളില്‍ നിന്നുള്ള എണ്ണ ഉല്‍പാദനവും വിതരണവും വേഗത്തില്‍ സാധാരണ നിലയിലേക്ക് തിരിച്ചെത്തുന്നതോടെ 2027-ഓടെ ബ്രെന്റ് ക്രൂഡ് ഓയില്‍ വില ബാരലിന് 80 ഡോളറിലേക്ക് താഴുമെന്നാണ് ഗവേഷണ റിപ്പോര്‍ട്ടില്‍ വ്യക്തമാക്കുന്നത്.
നിലവില്‍ അമേരിക്ക-ഇസ്രായേല്‍-ഇറാന്‍ സംഘര്‍ഷങ്ങള്‍ കാരണം വിപണിയില്‍ പ്രീമിയം റിസ്‌ക് നിലനില്‍ക്കുന്നുണ്ടെങ്കിലും, ദീര്‍ഘകാലാടിസ്ഥാനത്തില്‍ എണ്ണ വിപണി മിച്ചത്തിലേക്ക് (Market Surplus) നീങ്ങുമെന്നാണ് വിലയിരുത്തല്‍.
നിലവിലെ ഭൗമരാഷ്ട്രീയ (Geopolitical) പിരിമുറുക്കങ്ങളും വിതരണ തടസങ്ങളും കണക്കിലെടുത്ത്, 2026 ഡിസംബറിലെ ബ്രെന്റ് ക്രൂഡ് വില പ്രവചനം ഗോള്‍ഡ്മാന്‍ സാക്‌സ് പരിഷ്‌കരിച്ചിട്ടുണ്ട്. മുന്‍പ് ബാരലിന് 85 ഡോളര്‍ പ്രവചിച്ചിരുന്ന സ്ഥാനത്ത് 90 ഡോളറായി ഉയര്‍ത്തി. എന്നാല്‍ ഈ താത്കാലിക വര്‍ധനയ്ക്ക് ശേഷം 2027-ല്‍ ശരാശരി വില 80 ഡോളറിലേക്ക് കൂപ്പുകുത്തുമെന്നാണ് പ്രവചനം.
മധ്യപൂര്‍വേഷ്യയില്‍ നിന്നുള്ള എണ്ണ കയറ്റുമതി കഴിഞ്ഞ സെപ്റ്റംബറോടെ പഴയ സാധാരണ നിലയിലേക്ക് ഉയര്‍ന്നിട്ടുണ്ട്. കയറ്റുമതിക്കാര്‍ സംഘര്‍ഷാവസ്ഥയുമായി പൊരുത്തപ്പെടുകയും പുതിയ ഗതാഗത മാര്‍ഗങ്ങള്‍ കണ്ടെത്തുകയും ചെയ്തതാണ് ഇതിന് കാരണം.
ഗള്‍ഫ് മേഖലയ്ക്ക് പുറത്തുനിന്നുള്ള രാജ്യങ്ങളില്‍ ഉല്‍പാദനം വര്‍ധിച്ചതും, ചൈന ഉള്‍പ്പെടെയുള്ള വന്‍കിട സമ്പദ്‌വ്യവസ്ഥകളില്‍ ഡിമാന്‍ഡ് കുറഞ്ഞതും എണ്ണലഭ്യതയിലെ കമ്മി (Supply Deficit) വന്‍തോതില്‍ കുറച്ചിട്ടുണ്ട്:
മാര്‍ച്ചിലെ കമ്മി പ്രതിദിനം 7.2 മില്യണ്‍ ബാരലായിരുന്നു. സെപ്റ്റംബറിലിത്പ്രതിദിനം 0.3 മില്യണ്‍ ബാരലായി കുറഞ്ഞു. 2026 നാലാം പാദത്തോടെ എണ്ണ വിപണി ആവശ്യത്തിലധികം വിതരണമുള്ള (Surplus) അവസ്ഥയിലേക്ക് മാറും. ഈ സ്ഥിതി 2027 മുഴുവന്‍ തുടരുമെന്നാണ് കണക്കാക്കുന്നത്.
2026 മൂന്നാം പാദത്തില്‍ ആഗോള എണ്ണ ഉപഭോഗത്തില്‍ പ്രതിദിനം 3.3 മില്യണ്‍ ബാരലിന്റെ കുറവുണ്ടായിട്ടുണ്ട്. ചൈന, മധ്യപൂര്‍വേഷ്യ, വികസിത ഏഷ്യന്‍ രാജ്യങ്ങള്‍ എന്നിവിടങ്ങളിലാണ് ഉപഭോഗം പ്രധാനമായും കുറഞ്ഞത്.
ചൈനയില്‍ ഇലക്ട്രിക് വാഹനങ്ങളുടെ (EV) ഉപയോഗം വേഗത്തില്‍ വര്‍ധിക്കുന്നതും ഇന്ധന ഉപഭോഗ രീതികളില്‍ വന്ന മാറ്റങ്ങളും ക്രൂഡ് ഓയിലിന്റെ ആഗോള ഡിമാന്‍ഡ് കുറയുന്നതിന് പ്രധാന കാരണമായി മാറിയിട്ടുണ്ട്.
ക്രൂഡ് ഓയില്‍ വില കുറയുന്നത് വലിയ ആശ്വാസമാണ് നല്‍കുക. പെട്രോള്‍, ഡീസല്‍ വിലയില്‍ കുറവുണ്ടാകാന്‍ ഇത് വഴിയൊരുക്കും. ഗതാഗത ചെലവുകളും നിത്യോപയോഗ സാധനങ്ങളുടെ വിലക്കയറ്റവും നിയന്ത്രിക്കാന്‍ ഇത് സഹായിക്കും. കൂടാതെ, എണ്ണ ഇറക്കുമതിക്കായി രാജ്യം ചെലവാക്കുന്ന വിദേശനാണ്യം കുറയുന്നത് രാജ്യത്തിന്റെ സമ്പദ്‌വ്യവസ്ഥയ്ക്കും അനുകൂലമാണ്.
Goldman Sachs predicts Brent crude prices will decline to $80 per barrel in 2027 as Middle East oil supply recovers and global markets shift into a surplus.
ക്രൂഡ് ഓയിൽ വില താഴേക്ക്; 2027-ഓടെ ബാ
Read DhanamOnline in English
Subscribe to Dhanam Magazine
