ഇന്ത്യൻ ഫുഡ് ഡെലിവറി പ്ലാറ്റ്ഫോമുകളായ സ്വിഗ്ഗി, സൊമാറ്റോ എന്നിവയുടെ രൂപീകരണത്തിന് പ്ര ചോദനമായ പ്രമുഖ അമേരിക്കൻ ലോക്കൽ കൊമേഴ്സ് പ്ലാറ്റ്ഫോമായ ഡോർഡാഷ് (DoorDash) ഇന്ത്യയിലേക്ക് പ്രവർത്തനം വ്യാപിപ്പിച്ചു. കമ്പനിയുടെ ഇന്ത്യയിലെ ആദ്യ ടെക്നോളജി ആൻഡ് ടാലന്റ് ഹബ്ബ് ഹൈദരാബാദിൽ പ്രവർത്തനം ആരംഭിച്ചു. തെലങ്കാന ഐ.ടി വകുപ്പ് മന്ത്രി ഡി. ശ്രീധർ ബാബുവാണ് ഈ സെന്ററിന്റെ ഉദ്ഘാടനം നിർവഹിച്ചത്.
3,000 തൊഴിലവസരങ്ങൾ: ആരംഭത്തിൽ 500 ജീവനക്കാരുമായാണ് പ്രവർത്തനം തുടങ്ങുന്നതെങ്കിലും അടുത്ത രണ്ട് വർഷത്തിനുള്ളിൽ ജീവനക്കാരുടെ എണ്ണം 3,000 ആക്കി ഉയർത്താനാണ് കമ്പനി ലക്ഷ്യമിടുന്നത്.
പ്രവർത്തന മേഖലകൾ: കസ്റ്റമർ എക്സ്പീരിയൻസ് ആൻഡ് ഇന്റഗ്രിറ്റി (CXI), അഡ്മിനിസ്ട്രേറ്റീവ് ടീമുകളാണ് ഹൈദരാബാദ് കേന്ദ്രത്തിൽ പ്രവർത്തിക്കുക. ലോകമെമ്പാടുമുള്ള ഡോർഡാഷിന്റെ മൂന്നാമത്തെ അന്താരാഷ്ട്ര CXI സർവീസ് സെന്ററാണിത്.
ആഗോള പിന്തുണ: ലോകത്തെ 40-ലധികം രാജ്യങ്ങളിൽ സാന്നിധ്യമുള്ള ഡോർഡാഷിന്റെ 5.6 കോടി (56 million) മാസാന്തര ഉപഭോക്താക്കൾക്കുള്ള ആഗോള പിന്തുണയും സേവനങ്ങളും ഈ ഹബ്ബ് വഴി ലഭ്യമാക്കും.
2013-ൽ സ്റ്റാൻഫോർഡ് സർവകലാശാലയിലെ നാല് വിദ്യാർത്ഥികൾ ചേർന്ന് ആരംഭിച്ച ഡോർഡാഷ്, ഹൈപ്പർലോക്കൽ ഡെലിവറി മേഖലയിലെ പ്രമുഖ ബ്രാൻഡാണ്. ഹൈദരാബാദിന്റെ വളർന്നുവരുന്ന ഡിജിറ്റൽ കൊമേഴ്സ് ആവാസവ്യവസ്ഥയ്ക്ക് ഈ ഹബ്ബിന്റെ വരവ് വലിയ കരുത്ത് പകരുമെന്ന് മന്ത്രി ശ്രീധർ ബാബു പറഞ്ഞു.
Read DhanamOnline in English
Subscribe to Dhanam Magazine
